رەسەيدەن قازاقستانعا زاڭسىز ۇشاق اكەلە جاتقاندار ۇستالدى

ومبى. قازاقپارات - ومبى كەدەنشىلەرى قازاقستانعا اكەلە جاتقان ەكى ورىندىق جەڭىل موتورلى ۇشاقتى تاپتى. ۇشاقتى رۇقسات قۇجاتىنسىز الىپ شىقپاق بولعان، دەپ حابارلايدى قازاقپارات ءسىبىر كەدەن باسقارماسىنىڭ رەسمي سايتىنا سىلتەمە جاساپ.

ومبى كەدەنشىلەرى پاۆلودار تۇرعىنى ساتىپ العان ۇشاقتى شەكارادان وتكىزبەي قويعان.

«زاڭبۇزۋشىلىقتى ولحوۆكا وتكىزۋ پۋنكتى ايماعىندا فۋرگوندى تەكسەرۋ بارىسىندا كەدەننىڭ موبيلدى توبى انىقتادى. فۋرگون تىركەمەسىنەن كەدەنشىلەر رەسەيلىك شاعىن اۋە كەمەسىن تاپتى. پاۆلودارداعى يەسىنە جەتكىزىلۋى كەرەك بولعان ۇشاقتىڭ سالماعى - 300 ك گ، ال قۇنى - 3,4 ميلليون رۋبل. تاۋاردى تاسىمالداۋشى كەدەنشىلەرگە قاجەتتى قۇجاتتاردى كورسەتە المادى» ، - دەپ حابارلادى ءسىبىر كەدەن باسقارماسى.

اۋە كەمەسىن اكەتۋگە تىيىم سالىندى. تاۋار تيەلگەن كولىك رەسەي فەدەراتسياسىنا قايتارىلدى.