قازاقستاندىق پارادزيۋدوشى ەرعالي شامەي ازيا چەمپيونى بولدى

استانا. قازاقپارات - قازاقستاندىق ەرعالي شامەي پارادزيۋدودان ازيا چەمپيونى اتاندى. قازاقپارات بۇل تۋرالى ەلىمىزدىڭ پارادزيۋدو فەدەراتسياسىنا سىلتەمە جاساپ حابارلايدى.

J1 (كوزى مۇلدەم كورمەيتىن سپورتشىلار) ساناتىنىڭ فينالىندا 73 كەلىگە دەيىنگى سالماقتاعى ە. شامەي وزبەكستاندىق شوحرۋح مامەدوۆتى جەڭدى.

ال قولا جۇلدەنى يراندىق ماحدي بورچلوۋ مەن قىرعىزستاندىق ماماتيبرايم سۋرانوۆ جەڭىپ الدى.

ايتا كەتەيىك، بۇل استانادا ءوتىپ جاتقان ازيا چەمپيوناتىندا قازاقستان قورجىنىنا تۇسكەن ءۇشىنشى مەدال. بۇعان دەيىن ايەلدەر اراسىندا دايانا فەدوسوۆا (J2-57 ك گ) - «التىن»، اقمارال ناۋاتبەك (J2-52 ك گ) «كۇمىس» العان بولاتىن.

پارادزيۋدودان ازيا تۋرنيرى جاقسىلىق ۇشكەمپىروۆ اتىنداعى جەكپە-جەك سارايىندا ءوتىپ جاتىر. جارىس 30- ساۋىرگە دەيىن جالعاسادى.