قاسىم- جومارت توقايەۆ ەلوردادا سەنبىلىككە قاتىسىپ، جاستارمەن بىرگە اعاش وتىرعىزدى

استانا. قازاقپارات - پرەزيدەنت قاسىم- جومارت توقايەۆ ەلورداداعى جەلىلىك ساياباقتا «جاسىل استانا» ەكولوگيالىق ايلىعى اياسىندا ۇيىمداستىرىلعان قالالىق سەنبىلىككە قاتىستى، دەپ حابارلايدى قازاقپارات اقورداعا سىلتەمە جاساپ.

قاسىم- جومارت توقايەۆ ەلورداداعى جەلىلىك ساياباقتا اعاش وتىرعىزدى.

مەملەكەت باسشىسى سەنبىلىك بارىسىندا ۆولونتەرلەرمەن جانە ستۋدەنتتەرمەن اڭگىمەلەستى.

- قازاقستان - ءبىزدىڭ ورتاق ءۇيىمىز. سوندىقتان ءۇيىمىزدى تازا ۇستاۋىمىز كەرەك. اعاش وتىرعىزىپ، كوشەلەردى تازالاۋىمىز كەرەك. بۇل - ءبىزدىڭ ازاماتتىق بورىشىمىز. بىزدە باسقا ەل جوق. سوندىقتان ءبارىڭدى جاۋاپكەرشىلىگى مول ازامات بولۋعا شاقىرامىن. بارشاڭىزعا، اسىرەسە، ەرىكتىلەرگە العىس ايتامىن، - دەدى قاسىم- جومارت توقايەۆ.

سەنبىلىككە قاتىسقاندار 2 ءتۇپ قاراعاي جانە 39 ءتۇپ جوكە كوشەتىن ەكتى.

ەسكە سالا كەتەيىك، ەلوردادا 8-ساۋىردەن 6-مامىرعا دەيىن «جاسىل استانا» ءداستۇرلى ەكولوگيالىق ايلىعى ءوتىپ جاتىر.

ونىڭ اياسىندا كوممۋنالدىق جانە جالپى قالالىق بىرنەشە سەنبىلىك ۇيىمداستىرىلادى.

بۇعان دەيىن استانانىڭ سارىارقا اۋدانىندا 12,5 مىڭ تۇرعىن سەنبىلىككە شىققانىن حابارلاعان ەدىك.