الماتىدا جاستاردىڭ توبەلەسى جەلىدە تارادى

الماتى. قازاقپارات- الماتىدا جاستاردىڭ جاپپاي توبەلەسىنەن كەيىن پوليتسيا تەرگەۋ جۇمىستارىن جۇرگىزىپ جاتىر، دەپ حابارلايدى قازاقپارات ءتىلشىسى.

الەۋمەتتىك جەلىدە قالادا توبەلەس ۇيىمداستىرعان جاستاردىڭ ۆيدەوسى تاراپ كەتتى.

بەينەجازبادان بىرنەشە جىگىتتىڭ ءبىر جاس جىگىتتى قالاي ۇرىپ-سوققانىن كورۋگە بولادى.

الماتى قالالىق پوليتسيا دەپارتامەنتىنىڭ مالىمەتىنشە، 28-ساۋىرگە قاراعان ءتۇنى «102» كەزەكشى پۋلتىنە روزىباكييەۆ پەن ەسقارايەۆ كوشەلەرىنىڭ قيىلىسىندا توبەلەس بولىپ جاتقانى تۋرالى شاعىم تۇسكەن.

«جەدەل باسقارۋ ورتالىعىنىڭ قىزمەتكەرلەرى وقيعا ورنىنا پوليتسيانىڭ پاترۋلدىك ەكيپاجدارىن جىبەرىپ، قۇقىقبۇزۋشىلىقتى توقتاتىپ، توبەلەسكە قاتىسۋشىلاردى ۇستاپ، بوستاندىق اۋداندىق پوليتسيا باسقارماسىنا جەتكىزدى. قازىرگى ۋاقىتتا ق ر ق ك-نىڭ 293-بابى 2-بولىگى بويىنشا سوتقا دەيىنگى تەرگەۋ امالدارى باستالدى»، - دەپ حابارلادى ۆەدومستۆودان.

توبەلەسكە قاتىسى بارلاردىڭ ءارقايسىسىنىڭ ارەكەتىنە قۇقىقتىق باعا بەرىلەتىن بولادى.