شىلدەدەن باستاپ اپتاسىنا ءتورت كۇن عانا جۇمىس ىستەيمىز بە؟ مينيسترلىك ءتۇسىندىردى
بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز حاتشىسى ساكەن دىلداحمەت ايتتى.
ۆەدومستۆو وكىلىنىڭ ايتۋىنشا، قىزمەتكەر جۇمىس بەرۋشىمەن كەلىسە وتىرىپ، جۇمىس كۇندەرىن بەكىتەدى.
«2023 -جىلعى 1-شىلدەدەن باستاپ قازاقستان رەسپۋبليكاسىنىڭ ەڭبەك كودەكسىنە قوسىمشا وزگەرتۋلەر ەنگىزىلەدى. بۇل وزگەرتۋلەر اياسىندا ءتورت كۇندىك جۇمىس اپتاسىن بەكىتۋگە مۇمكىندىك بولادى. ياعني اپتاسىنا بەس كۇن جۇمىس ىستەيتىن بولساڭىز، جۇمىس بەرۋشىڭىزبەن كەلىسىپ، كەلەسى اپتادا ءتورت كۇندىك جۇمىس اپتاسىن بەكىتۋگە بولادى. بۇل دەگەنىمىز وسى اپتا بەس كۇن، كەلەسى اپتا ءتورت كۇن، ارعا اپتا التى كۇن جۇمىس كەستەسىن بەكىتۋگە بولادى. ياعني وزىڭىزگە قاجەت كەزدە ءتورت كۇندىك جۇمىس اپتاسىنا وتەسىز. قوسىمشا ءۇش كۇن بەرىلەتىن دەمالىستا جۇمىسكەر وزىنە، وتباسىنا، دەنساۋلىعىنا، جالپى قاجەت ماقساتىنا قولدانۋى ءۇشىن بۇل وزگەرتۋلەر ەنگىزىلىپ جاتىر. بۇل تاجىريبە باسقا دا مەملەكەتتەردە كەڭ قولدانىلادى»، - دەيدى ۆەدومستۆو وكىلى.
سونداي-اق، ءتورت كۇندىك جۇمىس اپتاسىنا كوشكەن جاعدايدا ەڭبەك دەمالىسى مەن جالاقىعا قاتىستى وزگەرىستەر بولمايتىنى ايتىلدى.
«بۇل وزگەرتۋلەر قازاقستاندا جالپى ءتورت كۇندىك جۇمىس كۇنى ورنايدى دەگەندى بىلدىرمەيدى. بۇل وڭتايلى جۇمىس رەجيمىن بارلىعى قولدانا الادى. مەملەكەتتىك قىزمەتتە، جەكە كاسىپتە، مەملەكەتتىك مەكەمەدە جۇمىس ىستەسەڭىز دە. ءتورت كۇندىك جۇمىس اپتاسى كەزىندە ەڭبەك دەمالىسىڭىز، جالاقىڭىز بارلىعى ساقتالادى. ەشقانداي وزگەرىس بولمايدى»، - دەيدى باسپا ءسوز حاتشىسى.
ەسكە سالايىق، بۇعان دەيىن قازاقستاندا شىلدەدەن باستاپ ءتورت كۇندىك جۇمىس اپتاسىنا وتۋگە بولاتىنى حابارلانعان ەدى.
ماسساگەت
