قازاقستاندا شاحماتتان وقۋشىلار اراسىندا الەم چەمپيوناتى ءوتۋى مۇمكىن
بۇل تۋرالى فەدەراتسيانىڭ ءبىرىنشى ۆيتسە-پرەزيدەنتى دارمەن ءسادۋاقاسوۆ ءمالىم ەتتى، دەپ حابارلايدى قازاقپارات ءتىلشىسى.
«ءبىزدىڭ فەدەراتسيانىڭ اۋديتورياسى ءارتۇرلى. ونىڭ ىشىندە كاسىبي جانە اۋەسقوي شاحماتشىلار دا بار. ءوز كەزەگىمىزدە بارلىق شاحمات اۋديتورياسىن قامتۋعا تىرىسامىز. وسى ورايدا، مەكتەپ وقۋشىلارىنا ارنالعان باستامامىز بار. ناقتىراق ايتقاندا، قازىر فيدەمەن بىرگە شاحماتتان وقۋشىلار اراسىندا كوماندالىق جارىس وتكىزۋ جاعىن تالقىلاپ جاتىرمىز. اتالعان شارانى بيىل جاھاندىق دەڭگەيدە ۇيىمداستىرماقپىز. سونداي-اق، شاحماتتان وقۋشىلار اراسىندا الەم چەمپيوناتى ءوتۋى دە مۇمكىن»، - دەدى دارمەن ءسادۋاقاسوۆ ورتالىق كوممۋنيكاتسيالار الاڭىندا وتكەن باسپا ءسوز ءماسليحاتىندا.
ودان بولەك، سپيكەر شاحماتتان ستۋدەنتتەر اراسىندا ليگا ۇيىمداستىرۋ جاعىن ءسوز ەتتى.
«سونىمەن قاتار، وتكەن جىلى شاحماتتان كورپوراتيۆتىك تۋرنير وتكىزۋدى قولعا الدىق. بىلتىر العاش ۇيىمداستىرىلعان تۋرنيرگە ءتۇرلى ۇيىم قاتىستى. ارينە، اۋەسقوي شاحماتشىلاردى دا ەستەن شىعارمايمىز. وسىلايشا، ەلىمىزدە شاحمات ويىنىن جەتىلدىرىپ، وعان قىزىعۋشىلاردىڭ سانىن ارتتىرا تۇسپەكپىز»، - دەيدى ول.
