مەملەكەت باسشىسى الەمدىك شاحمات ەليتاسىنىڭ وكىلدەرىمەن كەزدەستى

استانا. قازاقپارات - پرەزيدەنت قاسىم-جومارت توقايەۆ كلاسسيكالىق شاحمات بويىنشا الەم چەمپيونى اتاعى ءۇشىن سايىسقا تۇسكەن يان نەپومنياشي مەن ديڭ ليرىندى، سونداي-اق حالىقارالىق شاحمات فەدەراتسياسىنىڭ (ف ي د ە) پرەزيدەنتى اركادي دۆوركوۆيچتى قابىلدادى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسى قوناقتارعا ءىلتيپات بىلدىرە وتىرىپ، ف ي د ە اياسىنداعى ايگىلى سپورتشىلار قاتىسقان ەڭ بەدەلدى تۋرنيردىڭ جوعارى دەڭگەيدە ۇيىمداستىرىلعانىن اتاپ ءوتتى.

«مەن، ەڭ الدىمەن، ديڭ ليرىن مىرزانى تارتىستى وتكەن سايىستا الەم چەمپونى اتاعىن جەڭىپ الۋىمەن قۇتتىقتاعىم كەلەدى. سونداي-اق، گروسسمەيستەر يان نەپومنياشيگە كورسەتكەن شەبەرلىگى ءۇشىن قۇرمەتىمدى بىلدىرەمىن. الەمنىڭ بۇكىل شاحمات قوعامداستىعى تۋرنيرگە نازار اۋداردى. شاحمات جانكۇيەرلەرى شارشى تاقتاداعى ويىندى ءجىتى باقىلادى. تۋرنير ءساتتى ءوتتى دەپ ەسەپتەيمىن»، - دەدى پرەزيدەنت.

مەملەكەت باسشىسى قازاقستاندا شاحماتتى دامىتۋعا ايرىقشا كوڭىل بولىنەتىنىن ايتتى.

«بۇگىندە ەلىمىزدە 200 مىڭنان اسا ادام شاحماتپەن شۇعىلدانادى. قازاقستان رەسپۋبليكاسى شاحمات فەدەراتسياسىنىڭ كومەگىمەن جانە ف ي د ە-نىڭ اتسالۋىمەن بۇل كورسەتكىش كەمىندە ەكى ەسە ارتۋعا ءتيىس. قازاقستاندا شاحمات ءتيىستى دەڭگەيدە داميدى»، - دەدى قاسىم-جومارت توقايەۆ.

كەزدەسۋ سوڭىندا پرەزيدەنت شاحماتشىلاردىڭ بيىك بەلەستەردى باعىندىرۋىنا تىلەكتەستىك ءبىلدىردى. سونداي-اق، ف ي د ە-مەن اراداعى ىنتىماقتاستىقتى ودان ءارى جالعاستىرۋ ماڭىزدى ەكەنىن اتاپ ءوتتى.