مەملەكەت باسشىسى: تاۋەلسىزدىك پەن اۋماقتىق تۇتاستىعىمىز بارىنەن قىمبات
«ءبىز «بىرلىك پەن تۇراقتىلىق بولماسا، ساياسي- ەكونوميكالىق رەفورمالار جۇزەگە اسپايدى» دەيمىز. ارينە، بۇل - دۇرىس پايىم. ءبىراق بىرلىك دەگەنىمىز ماقساتىمىزعا اپاراتىن جول عانا ەمەس. بۇل - مەملەكەتتىلىگىمىزدىڭ ەڭ باستى تىرەگىنىڭ ءبىرى.
مەن بۇعان دەيىن دە ايتتىم: ەلىمىزدىڭ تاۋەلسىزدىگى جانە اۋماقتىق تۇتاستىعى بارىنەن قىمبات. ەل بىرلىگى وسى مىزعىماس قۇندىلىقتارمەن قاتار تۇرۋعا ءتيىس. سوندا عانا بولاشاعىمىز باياندى بولادى. تاتۋلىق پەن كەلىسىم تەك مەملەكەتتىك ساياساتتا ەمەس، قوعامدا، ۇيدە، ۇجىمدا، جالپى، بارلىق جەردە دارىپتەلۋى قاجەت»، - دەدى قاسىم- جومارت توقايەۆ.
مەملەكەت باسشىسىنىڭ ايتۋنىشا، بۇل جالاڭ ۇران ەمەس، ءار ازاماتتىڭ كۇندەلىكتى ۇستانىمى بولۋى كەرەك.
«حالقىمىز بىرلىكتىڭ جانە تىنىشتىقتىڭ قادىرىن بىلەدى. بۇل - نەبىر قيىن- قىستاۋ زاماندى وتكەرگەن، قازاق جەرىنەن پانا تاپقان بارشا ەتنوستار ءۇشىن دە قىمبات قۇندىلىقتار. وسى قۇندىلىقتاردى باعالاي بىلگەننىڭ ارقاسىندا جۇرتىمىز بەيبىت ءومىر ءسۇرىپ جاتىر. بۇل - تەڭدەسسىز جەتىستىك!»، - دەدى پرەزيدەنت.
«مەن بىلتىرعى سەسسيادا اتا زاڭىمىزعا رەفەرەندۋم ارقىلى وزگەرىس ەنگىزۋ تۋرالى باستاما كوتەردىم. كوپ ۇزاماي حالقىمىز ءوزىنىڭ تاريحي تاڭداۋىن جاسادى. كونستيتۋتسياعا ەنگىزىلەتىن وزگەرىستەردى قولداپ داۋىس بەردى. بۇل - اتا زاڭىمىز قابىلدانعاننان كەيىنگى العاشقى رەفەرەندۋم. ءبىز وسى باستاما كوتەرىلگەن كەزدە ەل تاعدىرىن ايقىندايتىن ماڭىزدى جولدىڭ باستاۋىندا تۇردىق. ماقساتىمىزدى ايقىنداپ، ناقتى جوسپار قۇردىق»، - دەدى پرەزيدەنت.
مەملەكەت باسشىسى ءدال وسىنداي تاريحي ساتتە حالىقتىڭ ءبىر اۋىزدان قولداۋ ءبىلدىرۋى وتە ماڭىزدى بولعانىن اتاپ ءوتتى.
«ءتۇرلى ۇسىنىس ايتىلدى. وزگەرىستى پارلامەنت ارقىلى جاساۋ قاجەت دەگەن پىكىرلەر دە بولدى. ءبىراق ءبىز ءاربىر ازاماتتىڭ پىكىرىن بىلگەن ءجون دەپ شەشتىك. مەملەكەتتىك بيلىكتىڭ بىردەن ءبىر باستاۋى حالىق دەگەن قاعيداتتى ۇستاندىق. وسىلايشا كەلىسىپ پىشكەن تون كەلتە بولمايتىنىنا بۇكىل ەل بولىپ كوز جەتكىزدىك. ءبىر جىلدىڭ ىشىندە اتقارىلعان جۇمىسقا زەر سالساق، بىلتىرعى رەفەرەندۋمنىڭ ماڭىزى زور ەكەنىن تۇسىنەمىز. بۇل ادىلەتتى قازاقستاندى قۇرۋ ىسىنە بۇكىل حالىقتى جۇمىلدىرعان ناۋقان بولدى. جۇرتىمىز جاۋاپتى ساتتە ۇلت رەتىندە ۇيىسا الاتىنىن كورسەتتى. رەفەرەندۋمنىڭ تۇپكى ناتيجەسى جانە حالقىمىزدىڭ باستى جەتىستىگى وسى»، - دەدى قاسىم- جومارت توقايەۆ.
