استانادا ءداستۇرلى قارۋ-جاراق تاريحىن زەرتتەيتىن جالعىز ماماننىڭ كورمەسى ءوتىپ جاتىر
قاليوللا احمەتجان - سۋرەتشى جانە ەلىمىزدەگى قازاقتىڭ ءداستۇرلى قارۋ-جاراق تاريحىن زەرتتەيتىن جالعىز بىلىكتى مامان. ول كوركەم شىعارماشىلىقپەن قاتار، عالىم رەتىندە 45 جىلدان استام ۋاقىت قازاقتىڭ ءداستۇرلى قارۋ-جاراقتارىن، قازاقستانداعى كوشپەلى حالىقتاردىڭ قارۋ-جاراعىن زەرتتەپ كەلەدى. بۇل تاقىرىپتا ونىڭ 120 دان استام ماقالاسى مەن 6 مونوگرافياسى جارىق كورگەن.
«قازاق دالاسىن بابالارىمىز بىلەكتىڭ كۇشىمەن، نايزانىڭ ۇشىمەن ساقتاعان. وسىنداي ءور رۋحتى ازاماتتاردىڭ ۇلكەن ءبىر باعىتى - قارۋ-جاراق. سانالى عۇمىرىن قازاقتىڭ قارۋ-جاراعىنا ارناعان اعامىزدىڭ بۇگىنگى كورمەسىنە قوش كەلدىڭىزدەر. بۇل كورمە ناعىز قازاقتىڭ تاريحىمەن، قازاقتىڭ جانىمەن بىتە قايناسقان، سوناۋ بابالارىمىزدىڭ باي رۋحاني كەڭىستىگىن، دالا تاريحىن اسپەتتەيتىن ورىن دەپ بىلەمىن»، - دەدى مادەنيەت جانە سپورت ميينسترلىگى مادەنيەت كوميتەتى ءتوراعاسىنىڭ ورىنباسارى دانيار اليەۆ كورمەنىڭ اشىلۋىندا.
ق. احمەتجان ءار داۋىردەگى كوشپەلى جاۋىنگەرلەردىڭ قارۋ-جاراق جيىنتىعىنىڭ كوپتەگەن عىلىمي-گرافيكالىق رەكونسترۋكسيالارىن جاسادى، سول ءۇشىن ەلىمىزدەگى جانە شەتەلدەگى عىلىمي قوعامداستىقتىڭ جوعارى باعاسىنا يە بولدى.
«وسى سالانى زەرتتەپ جۇرگەنىمە 45 جىلدان استى. ەڭ الدىمەن، عىلىمي ماقالالار جازدىم، مۋزەيلەردە، كىتاپحانالاردا وتىردىم، جازبا دەرەكتەردى اقتاردىم. اۋىز ادەبيەتتى، بەينەلەۋ ەسكەرتكىشتەرىن زەرتتەدىم، سونىڭ نەگىزىندە ماقالالار مەن كىتاپتار شىعاردىم. سودان كەيىن قارۋلاردى سۋرەتپەن بەينەلەدىم. وقىرمان نەمەسە كورەرمەن كىتاپتاردى وقىعاندا كەي نارسەنى تۇسىنبەي قالۋى مۇمكىن، ءوز مادەنيەتىمىزدە دە ۇمىتىلعان زاتتار بار. سوندىقتان، زاتتىق بەينە - سول زامانداعى زاتتار قولدانىسىن وتە ءدال كورنەكتى تۇردە كورسەتە الادى»، - دەدى قاليوللا احمەتجان.
كورمەدە ءبىر كەزدەرى قازاقتىڭ اتاقتى باتىرلارى ۇستاعان، ولاردىڭ ۇرپاقتارى مەن مۋزەيلەر كوللەكتسيالارىندا ساقتالعان ەسكەرتكىش بۇيىمداردىڭ قالپىنا كەلتىرىلگەن كوشىرمەلەرى دە بار.
«بۇل جاسالعان زاتتاردىڭ ىشىندە قازاقتىڭ اتاقتى باتىرلارى ۇستاعان زاتتار بار. بوگەنباي باتىردىڭ دۋلىعاسى، قابانباي باتىردىڭ شارايناسى مەن پىشاعى، جانقوجا باتىردىڭ سەلەبەسى سىندى كيەلى مۇراعا اينالعان مەموريالدى زاتتار. ولاردىڭ العاشقى قالپىن جاساپ، جاڭعىرتىپ ۇسىنىپ وتىرمىز»، - دەدى اۆتور.
سونىمەن بىرگە، كورمەدە قازاق جاۋىنگەرلەرىنىڭ شابۋىل قارۋلارىنىڭ جانە قورعانىس جاراقتارىنىڭ تۇرلەرى مەن تيپتەرىنىڭ رەكونسترۋكتسيالارى: اتۋ جانە سۋىق قارۋلار جانە ولاردىڭ جابدىقتارى، جاۋىنگەرلىك باس كيىمدەرى، ساۋىت-سايماندارى كورسەتىلەدى.
كورمەنى 12- ماۋسىمعا دەيىن تاماشالاۋعا مۇمكىندىك بار.
