ءماجىلىس ورتالىق ازيا وڭىرلىك ينستيتۋتىنا قاتىستى قۇجاتتى قابىلدادى
زاڭ 2016-جىلعى 26- قازاندا يسلامابادتا جاسالعان ورتالىق ازيا وڭىرلىك ەكونوميكالىق ىنتىماقتاستىعى (و ا ءو ە ى) ينستيتۋتىن قۇرۋ تۋرالى كەلىسىمدى راتيفيكاتسيالاۋعا باعىتتالعان. كەلىسىمنىڭ ماقساتى - ورتالىق ازيا وڭىرلىك ەكونوميكالىق ىنتىماقتاستىعى ينستيتۋتىن ۇكىمەتارالىق ۇيىم رەتىندە قۇرۋ. ول وڭىرلىك ىنتىماقتاستىق پروتسەستەرىنە قاتىسۋ، وڭىردە بىرلەسكەن جوبالاردى جانە جەدەل ەكونوميكالىق ءوسۋدى ىسكە اسىرۋ ءۇشىن و ا ءو ە ى- عا مۇشە ەلدەردىڭ مۇمكىندىكتەرىن كەڭەيتۋ جونىندەگى فۋنكسيالارعا يە بولادى.
«ينستيتۋت ورتالىق ازيا ەلدەرىندە ەكونوميكالىق ءوسۋدى جەدەلدەتۋ ماقساتىندا 11 ەلدىڭ جانە 7 حالىقارالىق ۇيىمنىڭ قاتىسۋىمەن قۇرىلدى. ينستيتۋت كەڭسەسى بىشكەك قالاسىندا وتكەن ورتالىق ازيا وڭىرلىك ەكونوميكالىق ىنتىماقتاستىق باعدارلاماسىنىڭ 13-مينيسترلىك كونفەرەنتسياسىنىڭ شەشىمى نەگىزىندە 2015-جىلدىڭ 15- ناۋرىزىندا ۇرىمشىدە رەسمي تۇردە اشىلدى. ۇيىمنىڭ باس كەڭسەسىن قىتاي حالىق رەسپۋبليكاسىندا ورنالاستىرۋ تۋرالى شەشىمدى قاتىسۋشى ەلدەر داۋىس بەرۋ تاسىلىمەن شىعارعان بولاتىن. وعان باستى سەبەپ – ق ح ر كەڭسەنى وتەۋسىز نەگىزدە بەرىپ، ونىڭ جۇمىسىنا قارجىلاي ۇلەس قوستى»، - دەدى قازاقستان رەسپۋبليكاسىنىڭ ۇلتتىق ەكونوميكا ءمينيسترى الىبەك قۋانتىروۆ.
ونىڭ ايتۋىنشا، قازىرگى ۋاقىتتا ينستيتۋتتا 35 قىزمەتكەر جۇمىس ىستەپ جاتىر. ينستيتۋتقا جۇمىسقا تۇرۋ ۇيىم سايتىندا جاريالاناتىن كونكۋرس ارقىلى ىسكە اسىرىلادى. 2017-جىلعى 1- قىركۇيەكتە ينستيتۋت ۇكىمەتارالىق ۇيىمنىڭ رەسمي مارتەبەسىن العان بولاتىن. قازاقستان بىلتىر 21- اقپاندا ينستيتۋتتى قۇرۋ تۋرالى كەلىسىمگە قول قويىپ، بايقاۋشى مارتەبەسىن الدى. اتالعان كەلىسىم راتيفيكاتسيالانعاننان كەيىن، قازاقستان ينستيتۋتتىڭ تولىققاندى مۇشەسى بولادى.
«ايتا كەتەتىن ماڭىزدى جايت، مۇشەلىك جارنانى تولەۋ- تولەمەۋ - قازاقستاننىڭ ءوز ەركىندە قالادى. بۇل ەلدىڭ داۋىس بەرۋ قۇقىعىنا اسەر ەتپەيدى. ويتكەنى، ۇيىمنىڭ باسقارۋشى كەڭەسى بارلىق شەشىمدەردى مۇشە ەلدەردىڭ كونسەنسۋسى نەگىزىندە قابىلدايدى. سونىمەن قاتار، ينستيتۋتقا مۇشە ەل دەپوزيتاريگە جازباشا حابارلاما تابىستاۋ ارقىلى ۇيىم قۇرامىنان كەز كەلگەن ۋاقىتتا شىعا الادى. ينستيتۋتتىڭ نەگىزگى قىزمەتى - زەرتتەۋلەر جۇرگىزۋ، سەمينارلار، فورۋمدار جانە ترەنينگتەر مەن كونفەرەنتسيالار وتكىزۋ، سونىمەن قاتار يننوۆاتسيالىق شەشىمدەردى ۇسىنىپ، زەرتتەۋ ناتيجەلەرى مەن قورىتىندىلاردى تاراتۋ، ورتالىق ازيا وڭىرىندە عىلىمي-زەرتتەۋ ينستيتۋتتارى جەلىسىن دامىتۋ»، - دەدى مينيستر.
ينستيتۋتتىڭ 5 كلاستەرلىك باعىتى ايقىندالعان. ولار:
- ەكونوميكالىق جانە قارجىلىق تۇراقتىلىقتى قامتاماسىز ەتۋ؛
- ساۋدا، تۋريزم جانە ەكونوميكالىق دالىزدەردى قۇرۋ؛
- ينفراقۇرىلىم جانە ەكونوميكالىق بايلانىستاردى دامىتۋ؛
- اۋىل شارۋاشىلىعى جانە سۋ رەسۋرستارىن ماسەلەلەرىن شەشۋ؛
- ادامي كاپيتالدى دامىتۋدىڭ ساپاسى مەن تيىمدىلىگىن ارتتىرۋ.
