قازاقستاندا ءبىر عانا ۇلت بار ەكەنى انىق ماسەلە - تالعات قاليەۆ
«ۇلت قۇرۋ دەگەنگە يننوۆاتسيا سياقتى قاراۋدىڭ قاجەتى جوق. ۇلت قالىپتاستىرۋ - مەملەكەت قۇرىلىسىنىڭ اجىراماس بولشەگى. وسىدان 32 جىل بۇرىن باستالعان ۇدەرىس ءالى جالعاسىپ كەلەدى. ءبىرتۇتاس ازاماتتىق ۇلتتى قالىپتاستىرۋ ءىسىن قۇردىمعا كەتىرىپ العان ەلدەر دە بار. ازاماتتىق ۇلت توپتاستىرا بىلگەننىڭ ارقاسىندا قۋاتتى سەرپىلىس جاساپ، جاڭعىرعان ەلدەر دە بار»، - دەپ جازدى ساياساتتانۋشى.
سونداي-اق ول قازاقستان وكىلدەرى بىرىككەن ۇلتتار ۇيىمىنىڭ مىنبەرىندە جالعىز تۇتاس ۇلتتىڭ اتىنان ءۇن قوسىپ، شەشىم قابىلدايتىنىن ەسكە سالدى.
«قازىر «ۇلت» دەگەن ۇعىم قاي ەلدىڭ ازاماتى ەكەنىڭدى بىلدىرەدى جانە ساياسي كونتەكستە «ەتنوس» دەگەن مانگە يە.
ءبىر ۇعىمدى بۇلايشا ەكىۇداي تاپسىرلەۋ سوۆەت زامانىنىڭ پارتيا اپپاراتىنان قالعان. ول كەزدە ۇلت ۇعىمى يمپەرياليستىك جانە فەدەرالدىق تۇرعىدان قارالدى. رەسەيدە ۇلتتىق رەسپۋبليكالار ءالى دە بار. ال ۋنيتارلى قازاقستاندا ءبىر عانا ۇلت بار ەكەنى انىق ماسەلە جانە ونىڭ ەتنيكالىق قۇرىلىمىنا ۇلت پريزماسى ارقىلى قاراۋ ادىستەمە تۇرعىسىنان قاتە.
ال مەملەكەت قۇرىلىسىنىڭ ءتۇرلى كەزەڭىندە ەتنوساياسات ءتۇرلى فۋنكسيا اتقارعانى ءوز الدىنا بولەك ماسەلە. تاۋەلسىزدىكتىڭ العاشقى جىلدارىندا قازاقستان حالقى اسسامبلەياسى كيكىلجىڭدەردىڭ الدىن الۋ قۇرالى بولدى. ال ەكى مىڭىنشى جىلداردا ەتنيكالىق توپتاردىڭ وكىلدەرى ساحناعا شىقتى. ەندىگى جول - بۇكىل ەتنوستاردىڭ ءبىر الەۋمەتكە، قاعيداسى ورتاق تۇتاس ۇلت رەتىندە تىعىز ينتەگراتسيالانۋ تەتىگى»، - دەيدى تالعات قاليەۆ.
