ۇ ق ك ءتوراعاسى پرەزيدەنتكە ۆەدومستۆونىڭ جىل باسىنان بەرگى جۇمىسى تۋرالى باياندادى
كەزدەسۋ بارىسىندا مەملەكەت باسشىسىنىڭ تاپسىرمالارىنىڭ ورىندالۋ بارىسى، ۆەدومستۆونىڭ جىل باسىنان بەرى اتقارعان قىزمەتىنىڭ نەگىزگى قورىتىندىسى مەن الداعى كەزەڭگە ارنالعان جوسپارى تۋرالى مالىمەت بەرىلدى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆقا ۇلتتىق قاۋىپسىزدىك كوميتەتىنىڭ بولىمشەلەرى ءبىرقاتار لاڭكەستىك قىلمىستىڭ، سونىڭ ىشىندە قولدان جاسالعان جارىلعىش قۇرىلعىنى قولدانۋ ارقىلى حالىق كوپ جينالاتىن ورىنداردىڭ بىرىندە جاسالماق بولعان تەرروريستىك اكتىگە توسقاۋىل قويىلعانى جونىندە باياندالدى. بەرىلگەن مالىمەت بويىنشا 19 ادام قاماۋعا الىندى. ەرمەك ساعىمبايەۆ تەرروريزمگە قارسى ورتالىق شتابىنىڭ جۇمىسىن ۇيلەستىرۋ كەزىندە تەررورلىق قاتەرلەرگە قارسى ءىس-ارەكەت شارالارىن جەتىلدىرۋ ءۇشىن جاتتىعۋ جيىندارى مەن دايىندىقتار وتكىزىلگەنىن حابارلادى.
سونىمەن قاتار شەت مەملەكەتتەردىڭ ارناۋلى قىزمەتتەرىنىڭ بارلاۋ ارەكەتتەرىنە قارسى ءىس-قيمىل وپەراتسيالارى جۇزەگە اسىرىلدى. انىقتالعان ءبىرقاتار فاكتى بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
بۇدان بولەك، مەملەكەت باسشىسىنا قۇقىق قورعاۋ ورگاندارىمەن بىرلەسە جۇرگىزگەن كريمينوگەندىك جاعدايدى ساۋىقتىرۋ جۇمىستارىنىڭ ناتيجەسى تۋرالى باياندالدى. بيىلعى ءتورت ايدا ۇ ق ك 8 قاۋىپتى ۇيىمداسقان قىلمىستىق توپتى قۇرىقتادى. قارۋ-جاراق پەن وق-ءدارى جاساۋعا قاتىستى 7 جاسىرىن سەح جويىلدى. زاڭسىز اينالىمنان 268 قارۋ، 21 گراناتا جانە 30 مىڭنان استام وق-ءدارى تاركىلەندى. 16 ەسىرتكى لابوراتورياسىنىڭ، 11 حالىقارالىق جانە 17 وڭىرلىك ەسىرتكى كانالىنىڭ جۇمىسى توقتاتىلدى.
مەملەكەتتىك شەكارانى كۇزەتۋ سالاسىندا 6987 زاڭ بۇزۋشى ۇستالدى. شامامەن 2,8 ميلليارد تەڭگە كولەمىندە ۆاليۋتا، التىن جانە باسقا دا تاۋارلاردىڭ زاڭسىز تاسىمالدانۋىنا جول بەرىلمەدى. قارۋ مەن وق-دارىلەردى تاسىمالداۋعا قاتىستى 85 ارەكەتتىڭ جولى كەسىلدى. زاڭسىز كوشى-قون بويىنشا 4 ارناعا توسقاۋىل قويىلىپ، ولاردىڭ 6 ۇيىمداستىرۋشىسى ۇستالدى.
ۇلتتىق قاۋىپسىزدىك كوميتەتىنىڭ تەحنيكالىق بولىمشەلەرى 37,9 ميلليوننان استام كيبەرشابۋىلدى جانە ەلدىڭ ماڭىزدى ينفراقۇرىلىم نىساندارىنا باعىتتالعان 1948 DDoS- شابۋىلعا تويتارىس بەردى.
كەزدەسۋ قورىتىندىسى بويىنشا پرەزيدەنت ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا ءبىرقاتار ناقتى تاپسىرما بەردى.
