رەسەيلىك «ۆاگنەر» قۇرامىنا وتكەن ستۋدەنت قازاقستاندا قىلمىستىق جاۋاپقا تارتىلادى

استانا. قازاقپارات - «ۆاگنەر» جەكە اسكەري كومپانياسى قۇرامىنداعى قازاقستان ازاماتىن قايتارۋعا قاتىستى ءتيىستى قولداۋ جاسايمىز.

بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.

«بۇدان بۇرىن حابارلانعانداي، قازاقستان ازاماتى «ۆاگنەر» (رەسەيلىك مەملەكەتتىك ەمەس قارۋلى قۇرىلىم) جەكە اسكەري كومپانياسىمەن ءوز ەركىمەن كەلىسىمشارتقا وتىرعان. اتالعان جىگىت ۆيدەو ارقىلى ءتيىستى مالىمدە جاساعان ەدى. وسىنداي اسكەري كومپانيالاردىڭ قۇرامىنا كىرەتىن ادامدار ەلىمىزدە 5 جىلدان 9 جىلعا دەيىن جازاعا تارتىلاتىنىن، ياعني قازاقستاندا قىلمىستىق جاۋاپكەرشىلىك قاراستىرىلعانىن ەسكەرتەمىز. ول جەردە ەشقانداي رومانتيكا جوق»، - دەدى ا. سمادياروۆ ەلورداداعى باسپا ءسوز ءماسليحاتىندا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، قازاقستان سىرتقى ىستەر مينيسترلىگى اتالعان ستۋدەنتتىڭ اتا-اناسىنا ءتيىستى كومەك جاساپ جاتىر. سونىمەن قاتار رەسەيدىڭ قۇزىرلى ورگاندارىنا ءتيىستى ساۋالدار جولداندى.

«اقپاراتتى تەكسەرىپ جاتىرمىز. بۇل تۇرعىدا ءتيىستى قولداۋ جاسايمىز. ارينە، ول ادام قازاقستانعا كەلگەن جاعدايدا، قىلمىستىق جاۋاپقا تارتىلادى»، - دەدى رەسمي وكىل.

ەسكە سالا كەتەيىك، بۇعان دەيىن ب ا ق بەتتەرى مەن الەۋمەتتىك جەلىلەردە رەسەيدىڭ تومسك مەملەكەتتىك ۋنيۆەرسيتەتىندە وقىپ جاتقان 23 جاستاعى قازاقستاندىق ستۋدەنتتىڭ ءىز-ءتۇزسىز كەتكەنى جايلى اقپارات تاراعان ەدى.

جەرلەسىمىزدى «ۆاگنەر» (رەسەيلىك مەملەكەتتىك ەمەس قارۋلى قۇرىلىم) جەكە اسكەري كومپانياسى قۇرامىنا ماجبۇرلەپ كىرگىزدى دەگەن بولجام دا ايتىلدى.