سەناتور اۋىل حالقىنىڭ باستى پروبلەمالارىن اتادى

استانا. قازاقپارات - سەناتتىڭ «ءوڭىر» دەپۋتاتتىق توبىنىڭ وتىرىسىندا سەناتور ارمان وتەعۇلوۆ اۋىل حالقىنىڭ باستى پروبلەمالارىن اتادى، دەپ حابارلايدى قازاقپارات ءتىلشىسى.

«مەملەكەت باسشىسى قاسىم-جومارت توقايەۆ وتكەن جىلدىڭ 26-قاراشاسىندا ۇلىقتاۋ راسىمىندە سويلەگەن سوزىندە «بۇگىندە قازاقستان حالقىنىڭ 40 پايىزعا جۋىعى اۋىلدا تۇرادى.

«اۋىل - ەل بەسىگى» دەپ حالقىمىز بەكەر ايتپاعان. سوندىقتان اۋىلداعى جاعدايدى جاقسارتا الماساق - بارىمىزگە سىن»، دەپ قاداپ اتاپ وتكەن بولاتىن. ەلىمىزدە 2003-2005 -جىلدارى ارالىعى «اۋىل جىلى» بولىپ جاريالانىپ، ەداۋىر جۇمىستار اتقارىلعانى بەلگىلى. پرەزيدەنت تاپسىرماسىن ىسكە اسىرۋ ءۇشىن «قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 -جىلدارعا ارنالعان تۇجىرىمداماسى» دايىندالدىن. 2023 -جىلعى 28-ناۋرىزداعى ق ر ۇكىمەتىنىڭ قاۋلىسىمەن بەكىتىلدى. وندا اۋىلدىق اۋماقتاردى دامىتۋ، اۋىلدىق جەرلەردە ءومىر ءسۇرۋ ساپاسىن جاقسارتۋ جانە جايلى ءومىر ءسۇرۋ ورتاسىن قالىپتاستىرۋ ماقساتىن كوزدەيدى، - دەدى دەپۋتات.

سەناتور ۇسىنعان ستاتيستيكالىق مالىمەتتەرگە سايكەس، قازىرگى ۋاقىتتا رەسپۋبليكادا 6295 اۋىلدىق ەلدى مەكەن بار. وندا ەل حالقىنىڭ 38,2 پايىزى، ياعني 7,5 ميلليون ادام تۇرىپ جاتىر.

«كورىپ جۇرگەنىمىزدەي، اۋىلدا پروبلەمالار شاش-ەتەكتەن. اۋىلدان قالاعا كوشۋشىلەر سانى ارتپاسا، كەمىگەن جوق. اۋىلدىق مەكتەپتەردە ءبىلىم الۋشىلار كونتينگەنتى تومەندەۋ ۇستىندە. ال حالىق تىعىز ورنالاسقان اۋىلداردا وقۋشى ورىندارىنىڭ تاپشىلىعى جىل ساناپ وسۋدە. بۇل جەردە اۋىلدىق جەرلەردەگى ءبىلىم ساپاسىنا بولەك توقتاۋ كەرەك دەپ ويلايمىن. 2022 -جىلدىڭ 1-قاڭتارىنداعى دەرەكتەر بويىنشا، ەلىمىزدە 137 ءۇش اۋىسىمدى مەكتەپتىڭ 60 پايىزى اۋىلدىق جەرلەردە ورنالاسقان. جانە دە 26 اۆاريالىق مەكتەپ ءالى بار»، - دەدى ول.

ارمان وتەعۇلوۆ ساپالى اۋىز سۋمەن قامتاماسىز ەتۋ پروبلەماسى دا وتكىر تۇرعانىنا باسا نازار اۋدارتتى. دەمالىس ورىندارىنىڭ، مادەنيەت جانە سپورت وبەكتىلەرىنىڭ جوقتىعى، مەديتسينالىق قىزمەتتەرگە قولجەتىمدىلىكتىڭ سىن كوتەرمەيتىندىگى بارشاعا ايان ەكەندىگىن دە اتاپ ءوتتى.

«اۋىلدىق اۋماقتارعا الەۋمەتتىك-ەكونوميكالىق مونيتورينگ دەرەكتەرى بويىنشا 2022 -جىلدىڭ باسىندا اۋىلدىق جەرلەردەگى العاشقى مەديتسينالىق-سانيتاريالىق كومەك نىساندارىنىڭ سانى 5195 بىرلىكتى قۇرادى. بۇل رەتتە 2731 اۋىلدا مەديتسينالىق وبەكتىلەر بەيىمدەلگەن ءۇي-جايلاردا ورنالاسقان جانە 2292 اۋىلدا مەديتسينالىق وبەكتىلەردىڭ سالىنعانىنا 40 جىلدان اسقان. «اۋىلدا دەنساۋلىق ساقتاۋدى جاڭعىرتۋ» پيلوتتىق ۇلتتىق جوباسى اياسىندا 655 مەديتسينالىق نىسان عانا سالۋ جوسپارلانۋدا. سوندا 3 جىلدىڭ ىشىندە 655 نىسان عانا سالاتىن بولساق، قالعان مەديتسينالىق نىسانداردىڭ جاعداي قانداي بولماق؟ جوعارىدا اتالعان تۇجىرىمدامادا اۋىلدىق اۋماقتاردىڭ گەوگرافيالىق ەرەكشەلىكتەرى مەن ارتىقشىلىقتارىنا كوڭىل اۋدارىلعان جانە جاڭا مەكتەپتەر مەن مەديتسينالىق نىساندار سالۋ، ءتيىستى دارەجەدە سۋمەن جانە ەلەكترمەن قامتاماسىز ەتۋ، اۋىل جولدارىنىڭ ساپاسىن جاقسارتۋ، كىتاپحانا، كلۋب، مۋزەي جانە كينوتەاتر، سپورت عيماراتتارى سياقتى مادەني نىساندار سالۋ ارقىلى جايلى اۋىلدىق ورتانى قۇرۋ كوزدەلىپ وتىر»، - دەدى سەناتور.