تاقتاتاس مۇنايىن ءوندىرۋ جولدارى تالقىلاندى

شىمكەنت. قازاقپارات - ەلىمىزدە الداعى ءۇش جىلدا ۇلكەن تەرەڭدىكتەن الىناتىن تاقتاتاس مۇنايىن ءوندىرۋ ءۇشىن جاڭا كەن ورىندارى اشىلادى.

بۇل تۋرالى شىمكەنتتەگى عىلىمي-تاجىريبەلىك كونفەرەنسيادا ايتىلدى، دەپ حابارلايدى قازاقپارات.

باس قوسۋدا ماماندار مۇناي وندىرۋدە ءداستۇرلى ءادىس-تاسىلدەردەن قيىن قورلاردى يگەرۋگە اۋىسۋ قاجەتتىگىن اتاپ ءوتتى.

«ساۋتس-ويل» كومپانياسىنىڭ ۇسىنىسىمەن مۇنايدى جاڭادان ءارى قيىن تاسىلدەرمەن ىزدەستىرۋ جونىندە زاڭ قابىلداندى. كونفەرەنتسيادا وسى ماسەلەگە قاتىستى رەسەي، ا ق ش، قىتايدىڭ جەتەكشى ماماندارى پىكىر ءبىلدىرىپ، ۇسىنىستارىن ورتاعا سالدى. ەلىمىزدە جاڭادان ۇلكەن كەن ورىندارىن اشۋىمىز كەرەك. ءبىزدىڭ ەلدە مۇنداي مۇناي ءالى وندىرىلگەن جوق. ءبىراق، مۇناي بار ەكەنى عىلىمي تۇرعىدا دالەلدەنگەن»، - دەدى ق ر مۇنايشى-گەولوگتەر قوعامىنىڭ پرەزيدەنتى بالتابەك قۋاندىقوۆ.

«ساۋتس-ويل» قارا التىن وندىرۋدە جەتەكشى وندىققا كىرەتىن ىرگەلى كاسىپورىن سانالادى. 20 جىلدىق تاجىريبەسى بار كومپانيا وسى كۇنگە دەيىن 10 ميلليون توننا مۇناي، 750 ميلليون تەكشە مەتر گاز وندىرگەن. قازىناعا 227 ميلليارد تەڭگەدەن استام سالىق تولەدى. كومپانيا جۇمىس ىستەگەن كەزەڭىندە كەڭلىك، وڭتۇستىك-باتىس قارابۇلاق، شىعىس اقشابۇلاق، اقتاۋ، ەسجان جانە ت. ب. 10 مۇناي-گاز كەن ورنى اشىلدى. جيىندا كاسىپورىننىڭ جاڭا جوبالارى دا كەڭىنەن تانىستىرىلدى.

«بۇگىنگى القالى جيىننىڭ ماڭىزى وتە زور. ويتكەنى، ۇلكەن جوبالارعا عىلىمي شەشىمدەر قابىلدانىپ، سونى ىسكە اسىرۋعا باعدارلاما بەرىلەدى. ءسويتىپ، ول زاڭداستىرىلادى. ونىڭ ىشىندە ەڭ كەرەگى ەكولوگيا تۋرالى جوبالار بولادى. وڭتۇستىك تورعاي باسسەينىنەن وندىرىلگەن تاقتاتاس مۇنايىنىڭ العاشقى قورى مەملەكەتكە وتكىزىلدى. ەندى كومپانيا الداعى ءۇش جىلدا 15 ۇڭعىما قازىپ، 9 مىڭعا جۋىق ادامدى تۇراقتى جۇمىسقا تارتپاق»، - دەدى «ساۋتس-ويل» كومپانياسىنىڭ پرەزيدەنتى سەرىكجان سەيىتجانوۆ.

شەتەلدىكتەردىڭ قاتىسۋىنسىز اشىلعان كومپانيا ءبىرقاتار ءوڭىر ەكونوميكاسىنىڭ دامۋىنا زور ىقپال ەتەتىن اۋقىمدى جوبالاردى ىسكە قوستى.

«ساۋتس-ويل» كەن يگەرەتىن وپەراتوردان ەلدە جانە شەتەلدە تانىمال ءىرى جەكە كومپانياعا اينالدى. سەرىكتەستىك 20 جىل بويى قالالار مەن اۋىلداردىڭ ءومىرىن جاقسارتۋعا باعىتتالعان الەۋمەتتىك ينۆەستيتسيالىق جوبالاردى جۇزەگە اسىرىپ كەلەدى. كومپانيا جىل سايىن ءوندىرىس شىعىندارىنىڭ %3 الەۋمەتتىك سالاعا باعىتتايدى. بۇگىندە كومپانيا ءداستۇرلى ەمەس كومىرسۋتەكتىڭ العاشقى كولەمىن ءوندىردى»، - دەدى «ساۋتس-ويل» ۆيتسە-پرەزيدەنتى شايحان مۇحامەتراحيموۆ.

بيىل ق ر پايدالى قازبا قورلارى جونىندەگى مەملەكەتتىك كوميسسيادا «ساۋتس-ويل» قاراعانساي ۋچاسكەسىنىڭ تاقتاتاس مۇناي قورلارىن ەسەپتەۋ ەسەبىن قورعادى. وسىلايشا، وتاندىق تاريحتا ءداستۇرلى ەمەس كومىرسۋتەكتەردى بارلاۋ جانە وندىرۋگە العاشقى جانە ماڭىزدى قادام جاسالدى.