پرەزيدەنت: ەتنوسارالىق قاتىناسقا قاتىستى كەز كەلگەن ارانداتۋدىڭ جولىن كەسەمىز
بۇل تۋرالى قازاقستان حالقى اسسامبلەياسىنىڭ XXXII سەسسياسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«اسسامبلەيانىڭ ساياسي پارتيالارمەن جانە مەملەكەتتىك ورگاندارمەن ءوزارا قارىم- قاتىناسىن كۇشەيتۋ كەرەك. بۇل جۇمىستى ورتالىقتا جانە ايماقتاردا جۇرگىزگەن ءجون. ءبىز اۋقىمدى ساياسي رەفورمالاردىڭ ناتيجەسىندە شىنايى پىكىر الۋاندىعىنا قول جەتكىزدىك. ارينە، ءار ساياساتكەردىڭ ءوز پىكىرى بولۋى ورىندى. ەلىمىزدى دامىتۋ، كۇندەلىكتى ماسەلەلەردى شەشۋ تۋرالى كوزقاراستار ۇنەمى بىردەي بولا بەرمەيدى. بۇل - تۇسىنىكتى»، - دەدى مەمدەكەت باسشىسى.
پرەزيدەنت الايدا ەل بىرلىگىن ساقتاۋعا كەلگەندە جۇدىرىقتاي جۇمىلا ءبىلۋىمىز كەرەكتىگىن باسا ايتتى.
«ەتنوسارالىق كەلىسىم ساياساتىندا ءسوز بەن ءىس ءبىر جەردەن شىعۋعا ءتيىس. اسسامبلەيا ساياسي پارتيالارمەن اقىلداسىپ، كەڭەسىپ وتىرۋى قاجەت. سوندا بىرلىگىمىزدى نىعايتامىز. ەتنوسارالىق قاتىناسقا قاتىستى كەز كەلگەن ارانداتۋدىڭ جولىن كەسەمىز»، - دەدى قاسىم-جومارت توقايەۆ.
