اتىراۋدا جاسوسپىرىم تراكتوردىڭ باگىنا شۇبات قۇيىپ كەتكەن، اكەسى ايىپپۇل ارقالادى

اتىراۋ. قازاقپارات - اتىراۋدا ءجاسوسپىرىم باۋ- باقشا قوعامىنا تيەسىلى تراكتوردىڭ باگىنا شۇبات قۇيىپ كەتكەن، دەپ حابارلايدى قازاقپارات ءتىلشىسى.

اتىراۋ وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتىنىڭ مالىمەتىنشە، كامەلەتكە تولماعان جاسوسپىرىم اكىمشىلىك قۇقىق بۇزۋشىلىق جاساعان. بۇل ءىس ق ر اكىمشىلىك قۇقىق بۇزۋشىلىق تۋرالى كودەكسىنىڭ 435-بابىمەن قارالعان.

«اكىمشىلىك قۇقىق بۇزۋشىلىق تۋرالى حاتتاماعا سايكەس، كامەلەتكە تولماعان بالا «سپەكتور» باۋ- باقشا قوعامىنا تيەسىلى تراكتوردىڭ ماي قۇياتىن بولشەگىنە شۇبات قۇيىپ، قوعامدىق ءتارتىپتى بۇزعان. سوت وتىرىسىندا جاسوسپىرىمنىڭ زاڭدى وكىلى - اكەسى كىناسىن تولىق مويىنداپ، جەڭىل جازا تاعايىنداۋدى سۇرادى. سوت كامەلەتكە تولماعان بالا اكەسىنىڭ ماتەريالدىق جاعدايىن، كىناسىن تولىق مويىنداعانىن ەسكەردى. وعان اكىمشىلىك ايىپپۇل سوماسى % 30- عا قىسقارتىلىپ، 16 905 تەڭگە مولشەرىندە ايىپپۇل تۇرىندەگى اكىمشىلىك جازا قولدانىلدى» ، - دەپ حابارلادى مامانداندىرىلعان اۋدانارالىق سوتتىڭ باسپا ءسوز قىزمەتى.

سوت قاۋلىسى زاڭدى كۇشىنە ەندى.

ەسكە سالا كەتەلىك، بۇدان بۇرىن اتىراۋدا ءبىر توپ جاسوسپىرىم قاتارلاسىن اياۋسىز سوققىعا جىققانىن حابارلاعان بولاتىنبىز. پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، ولار اتىراۋ قالاسىنداعى كوللەدج جاتاقحاناسىنىڭ جانىندا 2007 -جىلعى قاتارلاسىن جاراقاتتاعان. وسى دەرەككە قاتىستى ق ر قىلمىستىق كودەكسى 293-بابىنىڭ 2-بولىگىنە سايكەس تەرگەۋ جۇرگىزىلىپ جاتىر. سوت- مەديتسينالىق ساراپتاما تاعايىندالدى. كۇدىكتى رەتىندە 2006 جانە 2007 -جىلعى جاسوسپىرىمدەر ۇستالىپ، اتىراۋ قالاسىنداعى №2 پوليتسيا بولىمىنە جەتكىزىلگەن.