پاكىستاندا «قازاقستان ءۇيى» اشىلدى

لاحور. قازاقپارات - قازاقستان ەلشىسى ەرجان قىستافين لاحور قالاسىنا جۇمىس ساپارىمەن باردى. ساپار اياسىندا پاكىستاندا العاشقى «قازاقستان ءۇيىنىڭ» سالتاناتتى اشىلۋ ءراسىمى ءوتتى، دەپ حابارلايدى قازاقپارات.

قازاقستان ءۇيىن اشۋدىڭ نەگىزگى ماقساتى - پاكىستان ازاماتتارىنا قىزمەتتەردىڭ كەڭ سپەكترىن ۇسىنۋ جانە «ءبىر تەرەزە» قاعيداتى بويىنشا كەڭەس بەرۋ. وندا قازاقستاندىق ۆيزا ماسەلەلەرى بويىنشا قولداۋ كورسەتۋ مۇمكىندىگىمەن قاتار تۋريزم، مادەنيەت، ءبىلىم بەرۋ، ساۋدا جانە ينۆەستيتسيالار سالاسىنداعى ىنتىماقتاستىقتى دامىتۋ بولىمدەرى ۇسىنىلعان.

پەندجاب پروۆينتسياسىنىڭ گۋبەرناتورى م. باليگ- ۋر- رەحمان جانە لاحور قالاسىنىڭ كوميسسارى م. ءالي راندحاۆا بارلىق قاتىسۋشىلاردى قازاقستان ءۇيىنىڭ اشىلۋىمەن قۇتتىقتاپ، بۇل قادام قازاقستان-پاكىستان قاتىناستارى تاريحىنىڭ جاڭا كەزەڭىن بەلگىلەيتىنىن اتاپ ءوتتى. ە. قىستافين قازاقستان ءۇيى ەكىجاقتى قاتىناستاردى نىعايتۋعا جانە ەكى ەل حالىقتارىن جاقىنداستىرۋعا قىزمەت ەتەتىنىنە سەنىم ءبىلدىردى.