پرەزيدەنت ق ح ا- نىڭ نەگىزگى مىندەتتەرىن اتادى
بۇل تۋرالى بۇگىن ەلوردادا قازاقستان حالقى اسسامبلەياسىنىڭ سەسسياسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«اسسامبلەيانىڭ قىزمەتىن بىرتىندەپ ۇلتتىڭ ىقپالداستىق الەۋەتىن كۇشەيتۋگە باعىتتاۋ كەرەك. سونداي-اق اسسامبلەيا ەتنومادەني جانە باسقا دا قوعامدىق بىرلەستىكتەردىڭ قىزمەتىنە تىڭ سەرپىن بەرۋ ماسەلەسىنە ايرىقشا نازار اۋدارۋى قاجەت. ولار ەتنوسارالىق كوممۋنيكاتسيانىڭ ءتيىمدى جولدارىن قالىپتاستىرۋعا ءتيىس»، - دەدى قاسىم-جومارت توقايەۆ.
بۇل تۇرعىدا مەملەكەت باسشىسى ۇكىمەتكە ءتيىستى تاپسىرما بەردى.
«ءتۇرلى ەتنوستاردىڭ مادەنيەت قايراتكەرلەرى اراسىندا قوعامدىق ديالوگتىڭ بولۋى وتە ماڭىزدى. جۇمىس ءتاسىلى قازىرگى زامانعا ساي بولعانى ءجون. ۇكىمەت وسى ايتىلعان ماسەلەلەرگە نازار اۋدارۋى كەرەك»، - دەدى پرەزيدەنت.
بۇدان بۇرىن حابارلانعانداي، بۇگىنگى سەسسيا بارىسىندا پرەزيدەنت ق ح ا- نىڭ جاڭا سىيلىقتارى مەن وردەنىن بەكىتۋدى ۇسىندى.
سونىمەن قاتار مەملەكەت باسشىسى ەلىمىزدەگى رەفورمالار مەملەكەتتىلىكتى نىعايتۋعا، ازاماتتاردىڭ ءال-اۋقاتىن قامتاماسىز ەتۋگە باعىتتالعانىن ايتتى.
پرەزيدەنت تاتۋلىق پەن كەلىسىم حالقىمىزدىڭ ءومىر سالتىنا اينالۋى ءتيىس ەكەنىن اتاپ ءوتتى.
