قازاقستاندا العاش رەت جاڭا تۋعان نارەستەنىڭ اسقازان جولدارىنا كۇردەلى وتا جاسالدى

استانا. قازاقپارات - ەلىمىزدە العاش رەت پەدياتريا ورتالىعىنىڭ حيرۋرگتارى جاڭا تۋعان سابيگە ءبىر مەزەتتە تۋا بىتكەن بىرنەشە كيستوزدى ىسىكتى الىپ تاستاۋ بويىنشا كۇردەلى وتا جاسادى، دەپ حابارلايدى قازاقپارات ءتىلشىسى.

«پەدياتريا جانە بالالار حيرۋرگياسى عىلىمي ورتالىعىنىڭ ماماندارى تۋا بىتكەن اس قورىتۋ جۇيەسىنىڭ وتە سيرەك كەزدەسەتىن پاتولوگياسىمەن دۇنيەگە كەلگەن نارەستەگە ءبىر مەزەتتە بىرنەشە كۇردەلى وتا جاساپ، بىرنەشە كيستوزدى ىسىكتى الىپ، جاڭا تۋعان نارەستەنىڭ ءومىرىن ساقتاپ قالدى. جاڭا تۋعان سابيدە وڭەش پەن اسقازان-ىشەك جولدارىنىڭ ەكى ەسەلەنۋى وتە سيرەك كەزدەسەتىن جاعداي. وعان وتە كۇردەلى سيمۋلتاندىق (ءبىر مەزەتتە) قايتا-قالپىنا كەلتىرۋ وتاسى جاسالدى. بۇل وپەراتسيا قازاقستاندا جاڭا تۋعان شاقالاققا العاش رەت جاسالدى»، - دەلىنگەن اتالعان ورتالىقتىڭ باسپا ءسوز قىزمەتى تاراتقان مالىمەتتە.

ورتالىق مالىمەتىنشە، وڭەشتەن دامىپ قوسارلانعان ۇلكەن كيستا بۇكىل سول جاق كەۋدە قۋىسىندا ورنالاسقان. ول سول جاق وكپەنى قىسىپ، نارەستەنىڭ تۋعاننان تىنىس الۋىنا كەدەرگى جاساعان. سونداي-اق ءىش قۋىسىندا كيستوزدى ۇلكەن ىسىكتەر (تۇزىلىمدەر) بولدى. سونىڭ سالدارىنان بالانىڭ ءىشى ۇلعايىپ، ءىش قۋىسىندا قىسىمنىڭ جوعارىلاۋىن تۋدىردى. ول ءوز كەزەگىندە ىشەكتىڭ جۇمىسى مەن ءناجىستىڭ شىعۋىن بۇزدى.

دۇنيەگە كەلگەنىنە ەكى كۇن بولعان نارەستە تالعار قالاسى اۋداندىق پەرەزەنتحاناسىنان اۋىر جاعدايدا پەدياتريا جانە بالالار حيرۋرگياسى عىلىمي ورتالىعىنا جەتكىزىلدى. بالاداعى ءتۋابىتتى اقاۋ انا قۇرساعىندا ۋلترادىبىستىق زەرتتەۋ ارقىلى انىقتالعان. كومپيۋتەرلىك توموگرافيا نەگىزىندە الدىن الا قويىلعان دياگنوز: اسقازان-ىشەك جولدارىنىڭ ارالاس قوسارلانۋى، توراكوابدومينالدى ءتۇرى، وڭەشتىڭ كيستوزدى قوسارلانۋى، اش ىشەكتىڭ كيستوزدى جانە تۇتىكتى قوسارلانۋى.

«بەس كۇن ىشىندە نارەستەنىڭ جاعدايىن قالپىنا كەلتىرۋ ءىس-شارالارى جۇرگىزىلدى. بالانىڭ ومىرىنە قاۋىپ تونگەندىكتەن وپەراتسيا شۇعىل تۇردە جاسالدى. جاڭا تۋعان نارەستەگە ءبىر مەزەتتە ەكى وتا جاساۋعا تۋرا كەلدى: سول جاقتاعى توراكوتوميا، وڭەشتىڭ قوسارلانعان بولىگىن الىپ تاستاۋ جانە لاپاروتوميا، ون ەكى ەلى ىشەكتىڭ قوسارلانۋىن الۋ مەن اش ىشەكتىڭ تۇتىكتى قوسارلانعان ايماعىنىڭ رەزەكتسياسى جانە اششى ىشەكتىڭ ءبىر-بىرىنە اناستوموز ارقىلى قالىپتاستىرۋ وپەراتسياسى.

كۇردەلى وتا جالپى 4 ساعاتتان استام ۋاقىتقا سوزىلدى. وپەراتسيانى پەدياتريا جانە بالالار حيرۋرگياسى عىلىمي ورتالىعىنىڭ بىلىكتى دارىگەرلەرى، ءوز ءىسىنىڭ تاجىريبەلى ماماندارى جاسادى. اتاپ ايتقاندا، باسقارما ءتوراعاسىنىڭ كلينيكالىق قىزمەتتەر جونىندەگى ورىنباسارى، د س م- ءنىڭ شتاتتان تىس باس نەوناتالدى (نارەستەلەر) حيرۋرگى اسىلجان ەرەكەشوۆ، جاڭا تۋعان نارەستەلەرگە ارنالعان جان ساقتاۋ ءبولىمىنىڭ مەڭگەرۋشىسى نۇرسۇلتان قۇربانبەكوۆ، نارەستەلەر حيرۋرگى گۇلميرا كاۋكەنبايەۆا قولدارىنان كەلگەن بار مۇمكىندىكتى جاساپ، كىشكەنتاي نارەستەنى اجال اۋزىنان الىپ قالدى. وتادان كەيىنگى 17-كۇنى دانيال ەسىمدى كىشكەنتاي پاتسيەنتىمىز ۇيىنە امان-ەسەن شىعارىلدى»، - دەپ اتاپ وتەدى ورتالىقتان.