ازاماتتارىمىزدى شىققان تەگىنە قاراماستان شەتەلدە قازاقتار دەپ اتايدى - توقايەۆ

استانا. قازاقپارات - ەلىمىزدە ءتۇرلى مادەنيەت داستۇرلەرى جالپى ۇلتتىق بىرەگەيلىكتىڭ بەرىك ىرگەتاسى بولىپ قالاناتىن وزىمىزگە ءتان ايرىقشا ءومىر ءسۇرۋ سالتى قالىپتاستى.

بۇل تۋرالى قازاقستان حالقى اسسامبلەياسىنىڭ ХХХІІ سەسسياسىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.

«داڭقتى وتانداستارىمىزدى، سپورتشىلارىمىزدى، مادەنيەت قايراتكەرلەرىمىزدى، عالىمدارىمىز بەن ستۋدەنتتەرىمىزدى، كاسىپكەرلەرىمىزدى شىققان تەگىنە قاراماستان، شەتەلدە ۇنەمى قازاقتار دەپ اتايدى. بۇل - تابيعي قۇبىلىس. سولاي بولۋعا ءتيىس. ءبىزدىڭ قوعام - ورتاق يدەالدار مەن قۇندىلىقتار بىرىكتىرگەن ەركىن ءارى جاۋاپكەرشىلىگى مول ازاماتتاردىڭ وداعى. بۇل – جالپى ۇلتتىق بىرەگەيلىگىمىزدىڭ تاعى ءبىر جارقىن كورىنىسى»، - دەدى مەملەكەت باسشىسى.

پرەزيدەنت سوندىقتان بۇگىندە ازاماتتارىمىزدىڭ بارلىعى وزدەرىن ۇلكەن ءارى ءبىرتۇتاس قازاق وتباسىنىڭ، شىن مانىندە، قازاق ۇلتىنىڭ مۇشەسى سەزىنەتىنىن باسا ايتتى.

«ءبىز ءبارىمىز - ءبىر وتباسىمىز. بۇل - ارتىق ايتقاندىق ەمەس. بۇل - ءبىزدىڭ شىنايى بولمىسىمىز. وسى رەتتە ءبىز ماقتانىش ەتەتىن ەتنومادەني ءارالۋاندىعىمىز ەشقايدا جوعالىپ كەتپەيدى. كەرىسىنشە، ءبىرتۇتاس ازاماتتىق نەگىز ەسەبىنەن نىعايا تۇسەدى. ەلىمىزدە ءتۇرلى مادەنيەت داستۇرلەرى جالپىۇلتتىق بىرەگەيلىكتىڭ بەرىك ىرگەتاسى بولىپ قالاناتىن وزىمىزگە ءتان ايرىقشا ءومىر ءسۇرۋ سالتى قالىپتاستى. وسىناۋ ەرەكشە بىرەگەيلىگىمىز ۋاقىت تەزىنە توتەپ بەرىپ، قوعامدىق سانانىڭ وزەگىنە اينالدى»، - دەدى قاسىم- جومارت توقايەۆ.

«ەلىمىز جاقىندا قازاقستان حالقىنىڭ بىرلىگى كۇنىن اتاپ وتەدى. بۇل - ىرىس- ىنتىماقتى، تاتۋلىق پەن كەلىسىمدى دارىپتەيتىن مەيرام. قازاقستان ءۇشىن بۇل اسا ماڭىزدى مەرەكە. ەلىمىز بىرلىك كۇنىن مىندەتتى تۇردە اتاپ وتۋگە ءتيىس. سەبەبى قاسيەتتى وتانىمىزدىڭ ىرگەسى ءبۇتىن، تۇعىرى مىعىم بولسىن دەسەك، بىرلىگىمىز ءارقاشان بەكەم بولۋى كەرەك. بۇل - انىق اقيقات»، - دەدى مەملەكەت باسشىسى.

قاسىم- جومارت توقايەۆ اسسامبلەيانىڭ القالى جيىنىن جىل سايىن ەل بىرلىگى كۇنىنە وراي وتكىزۋ داستۇرگە اينالعانىن ەسكە سالدى.

«بۇل سەسسيا - كوكتەم مەزگىلىندە مەملەكەتتىك دەڭگەيدە وتەتىن ەڭ اۋقىمدى ءىس- شارا. مۇندا ەلىمىز ءۇشىن وتە ماڭىزدى ۇسىنىستار ايتىلادى»، - دەدى پرەزيدەنت.

ايتا كەتەيىك، پرەزيدەنت قاسىم- جومارت توقايەۆتىڭ قاتىسۋىمەن قازاقستان حالقى اسسامبلەياسىنىڭ ХХХІІ سەسسياسى ءوتىپ جاتىر.