قازاقستاندىقتار وڭتۇستىك كورەيادا زاڭدى تۇردە جۇمىس ىستەۋى مۇمكىن
ەلىمىزدىڭ دەلەگاتسياسىن كونسۋلدىق قىزمەت دەپارتامەنتىنىڭ ديرەكتورى باۋىرجان اقاتايەۆ باسقاردى.
وڭتۇستىك كورەيانىڭ سىرتقى ىستەر مينيسترلىگى جۇمىس ىستەۋگە رۇقسات بەرۋ جۇيەسى اياسىندا قازاقستاندىق جۇمىسشىلارعا كۆوتا بەرۋ ماسەلەسىن قاراستىرۋعا دايىن. بۇل تۋرالى كورەيا مەن قازاقستاننىڭ كونسۋلدىق قىزمەتتەرىنىڭ باسشىلارى كيم مين چول مەن باۋىرجان اقاتايەۆتىڭ كەلىسسوزىندە بەلگىلى بولدى. 7 كونسۋلدىق كونسۋلتاتسيالارعا ءبىزدىڭ ديپلوماتتار مەن بىرگە ەلىمىزدىڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلى قاتىستى.
جۇمىسپەن قامتۋعا رۇقسات بەرۋ جۇيەسىنە سايكەس تاڭعى سامال ەلىندە 16 مەملەكەتتەن كەلگەن ميگرانت جۇمىس ىستەيدى. قازاقستان 17- ەل بولۋى مۇمكىن. قازاقستاندىقتاردى كورەي زاۋىتتارىنا زاڭدى جۇمىسقا ورنالاستىرۋ ماسەلەسىن قاراستىرۋ وتىنىشىمەن ديپلوماتتارىمىز بىرنەشە جىل بۇرىن كورەي ارىپتەستەرىنە جۇگىنگەن بولاتىن. ال بۇگىن وڭ جاۋاپ كەلدى.
سونداي- اق قازاقستاندىق كونسۋلدىق قىزمەت وكىلدەرى ازاماتتارىمىزعا كورەياعا كىرۋ رۇقساتىن نەمەسە K-ETA الۋ قاجەتىن جويۋعا سۇرادى. ويتكەنى بۇل ەلگە شىنىمەن تۋريست رەتىندە نەمەسە مەديتسينالىق تەكسەرىستەن وتكىسى كەلەتىن كوپتەگەن قازاقستان ازاماتتارى كورەيانىڭ ادىلەت مينيسترلىگىنىڭ رۇقساتىن الا الماي ءجۇر. وڭتۇستىك كورەيانىڭ سىرتقى ىستەر مينيسترلىگى بۇل ماسەلەنى قازاقستاندىق زاڭسىز ميگرانتتار اعىنى ازايعان جاعدايدا عانا شەشۋگە كەلىستى. رۇقساتسىز جۇمىس ىستەيتىن ازاماتتار سانىن ازايتۋ ءۇشىن كورەيانىڭ ادىلەت جانە ەڭبەك مينيسترلىكتەرى شەتەلدىكتەردى ءتيىستى قۇجاتسىز جۇمىسقا العان جۇمىس بەرۋشىلەرگە جازانى قاتايتپاقشى.
ايتا كەتەيىن، وسى ەلدە 400 مىڭنان استام زاڭسىز ەڭبەك ميگرانتىنىڭ % 2,7- ءى عانا - قازاقستاندىقتار. سونداي- اق كەلىسسوزدە وتكەن ايدىڭ سوڭىندا ينچون اۋەجايىنان قاشىپ كەتكەن تۇركىستان وبلىسىنىڭ 2 تۇرعىنىنىڭ تاعدىرى قارالدى. قازاقستاندىق تاراپ بۇل ءىستىڭ ءمان- جايىن وبەكتيۆتى جانە جەدەل قاراۋدى سۇرادى.
