ەلوردانى سۋمەن قامتۋ ءۇشىن ەرتىستەن سۋ الىنۋى مۇمكىن

استانا. قازاقپارات - ەلوردانى سۋمەن قامتاماسىز ەتۋ ءۇشىن قانىش ساتبايەۆ اتىنداعى ارنادان سۋاعار تارتىلۋى مۇمكىن. بۇل تۋرالى سەناتتىڭ «ءوڭىر» دەپۋتاتتىق توبىنىڭ وتىرىسىندا ەكولوگيا، گەولوگيا جانە تابيعي رەسۋرستار مينيسترلىگى سۋ رەسۋرستارى كوميتەتىنىڭ ءتوراعاسى نۇرلان الدامجاروۆ ايتتى، دەپ حابارلايدى قازاقپارات ءتىلشىسى.

«استانا قالاسىنىڭ اكىمدىگى قالانى اۋىز سۋمەن بالاما قامتاماسىز ەتۋدىڭ بىرنەشە نۇسقاسىن پىسىقتاپ جاتىر. ءبىرىنشى نۇسقا - قانىش ساتبايەۆ ارناسىنان استاناعا دەيىن سۋاعار تارتىپ، №4 سورعى ستانساسىن سالۋ. وزدەرىڭىز دە بىلەتىندەي، قازىر اكىمدىك 3 ستانسا سالىپ جاتىر. وسى جىلدىڭ سوڭىنا دەيىن قۇرىلىس جۇمىستارى اياقتالادى»، - دەدى كوميتەت ءتوراعاسى.

ونىڭ اتاپ وتۋىنشە، قازىرگى ۋاقىتتا اتالعان سۋاعاردىڭ جوبالىق- سمەتالىق قۇجاتتاماسى مەن تەحنيكالىق- ەكونوميكالىق نەگىزدەمەسى جاسالىپ جاتىر.

بۇل جۇمىس 2028 -جىلعا قاراي اياقتالماق. جوبانىڭ الدىن الا بولجامدى قۇنى - شامامەن 300 ميلليارد تەڭگە.

ۇزىندىعى شامامەن 200 شاقىرىم سۋاعار سالىنادى.

«بۇگىندە ساتبايەۆ ارناسى تولىق قۋاتىنىڭ 30 پايىزىنا عانا جۇمىس ىستەپ تۇر. ياعني، وندا قازىرگى ۋاقىتتا قور بار جانە ونى استانانى سۋمەن قامتۋعا جىبەرۋگە بولادى. ارنا ۇنەمى جۇمىس ىستەيدى. وزدەرىڭىز دە بۇل ارنانىڭ باسسەينارالىق ەكەنىن بىلەسىزدەر. ول سۋدى ەرتىستەن الىپ، قاراعاندى وبلىسىنداعى نۇرا وزەنىنە قۇيادى. سوندىقتان سۋ قورىنا قاتىستى ماسەلە كوتەرىلىپ وتىرعان جوق. بالاما سۋ كوزىنە قاتىستى ماسەلە شەشىلەدى. بۇگىندە قالا ءۇشىن قاتەرلى احۋال جوق. بەلگىلى ءبىر تاپشىلىق بار. ءبىراق، ونى شەشۋگە بولادى. قازىر استانا تۇتىنۋ ماقساتىندا جىلىنا شامامەن 90 ميلليون تەكشە مەتر سۋ پايدالانادى. ونى استانا سۋ قويماسىنان الادى. ونىڭ كولەمى بۇگندە 410 ميلليون تەكشە مەتردى قۇرايدى جانە دە بالاما نۇسقا سالعانعا دەيىن بەلگىلى ءبىر قور بولادى»، - دەدى نۇرلان الدامجاروۆ.