بايلانىس وپەراتورلارىنىڭ نەگە ينتەرنەت ساپاسىنا جاۋاپ بەرمەيتىنى تۇسىنىكسىز - ءاليحان سمايىلوۆ

استانا. قازاقپارات - ءاليحان سمايىلوۆ ۇكىمەت وتىرىسىندا قازاقستاندىقتاردى ساپالى ينتەرپەن قامتۋ ماسەلەسىن كوتەردى، دەپ حابارلايدى قازاقپارات ءتىلشىسى.

«موبيلدى ينتەرنەتكە قىزمەت كورسەتۋ بايلانىس وپەراتورلارىنىڭ مىندەتىنە نەگە كىرمەيتىنى مۇلدەم تۇسىنىكسىز. ينتەرنەتتىڭ ساپاسى مەن جىلدامدىعىن ولشەيتىن قۇرالدار جوق. ينسپەكتسيانىڭ ءوزى جول بويىنداعى جانە ەلدى مەكەندەردەگى ينتەرنەت جىلدامدىعىن ولشەي المايدى. بۇل پروبلەمالاردى شەشۋ كەرەك. قازىرگى تاڭدا ادامدار ءبىرىنشى كەزەكتە ينتەرنەتتىڭ ساپاسىنا قارايدى. جاي عانا جەلى تارتىپ بەرەتىن كەزەڭنەن وتتىك»، - دەدى ءاليحان سمايىلوۆ ۇكىمەت وتىرىسىندا.

پرەمەر- ءمينيستردىڭ ايتۋىنشا، حالىققا ساپالى بايلانىس پەن جىلدام ينتەرنەت قاجەت.

«كليەنتتەر تاريفتىڭ اقىسىن تولىعىمەن تولەپ وتىر. سوندىقتان ساپالى قىزمەتتى تالاپ ەتۋى ورىندى. سوڭعى 3 جىلدا بايلانىس وپەراتورلارى بۇل سالاعا تارتىلعان ينۆەستيانى شامامەن % 60- عا دەيىن تومەندەتىپ جىبەرگەن. وپەراتورلارعا قىمبات ينفراقۇرىلىمعا قارجى سالعاننان گورى انىقتالعان زاڭبۇزۋشىلىقتار ءۇشىن ايىپپۇل تولەي سالعان ءتيىمدى. بۇل جاعدايدى تۇبەگەيلى وزگەرتۋ كەرەك. «قولجەتىمدى ينتەرنەت» ۇلتتىق جوباسى ءدال وسى ماسەلەلەردى شەشۋگە باعىتتالعان. ونىڭ ماقساتى - حالىق پەن كاسىپكەرلىك سۋبەكتىلەرىن كەم دەگەندە سەكۋندىنا 100 مبيت ينتەرنەتپەن قامتاماسىز ەتۋ»، - دەيدى ول.