بيىل تۇركىستاننان ءابۋ-دابيگە تىكەلەي اۋە رەيسى اشىلادى

تۇركىستان. قازاقپارات - بيىل تۇركىستان قالاسىنان بىرىككەن اراب امىرلىكتەرىنىڭ استاناسى ءابۋ-دابيگە تىكەلەي اۋە رەيسىن اشۋ جوسپارلانىپ وتىر. بۇل تۋرالى تۇركىستان وڭىرلىك كوممۋنيكاتسيالار قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.

«Wizz Air» اۆياكومپانياسى «تۇركىستان - ءابۋ-دابي (ب ا ءا)» اۋە باعىتى بويىنشا رەيستەردى 2023-جىلدىڭ قازان ايىنان باستاۋدى جوسپارلاپ وتىر. رەيستەر اپتاسىنا 2 رەتتىك جيىلىكپەن ورىندالادى. حالىق زاماناۋي ا-321 ۇشاقتارىمەن قاتىنايدى.

بۇگىن اتالعان جوبا جان-جاقتى تالقىلانىپ، پىسىقتالدى. جيىنعا تۇركىستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ، وبلىستىق مادەنيەت جانە تۋريزم باسقارماسىنىڭ جانە تۇركىستان حالىقارالىق اۋەجايى مەن ەۋروپالىق لوۋكوستەر «Wizz Air» اۆياكومپانياسىنىڭ وكىلدەرى قاتىستى.

كەزدەسۋدەن سوڭ «Wizz Air» اۆياكومپانياسىنىڭ وكىلدەرىنە تۇركىستان قالاسىنىڭ تۋريستىك نىساندارىنا تۋر ۇيىمداستىرىلىپ، تۇركىستان حالىقارالىق اۋەجايى جانە ونداعى ارنايى تەحنيكالار تانىستىرىلدى.