باۋىرلاس ەلدەرمەن بولاشاعىمىزدى بولە-جارا قارامايمىز - پرەزيدەنت

استانا. قازاقپارات - قازاقستاننىڭ باسقا ەلدەرمەن قارىم-قاتىناسى بىرلىك پەن تاتۋلىققا نەگىزدەلۋى كەرەك.

بۇل تۋرالى قازاقستان حالقى اسسامبلەياسىنىڭ ХХХІІ سەسسياسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«قازاقستاننىڭ باسقا ەلدەرمەن قارىم-قاتىناسى دا بىرلىككە، تاتۋلىققا جانە ءوزارا تىلەكتەستىككە نەگىزدەلۋى كەرەك. اسىرەسە كورشىلەس، باۋىرلاس ەلدەرمەن بولاشاعىمىزدى بولە-جارا قارامايمىز. جاقىندا قىرعىز پرەزيدەنتى سادىر جاپاروۆ الەۋمەتتىك جەلىدە قازاق پەن قىرعىزدىڭ دوستىعى تۋرالى لەبىزىن ءبىلدىردى. شىن مانىندە، ءبىز تامىرلاس، تاعدىرلاس، ءبىر تۋعان جۇرتپىز. قيىندىقتى بىرگە ەڭسەرىپ، قۋانىشتى بىرگە ءبولىسىپ، قيلى زاماننىڭ بارىنەن ءوتىپ كەلەمىز»، - دەدى قاسىم-جومارت توقايەۆ.

مەملەكەت باسشىسى ۇلى ابايدىڭ «ەش قازاق قىرعىز بەن قازاقتىڭ ءبىر تۇقىمداس ەكەنىنە تالاسپايدى» دەگەن ءسوزىن مىسالعا كەلتىرىپ ءوتتى.

«مۇحتار اۋەزوۆ «ماناس» جىرىن يدەولوگيالىق تۇرعىدان قۇتقارۋعا ەرەكشە ەڭبەك سىڭىرگەن. مولداقىلىش پەن شىڭعىس ايتماتوۆقا ءوز باۋىرىنداي اراشا تۇسكەن. بۇل ەكى ەلدىڭ ەرەكشە جاقىندىعىن جانە جاناشىرلىعىن ايقىن كورسەتەدى. شىڭعىس ايتماتوۆ شىعارمالارىنداعى وقيعالار جانە كەيىپكەرلەر قازاق جەرىمەن تىعىس بايلانىستى. الاتاۋدىڭ بوكتەرىن قاتار جايلاعان ەگىز حالىق بولاشاققا بىرگە قادام باسا بەرەدى. مەن بۇعان كامىل سەنەمىن. ءبىز باسقا دا باۋىرلاس ەلدەرمەن، كورشى مەملەكەتتەرمەن قارىم-قاتىناستى وسىنداي دەڭگەيدە جالعاستىرۋىمىز كەرەك»، - دەدى پرەزيدەنت.