التى ساعاتتان از ۇيىقتايتىن ادامنىڭ ومىرىنە تونەتىن قاۋىپ كوپ

استانا. قازاقپارات - پسيحولوگتار قانشا ۇيىقتاسا دا ۇيقىنىڭ قانباۋىن كۇيزەلىسپەن بايلانىستىرسا، دارىگەرلەر دەنساۋلىقتىڭ ناشارلىعىنان كورەدى.

6 ساعاتتان از ۇيىقتايتىن ادام ەرتە قايتىس بولۋى مۇمكىن. سەبەبى، تۇندە ەڭ ماڭىزدى گورموندار بولىنەدى. ال ادام 12 دەن كەيىن ۇيىقتاسا، ونىڭ يممۋنيتەتى تومەندەيدى. اۋرۋعا شالدىعادى، دەنەسىن شارشاڭقىلىق باسادى.

«10 دا جاتىپ، تاڭەرتەڭ 7 دە تۇرۋعا ورگانيزمدى ۇيرەتسە، مىندەتتى تۇردە ادامنىڭ ۇيقىسى قانادى. ءبىز زامان تالاپتارىنا سايكەس، بەلسەندى ومىرىمىزگە بايلانىستى، قازىر ءبىز سمارتفوندى كوپ قولدانامىز. ۇيقىنىڭ الدىندا دۇرىس تاماقتانبايمىز. نەمەسە كوفەين قولدانۋىمىز مۇمكىن. كوپ سۋ ءىشۋىمىز مۇمكىن. وسىنداي ۇيقى گيگيەناسىن ساقتاماۋ، ادام ۇيقىسىنىڭ قانباۋىنا اكەلۋى مۇمكىن»، - دەيدى دارىگەر جانيبا ەربولات قىزى.

الەمدەگى 8 ميللياردقا جۋىق ادامنىڭ تورتتەن ءبىرى ۇيقىسىزدىقتان زارداپ شەگەدى. اسىرەسە، كوكتەم مەزگىلىندە ادام السىرەيدى. باسىن جاستىق تارتىپ، ەشنارسەگە زاۋقى سوقپايدى.

پسيحولوگ گۇلدانا نۇربولات قىزى ونىڭ سەبەبىن بىلاي ءتۇسىندىردى: «ادام قاتتى كۇيزەلىسكە تۇسكەن كەزدە، بويىنداعى سترەستەن ارىلۋ ءۇشىن كوبىنە كوپ تاماق ىشەدى نەمەسە ۇيقىعا بەيىم بولادى».

ءومىرىمىزدىڭ ۇشتەن ءبىر بولىگى ۇيقىدان تۇرادى. ەگەر ءسىز 90 جىل ءومىر سۇرسەڭىز، ونىڭ 30 جىلى ۇيقىمەن وتەدى. ادام كۇنىنە 8, ايىنا 240 ساعات، جىلىنا 120 كۇن دەمالادى. وسىنىڭ وزىندە ۇنەمى ۇيقىسىراپ جۇرەتىندەر بار. ماماندار ولارعا سپورتپەن اينالىسىپ، دۇرىس تاماقتانۋعا كەڭەس بەرەدى. ءتىپتى ۋاقىتىلى وياتاتىن ارنايى موبيلدى باعدارلامانى قولدانۋدى ۇسىنادى.