اۋىلداردى ينتەرنەتپەن قامتۋعا ارنالعان سايت ىسكە قوسىلادى
سول ارقىلى اۋىلداردى ينتەرنەتپەن قامتۋ جاعدايىمەن تانىسۋ مۇمكىندىگى تۋادى. تولىعىراق سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ايتىپ بەردى، دەپ حابارلايدى قازاقپارات ءتىلشىسى.
«قولجەتىمدى ينتەرنەت» ۇلتتىق جوباسىنىڭ ماقساتى - حالىق پەن بيزنەستى وپتيكا ارقىلى جوعارى جىلدامدىقتى ينتەرنەتپەن قامتاماسىز ەتۋ. جوبادا نەگىزگى كورسەتكىشتەر دە ۇسىنىلعان. ول كورسەتكىشتەرگە قول جەتكىزۋ ءۇشىن وبلىس اكىمدىكتەرىمەن ءار ەلدى مەكەن بويىنشا ناقتى جوسپار جاساقتالىپ جاتىر. بۇگىندە شقو، اقتوبە وبلىسى بويىنشا جول كارتالارى ازىرلەندى. وسىلايشا، ءار ەلدى مەكەندى ينتەرنەتكە قوسۋ بويىنشا اقپارات دايىندالىپ، ول ارنايى سايتقا جۇكتەلەدى. ارنايى سايت بيىل ماۋسىمدا ىسكە قوسىلادى»، - دەدى باعدات مۋسين ۇكىمەت وتىرىسىندا.
سونداي- اق، مينيستر بايلانىس ساپاسىن جاقسارتۋ ماقساتىندا باستى نورمالار ازىرلەنگەنىن ايتتى.
«بايلانىس وپەراتورلارىنا وپتيكالىق جەلىلەر جانە ۇيالى بايلانىس جابدىقتارىن ورنالاستىرۋ ءۇشىن جىلجىمايتىن مۇلىك وبەكتىلەرىنە (كوپپاتەرلى تۇرعىن ۇيلەر، اكىمشىلىك عيماراتتار، بيزنەس- ورتالىقتارى، ونەركاسىپتەر، تاعى سول سياقتى) تەڭ قولجەتىمدىلىك ۇسىنىلماق. ونىڭ ناتيجەسىندە كوپپاتەرلى تۇرعىن ۇيلەردە بىرنەشە بايلانىس وپەراتورىنا قوسىلۋ مۇمكىندىگى بولادى. رەسپۋبليكالىق جانە جەرگىلىكتى اۆتوجولداردى جوسپارلاۋ جانە جوندەۋ كەزىندە وپتيكالىق جەلىلەر سالۋ قاراستىرىلادى. ول اۆتوجول بويىن ساپالى بايلانىسپەن قامتۋعا مۇمكىندىك بەرەدى»، - دەيدى ۆەدومستۆو باسشىسى.
