فاريزا وڭعارسىنوۆانىڭ اق ماحابباتى

استانا. قازاقپارات - قازاقتىڭ كورنەكتى اقىنى فاريزا وڭعارسىنوۆانىڭ شىعارماشىلىعى تۋرالى وسى كۇنگە دەيىن از جازىلعان جوق، از ايتىلعان جوق.

ءبىراق بۇگىن ءبىز ونىڭ ماحاببات ليريكاسىنا توقتالعىمىز كەلىپ وتىر. جوق، فاريزا اپامىزدىڭ ماحابباتىن ولشەپ- پىسۋدەن ياكي باعامداۋدان اۋلاقپىز. سەبەبى ءاربىر جان ءوز دەڭگەيىندە سۇيەدى، عاشىق بولادى. ءبىز ەشكىمدى ءوزىمىز سەكىلدى نەمەسە ءوزىمىزدى وزگەلەر سەكىلدى سۇيە الماعانىمىز ءۇشىن جازعىرا المايمىز. ماحاببات ەشقاشان بارلىعىنا بىردەي بولىپ كورىنبەيدى. بۇل بەينە ءبىر قايىستىڭ ماحمۇد پاتشاعا بەرگەن جاۋابى سەكىلدى: «ءسىز مەنىڭ كوزىممەن كورىڭىز!». ايتپەسە ماحمۇد پاتشانىڭ كورگەنى قاپ-قارا، تاپال بويلى اراب قىزى ەدى. ال قايىستىڭ كوزىندە بۇل ءلايلا بولاتىن. قايىستى ءماجنۇن قىلعان ءلايلا بولاتىن بۇل. دەمەك سۇيگەن جاننىڭ كوزىمەن ونىڭ سۇيىكتىسىنە ەشقاشان قاراي المايتىنىمىزدى ەسكەرسەك. ءبىز ەشكىمنىڭ ماحابباتى جايلى سويلەۋگە ياكي پىكىر بىلدىرۋگە حاقىمىز جوق.

ءبىز ونىڭ ەشقاشان بىتپەستەي بولىپ كورىنگەن تۇندەردە، ەشقاشان اتپاستاي بولىپ كورىنگەن تاڭداردا نە سەزىنگەنىن، نە سەزگەنىن بىلە المايمىز. ءبىراق بىلگەندەي بولىپ كورىنەمىز. سەبەبى بۇكىل قاستەرلى ۇعىمداردىڭ كليشەگە اينالىپ كەتكەن زامانىندا «عاشىق بولۋ دەگەن...»، «ءسۇيۋ دەگەن...» سىندى جالپىعا ورتاق انىقتامالارىمىز بار. ايتپەسە عاشىق بولۋ تەك عاشىققا عانا ايان نارسە ەمەس پە ەدى؟! وسى سەكىلدى فاريزا اپامىزدىڭ ولەڭدەرىندەگى ماحاببات جايلى يمەنە- يمەنە نە ايتساق تا، حاقيقاتىنا جەتپەيمىز. بىلمەيمىز. كورمەيمىز. سەزبەيمىز. ول حاقيقات فاريزا اپامىزدىڭ جۇرەگىندە قالدى. ءبىز بولساق بۇل جازبامىزدى جوعارىدا ايتىپ كەتكەنىمىزدەي ءبىر كليشە نەگىزىندە جازعىمىز كەلىپ وتىر. ءبىراق مۇنىڭ قانشالىق دۇرىس ياكي بۇرىس ەكەنىن بىلمەي وتىرعان جايىمىز جانە بار.

سونىمەن، بۇل كليشە تاعى دا ءلايلا مەن ماجنۇنگە بايلانىستى. بالكىم، فاريزا اپامىزدىڭ ولەڭدەرىندەگى ماحاببات ءلايلا مەن ءماجنۇننىڭ ماحابباتى اياقتالعان تۇستا باستالعان شىعار. بالكىم ءتىپتى بولەك نۇكتەدە قاراستىرۋىمىز كەرەك پە ەدى، ول جاعى دا بەلگىسىز. ءبىراق وسى ومىردە ءلايلا مەن ءماجنۇننىڭ ماحابباتى اياقتالعان تۇستا، ماحابباتتارى باستالعان جاندار بار ەكەنىنە سەنەمىن.

ءالقيسسا، كۇندەردىڭ ءبىر كۇنى جۇرەگىن قولىنا الىپ قايىس ءلايلاعا كەلەدى. ءوزىنىڭ وعان عاشىق ەكەنىن ايتادى. ءلايلا ونى سىناۋ ءۇشىن الىس ساپارعا جىبەرەدى. قايىستىڭ تاراپىنان ەشقانداي سۇراق قويىلمايدى، قارسى دا شىقپايدى. سىناعىن قابىلداپ جولعا تۇسەدى. ءبىراق ساپاردىڭ الىس ەكەنى سونشا، قايتار جولدا قايىس اداسىپ كەتەدى. ول ءلايلاعا قايتار جولدى تاپپاي قالادى. سولايشا، جىلدار بويى ءشول كەزىپ جۇرەدى. اڭىزدىڭ سوڭى قايعىلى وقيعالار اياقتالادى.

ءبىراق ءشول كەزىپ ءجۇرىپ قايىس ءوزىن «بارساكەلمەس» ساپارعا اتتاندىرعان ءلايلانى كىنالامايدى. ءلايلا دا قايىستى الىس ساپارعا اتتاندىرعانى ءۇشىن ءوز-ءوزىن جازعىرمايدى. سەبەبى ءلايلا مەن قايىستىڭ تۇسىنىگىندە «عاشىقتىق - سىناق» ەدى. تەك سىناقتان وتكەندەر عانا سۇيۋگە لايىق. جۇرەگىن قولىنا الىپ كەلگەن كۇنى قايىستىڭ «مەن ساعان عاشىقپىن» دەگەنى، «مەنى سىنا» دەگەنى بولاتىن. قوس عاشىقتىڭ ماحابباتى سىناققا تۇسپەيىنشە بار بولا المايتىنى ەكى باستان بەلگىلى-تىن.

سول ساتتە قايىستىڭ ماحابباتىن سىناماي قابىلداسا ءلايلا ءلايلا بولمايتىن، سىناققا تۇسپەسە قايىس ءماجنۇن بولمايتىن. اڭىزداعى بۇل سىناق - الىس ساپارمەن كورىنىس تاپتى. ارينە، قايىس بۇل سىناقتان وتە الماي، ءلايلاسىنا قاۋىشا الماي قالدى دەۋىڭىزگە بولادى. ءبىراق مۇنداعى «قاۋىشا الماۋ» ۇعىمى دا تاعى ءسىز بەن ءبىزدىڭ ويلاعانىمىزداي ەمەس. سەبەبى قايىس سىناققا تۇسكەن ساتتە لايلامەن قاۋىشقان ەدى. مىنە، جازبامىزداعى عاشىقتىق جايلى كليشەنىڭ جاي-جاپسارى وسىنداي. عاشىقتىق - سىناققا ءتۇسۋ. سىناق - الىس ساپار. ەندى وسى كليشەلەردىڭ اياسىندا فاريزا وڭعارسىنوۆانىڭ اق ماحابباتى جايلى ءسوز بولماق.

فاريزا اپامىزدىڭ 2013 -جىلى «اتامۇرا» باسپاسىنان شىققان «داۋا» اتتى كىتابىن وقىپ وتىرىپ، بۇل كىتاپتاعى قايىستىڭ دا اڭىزداعى قايىس سەكىلدى الىس ساپارعا اتتانعانىن كورۋگە بولادى. ال كىتاپتاعى ءلايلا قايىستى ساعىنادى، اڭسايدى، جولىن كۇتەدى:

دۇنيە بوس قالدى عوي سەن كەتكەلى،

كۇلەگەش دوستاردى قوي جەر- كوكتەگى.

ەشبىرى وزىڭدەي بوپ جۇرەگىمدى،

شاتتىقتان نە قايعىدان كەرنەتپەدى.

ۇيقىدان سەن دەپ اشتىم جانارىمدى،

سەندەلدىم، بەلدەن استىم - دارا شىڭدى.

كوڭىلىم قۇزدان قۇلاپ ءجۇرمىن ەسسىز

جاۋتاڭداپ جەتىم قالعان بالا عۇرلى.

ەندى ءبىر ولەڭىندە قايىستىڭ ساپاردان ءالى كەلمەگەنىنە رەنجيدى. شىن جۇرەگىمەن بۇل سىناقتان وتكەنىن قالايدى، كەلگەنىن قالايدى. ءبىراق كىتاپ ىشىندەگى ءلايلا مەن قايىستىڭ ماحابباتى دا الىس ساپارمەن سىنالعان بولاتىن. مۇنى ءلايلا بىلەدى، سەزەدى، سەزىنەدى. ءومىر بويى كۇتىپ وتۋگە دايارمىن دەيدى. سەبەبى كۇتۋ دە وسى سىناقتىڭ ىشىندە.

ويلامادىڭ سەن مەنى، ەسكە المادىڭ،

الار ءبىر كەز ادامدار كەشكەن جالىن.

ءومىر دەگەن كەتەدى وكىندىرىپ،

ەسىڭە الما. ءبىراق تەك كەش قالماعىن.

اياعانسىپ مۇڭايما: «زارلى عاشىق

ۇزاق ءتۇنى ءجۇر-اۋ، - دەپ، - تاڭعا ۇلاسىپ…»

مەن وتەرمىن ارىما داق تۇسىرمەي،

بىرگە شىعار بەلەستەن جالعىز اسىپ.

ءبىر قاراعاندا بۇل ماحابباتتا ءلايلا سىناۋشى، قايىس سىنالۋشى بولىپ كورىنەتىن سەكىلدى. ءبىراق بۇل تولىقتاي قاتە ۇعىم. سەبەبى بۇل سىناقپەن تەك قايىس ەمەس، ءلايلا دا سىنالىپ جاتىر. ءلايلا قايىستى كۇتۋمەن سىنالۋ ۇستىندە. ال ءسىز كۇتۋدىڭ قانداي اۋىر سىناق ەكەنىن بىلەسىز دەگەن ويدامىن. اعىلشىن اقىنى شەكسپير «سەنى كۇتۋ - توزاققا تۇسۋمەن بىردەي. ءبىراق ءبارىبىر سەنى كۇتەمىن» دەگەنى، كۇتۋدىڭ قانداي اۋىر سىناق ەكەنىنىڭ دالەلى دەپ بىلەمىن. وسى ورايدا، ەسەنعالي راۋشانوۆتىڭ:

دۋمان قۇرسا،

قۇس بىتكەن جيىلىپ اپ،

ۇندەمەيدى مونتيعان بۇيىعى باق.

قيىن، قيىن ومىردە كۇتىپ ءوتۋ،

ال كۇتپەۋ شە؟

ودان دا قيىنىراق.

- دەگەن جولدارى ەسىمىزگە تۇسەدى. بالكىم، كۇتپەۋ ودان دا قيىن شىعار، راسىندا. ءبىراق ءبىزدىڭ كىتاپتاعى ءلايلا «مەن وتەرمىن ارىما داق تۇسىرمەي/ بىرگە شىعار بەلەستەن جالعىز اسىپ» دەيدى. ياعني، ءومىر بەلەسىندە ءلايلا ارىنا داق تۇسىرمەي، قايىستى كۇتەدى. سەبەبى كۇتۋ دە ماحابباتتى بىلدىرەدى. ءبىراق ءلايلا ءوزىنىڭ قينالىپ جاتقانىن ايتىپ، قايىستىڭ جۇرەگىن اۋىرتقىسى كەلمەيدى. ماحاباتىنىڭ سوڭى قاسىرەتپەن اياقتالماس ءۇشىن، قايىس ساپاردان ورالعانشا قاسىرەت شەگۋگە دايار. باستىسى قايىس بۇل سىناقتى وتكەرۋ كەرەك. سول ءۇشىن «اياعانسىپ مۇڭايما: «زارلى عاشىق ۇزاق ءتۇنى ءجۇر-اۋ، - دەپ، - تاڭعا ۇلاسىپ…» دەيدى.

ساعىنعان، الاسۇرعان شاقتارىڭدا

ەشقاشان باتپا مۇڭعا:

ەسىڭە ال مەنىڭ ساعان قۇشتارلىعىم

باسىلماس ءورتى ەدى عوي ۇقساڭ، كۇنىم…

ءاسىلى، ماحابباتتىڭ ەڭ كوركەم تۇسى - ءوزىڭدى ۇمىتۋ. ءوزىڭ كۇيىپ جاتساڭ دا، سۇيگەنىڭدى ويلاۋ، سوعان الاڭداۋ. ماڭدايىڭا تيگەن تاسقا قاراعاندا، سۇيگەنىڭدى تابانىنا كىرگەن تىكەنى الدەقايدا جانىڭدى اۋىرتاتىن بولادى. ءدال وسى سەكىلدى كىتاپ ىشىندە ءلايلا دا ءوزىن ۇمىتقان. كۇتۋدىڭ الاۋىندا ورتەنىپ جاتسا دا، كەلۋدىڭ ورمانىندا اداسقان قايىستى ويلايدى: «مەنى ساعىنعان ۋاقىتتا مۇڭعا باتپا. مەنىڭ ساعان دەگەن قۇشتارىمدى ەسىڭە ال» دەيدى. سول قۇشتارلىقتىڭ كۇشىمەن قايىستىڭ ساپاردان ورالاتىنىنا سەنەدى. قانداي جاعداي بولماسىن، ءلايلا كۇتەدى. قايىس كەلۋى كەرەك. قايىستىڭ كەلەتىنىنە سەنەدى ءلايلا.

تۇندەر قانداي ۇرەيلى جالعىز جانعا،

قالعاندايمىن كۇزدەگى تاڭعى ىزعاردا.

كوزىم جۇمسام، شوشىتىپ سۇستى ەلەستەر،

تىلسىم با، جار، قۇزدار ما…

مازاقتايدى تاعدىردىڭ ءتۇنى، جەلى،

كوكىرەگىم ىزادان تىلىنەدى.

شىر ەتكەندەي قوڭىراۋ - سوندا ەسىككە

جۇرەگىم جۇگىرەدى…

جۇگىرەدى...قايتادان باسىلادى -

ەستىلمەيدى ەشكىمگە جاسى، زارى.

تاعدىرىمنىڭ داۋىلى ازىناپ تۇر -

بۇل الدە باسى ما ءالى؟ ..

نەگىزى بۇل الىپ سىناقتىڭ ەڭ اۋىرى ءلايلانىڭ وزىنە بەرىلگەن. قايىس جۇرەگىن الىپ كەلگەن كۇنى، ونى ساپارعا اتتاندىرۋ ارقىلى ءلايلا ءوزىن وتقا تاستاپ جىبەرگەن. سەبەبى بۇل سىناقتا ءلايلا جالعىز، ال قايىستا جول بار ەدى. قايىس جولعا، ءلايلا تورعا تۇسكەن.

ەشقاشان بىتپەستەي بولعان تۇندەردە ءلايلا تور ىشىندە قايىستى ىزدەيدى. ءسات سايىن ءلايلاعا قىبىر ەتكەن ءاربىر دىبىستان باستاپ، شۋلاپ جاتقان الەمنىڭ بارلىعى قايىستىڭ كەلگەنىن ايتاتىن سەكىلدى كورىنەدى. شىر ەتكەن ەسىك قوڭىراۋىنا جۇرەگى وزىنەن بۇرىن جەتەدى. مىنە، مىنە قايىس ەسىكتەن كىرىپ كەلەتىندەي. ءبىراق ەشكىمنىڭ جوق ەكەنىن كورىپ، جۇرەگى ىشىنەن تىنىپ جىلايدى، مۇڭايادى، جابىرقايدى. بالكىم، بۇل مۇڭايۋلار، جابىرقاۋلار مەن جىلاۋلار سىناقتىڭ باسى عانا دەيدى ءوز-وزىنە. سوندا دا باسىنىڭ اشىلىعىنا قاراعاندا، سوڭىنىڭ تاتتىلىگىنەن ءۇمىتتى. ەسىكتەن قايىستىڭ كىرمەگەنىنە نالىپ، كوزىنەن جاس توگىپ وتىرعاندا:

تەلەفون شىر ەتەدى:

سوندا مەنىڭ جۇرەگىم ءدىر ەتەدى،

كويلەگىمنىڭ جەلبىرەپ گۇل ەتەگى

جۇگىرەمىن. نە پايدا، سەن ەمەسسىڭ.

تەك قيالداۋ كوڭىلدى جۇدەتەدى.

كەشكە دەيىن نەشە رەت دىرىلدەتىپ،

ءمانسىز، ءارسىز، الاڭمەن كۇن وتەدى.

ءتىپتى تەلەفوننان كەلگەن قوڭىراۋلار دا قايىستان كەلىپ تۇسكەندەي بولىپ كورىنەدى. ءدىر ەتكەن ءاربىر قوڭىراۋدان قايىستىڭ ءۇنىن ەستىپ قالارمىن دەپ جۇگىرەدى. ءبىراق،

تەلەفونى قۇرعىرىڭ ۇندەمەدى -

وياتپادى مازالاپ تۇندە مەنى.

شىرت ۇيقىدان تۇرعىزىپ سۇيىكتىم كەپ

كەتەمىز، ءجۇر دەمەدى.

اق ايدىنعا توعىتىپ جىر- كەمەنى،

جەلمەن ۇشىپ جانىمنىڭ مۇڭ- جەلەگى،

اعىستارمەن الىسار ارمان ساتتەر

ۇمىتتى مۇلدە مەنى.

جاقىنداتپاي، الدىرماي وي قامالى،

ءۇمىت، ىزا - جيىلىپ بويعا ءبارى،

ارمان وتى جارقىلداپ جانارىمدا

نايزاعاي وينامادى.

ازاپتىڭ دا راقات بار مۇڭدارى،

سەنى ساعىنعانىم دا - جاننىڭ ءنارى.

وسى ءبىر ءسات تىنىشتىق بولسا يگى ەدى

داۋىلدىڭ الدىنداعى!

ءبىراق «قۇرعىر تەلەفون ۇندەمەدى». قايىس ءالى ورالمادى. ءلايلا ارماندارىنىڭ ءوزىن ۇمىتقانىنا سەنە باستاعان سەكىلدى. ءبىراق بۇل ماحابباتتىڭ ءمانى وسى ساپاردا ەمەس پە؟! وسى ساپار عانا ولاردىڭ ماحابباتىن بار ەتەدى ەمەس پە؟! وسى ءۇشىن ءلايلا مۇنداعى ازاپتىڭ دا ءوز راقاتى بار ەكەنىن بىلەدى. ءتىپتى ساعىنىشى دا جانىنا قورەك. تەك مىنا تىنىشتىق، مىنا جالعىزدىق قايىستىڭ ورالۋىمەن اياقتالسا يگى ەدى دەيدى. سەبەبى بۇل جالعىزدىقتى قايىستىڭ ورالۋى عانا جەڭە الادى.

سەن كەلمەگەندە

جانتالاسام سەزىمنىڭ تاسقىنى ۇرىپ،

جانارعا جاس تىعىلىپ،

قوياتۇعىن ءوزىمدى جەر تابا الماي،

جالعىزدىقتان جينالعان شەر تارالماي،

وتىرامىن ىشىمدە قاسقىر ۇلىپ.

ارپالىسام وزىممەن

ءبارىن تۇل عىپ كەتەتىن جاق تابا الماي،

دۋماندى باققا بارماي -

تارىلعانداي دۇنيە الاسۇرام،

سوسىن، سوسىن تاۋسىلىپ شاما، شىدام،

جەر بولامىن بىرەۋلەر تاپتاعانداي.

ساعان ايان بۇل كۇيىم،

بۇرقانىسىم،

وزەندەردەي وزگەرتەر كۇرت اعىسىن.

ساعان قاراي قول سوزام، ارمان- ءانىم،

تالىقسيمىن، قايتادان جاندانامىن

تاعى ءبىر شىرقاۋ ءۇشىن.

فاريزا اپامىزدىڭ كىتابىنداعى ءلايلا جالعىز. وقىعان ءۇش شۋماقتان ءلايلانىڭ قانشالىقتى دارەجەدە جالعىز بولعانىن كورۋگە بولادى. «جالعىزدىقتان جينالعان شەر تارالماي» الاسۇرعان جاننىڭ بەينەسى ءسىزدىڭ دە كوز الدىڭىزدان كەتپەي تۇرعانىن سەزەمىن. ءبىراق ءلايلانىڭ بۇل حالىنەن قايىس حاباردار بولۋى قاجەت: بۇل ورتاق ماحابباتتىڭ سىناعى. وزىنە قاراي سوزىلعان قولدىڭ اۋا قارماپ قالماسى ءۇشىن قالاي دا ورالۋ كەرەك ەكەنىن بىلەدى قايىس. قايىس بۇل ساپاردى ءلايلا ءۇشىن باستاعان، ءلايلا ءۇشىن اياقتاۋعا مىندەتتى. سەبەبى ءلايلا ارقىلى قايىستىڭ بار بولاتىنى سەكىلدى، قايىس ارقىلى دا ءلايلا بار بولادى. ءتىپتى كىل عالامدى قايىس ارقىلى كورەدى، سەزەدى.

ءبىر- اق جايدى، ايتەۋىر، ءبىلدىم بۇگىن:

ماڭايىمدى، ءتىپتى اناۋ جىڭعىل گۇلىن

سەن ارقىلى ورايمىن جىلىلىققا،

سەن ارقىلى ءسىڭىرىپ كۇننىڭ نۇرىن.

ۇستەمدىگىن جۇرگىزىپ زامان مىنا،

ادامزاتتىڭ بولمىسى جاڭاردى ما -

مەن، ايتەۋىر، سەزىنەم سەن ارقىلى

الەمدەگى جاقسىنى، جاماندى دا.

دەسە دە، ءوزىن بار ەتكەن قايىستىڭ قازىر قاسىندا بولماعانى جانىنا باتادى. بەينە ءبىر ءلايلاعا ارمانداۋدى ۇيرەتىپ، سول ارماندارىمەن ءلايلانى جالعىز قالدىرىپ كەتكەندەي قايىس. قايىسسىز ءلايلا ول ارمانداردى قايتسىن؟ ! ەگەر قايىس بولماسا بارلىعىنىڭ قۇنى بەس تيىن. ءدال وسىلاي شەكسىز ماحابباتقا ءلايلا ءوزىنىڭ قاشان، قالاي تاپ بولعانىنا تاڭ قالادى. بارلىعى جۇرەگىن قولىنا الىپ قايىستىڭ وزىنە كەلگەن كۇنى باستالعان بولاتىن.

ەش نارسەگە، ەشكىمگە الاڭداماي

ءجۇرۋشى ەدىم، كەزىكتىم ساعان قالاي؟

قالاي تاپتىڭ سەن مەنى، بۇل الەمدە

جول سىلتەگەن كىم ساعان ماعان قاراي؟

مەن جايلى ايتقان كىم ەكەن: بۇلاق پا ەكەن،

مۇڭىمدى ايتىپ كەيدە وعان جىلاپ كەتەم،

سىبىرلاعان سامال ما سايدا ءجۇر دەپ

جەتىم كوڭىل، جانى دەرت ءبىر اق بوكەن؟

ءتۇستى مە الدە كۇن كوزى جانارىڭا،

جانارىڭمەن مەن جاققا قارادى ما؟

ۇيىقتاپ جاتقان شاعىڭدا ساۋساعىممەن

ايدىڭ نۇرى شاشىڭدى تارادى ما؟

بالكىم، راسىندا قايىسقا ءلايلانى بۇلاق ايتقان شىعار. بالكىم، ايدىڭ نۇرى ءلايلانىڭ ساۋساقتارىمەن قايىستىڭ شاشىن تاراعان شىعار. قالاي بولعان كۇننىڭ وزىندە دە قايىستى ءلايلاعا قاراي سىلتەگەن قۇدايدىڭ ءوزى ەدى. قۇدايدىڭ قالاۋىمەن ءلايلا قايىستى سىناعان بولاتىن، قايىس تا قۇدايدىڭ قالاۋىمەن ءلايلانىڭ سىناعىنا تۇسكەن بولاتىن. قايتار جولدا اداسىپ، شولگە قامالعان قايىستىڭ جۇرەگىنە ءلايلا كەيپىندە ەنگەن دە وسى قۇداي- تىن.

اڭىز بويىنشا ءلايلا دا، قايىس تا وسى شولدە كوز جۇمادى. ءبىراق ءبىز بۇل جازبانى فاريزا اپامىزدىڭ ولەڭدەرى نەگىزىندە جازىپ وتىرعانىنان كەيىن، كىتاپتاعى قايىستى ءلايلاعا قايتارۋعا بولادى. ەڭ وكىنىشتىسى، قايتارماۋعا دا بولادى. سەبەبى كىتاپتا ەكەۋىن دە سۋرەتتەيتىن ولەڭ بار. ءبىرى قايىستىڭ قايدا قالعانىن ىزدەگىسى كەلسە، ءبىرى ونىمەن قاۋىشقانىن باياندايدى. شىنىمىزدى ايتساق، سوڭىنىڭ ءدال وسىلاي ەكىۇشتى اياقتالۋى جازبا باسىندا بىزگە دە بەلگىسىز ەدى. دەسە دە، «داۋا» كىتابىنداعى «اڭىزدىڭ» ەكى نۇسقاسىن دا سىزگە ۇسىنۋدى ءجون كوردىك.

قورىتىندى (1 نۇسقا)

وتىردىڭ الدىڭا الىپ - قىمسىنبادىم.

وسى ما ءسۇيۋ دەگەن تىلسىم، جالىن؟

ۇمىتتىم ءوزىمدى ءوزىم. سوڭعى كەزدە

سەن مەنىڭ ەسىمدى الىپ ءجۇرسىڭ، جانىم.

سەن بارسىڭ. باسقا ەشتەڭە كەرەك ەمەس:

تاستادىم جىردى، مۇڭدى - قۇرىسىن ءبارىن!

اپىر- اۋ، بۇل نە سەزىم ەل كەشپەگەن:

قالمادى تيتتەي سابىر، مەندە ەس دەگەن.

جەتتىڭ- اۋ كوپ اڭساتىپ… كەلمەس دەپ ەم.

ساعان ەسسىز باس ءيدىم. بەلدى بۋعام

ەش ادامعا ەشقاشان سەنبەسكە مەن.

بىرەۋلەردىڭ وتكىنشى سەزىمىنەن

تۇماندانعان كوگىلدىر ساعىمدى ىرگەم،

سودان ءمولدىر جانىما جالىن كىرگەن.

سەندە قانداي كۇش بارىن بىلە المادىم.

ايتەۋىر تابىندىم مەن.

«مەنى سىنا» دەپ جۇرەگىن ۇسىنعان قايىس سىناقتان ءوتىپ، ءوز ءلايلاسىنا وسىلايشا قاۋىشتى. ءلايلا دا وعان «جەتتىڭ- اۋ كوپ اڭساتىپ» دەپ، قايىسقا ءومىر تىزگىنىن ۇستادى. الىپ سىناقتان وتكەن قوس عاشىقتىڭ ماحابباتى ەندىگى ۋاقىتتا سىنالماق ەمەس. سەبەبى قايىس ورالا الدى، ءلايلا دا كۇتە ءبىلدى.

قورىتىندى (2 نۇسقا)

قۋانىشتى مەندەگى

سەنىڭ قايعىڭ ۋلايدى.

ەشبىر ادام جەردەگى

بىلمەيدى بۇل مۇڭ جايلى.

سۇيسە، باقىت ەمەس پە -

مەن بىرەۋگە ءتاتتىمىن.

تۇسەسىڭ دە سەن ەسكە،

ساپ بولادى شاتتىعىم.

اياز شارپىپ دەنەنى،

سۇيگەن بولام بەكەر كەپ.

سەنى ىزدەگىم كەلەدى

قاي جەردە وتىر ەكەن دەپ.

سەن جايلى ويدى جاسقادىم

قالماسىن دەپ ول ءبىلىپ،

قۇشاعىندا باسقانىڭ

سەنى ويلايمىن. سورلىلىق.

قايىس ورالمادى. ءلايلا كۇتۋدەن شارشادى.

فايزۋللا ءتولتاي

adebiportal.kz