ەڭ قاتال تۇرمە «قارا بۇركىتتە» ءومىر بويىنا باس بوستاندىعىنان ايىرىلعان قانشا ادام وتىر؟
بۇل تۋرالى ىشكى ىستەر مينيسترلىگى قىلمىستىق-اتقارۋ جۇيەسى كوميتەتىنىڭ قوستاناي وبلىسى بويىنشا قىلمىستىق-اتقارۋ جۇيەسى دەپارتامەنتى» Massaget.kz ءتىلشىسىنىڭ رەسمي ساۋالىنا بەرىلگەن جاۋاپتا ايتىلعان.
ۆەدومستۆو وكىلدەرى، ءومىر بويىنا سوتتالعاندار قانداي قىلمىس جاساعانى ءۇشىن سوتتالعانىن ايتتى.
«ءومىر بويىنا باس بوستاندىعىنان ايىرىلعاندار جەكە تۇلعاعا قارسى، قوعامدىق قاۋىپسىزدىك پەن قوعامدىق تارتىپكە قارسى قىلمىستىق قۇقىقبۇزۋشىلىقتارى ءۇشىن جازالارىن وتەپ ءجۇر. قازاقستان رەسپۋبليكاسىنىڭ قىلمىستىق كودەكسىندە ادام جەگەنى ءۇشىن قىلمىستىق جاۋاپكەرشىلىك قاراستىرىلماعان»، - دەلىنگەن رەسمي جاۋاپتا.
مەكەمە وكىلدەرى، سوتتالعانداردىڭ ءبىر كۇنى قالاي وتەتىنىن ايتتى.
«سوتتالعانداردىڭ كۇنى مەكەمە باستىعىمەن بەكىتىلگەن كۇن تارتىبىنە سايكەس ۇيقىدان تۇرعىزۋدان باستالىپ، جاتتىعۋ جاساۋ، تاڭعى اس، تازا اۋادا سەرۋەندەۋ، تۇسكى اس، تەلەفونمەن بايلانىسۋ، جاقىندارىمەن كەزدەسۋ، تاربيە ءىس-شارالارىن وتكىزۋ، سونىڭ ىشىندە مادەني جانە سپورتتىق ءىس-شارالاردى وتكىزۋ، تەلەباعدارلامالاردى كورۋ، جەكە ۋاقىت، كەشكى اس جانە ۇيقىعا جاتقىزۋمەن وتەدى. مەكەمە قىزمەتكەرلەرى سوتتالعاندارمەن جازانى وتەۋدىڭ بەكىتىلگەن ءتارتىبىن بۇزباۋ ماقساتىندا كۇندەلىكتى جۇمىس جۇرگىزەدى. ودان بولەك سوتتالعانداردىڭ پسيحوەموتسيونالدىق جاعدايىن جاقسارتۋ ماقساتىندا جەكە جانە توپتىق تۇردە پسيحوكوررەكتسيالىق جانە پسيحوپروفيلاكتيكالىق جۇمىستار جۇرگىزىلەدى»، - دەيدى ۆەدومستۆو وكىلدەرى.
سوتتالعاندارعا بەكىتىلگەن كەستەگە ساي جاقىندارىمەن تەلەفون ارقىلى بايلانىسۋعا 15 مينۋت ۋاقىت بەرىلەدى ەكەن.
«جىلىنا 4 رەت بەرىلەتىن 2 ساعاتتىق كەزدەسۋگە، ونىڭ ىشىندە، ۆيدەوبايلانىس ارقىلى كەزدەسۋگە قۇقىقتارى بار. بۇگىندە سوتتالعان ءبىر ادام باسىنا اي سايىن 181 مىڭ تەڭگە كولەمىندە قارجىلاي شىعىن جۇمسالادى»، - دەلىنگەن رەسمي جاۋاپتا.
