قاسىم-جومارت توقايەۆ چەحيا ۇكىمەتىنىڭ باسشىسى پەتر فيالانى قابىلدادى
قاسىم-جومارت توقايەۆ پەتر فيالانىڭ ەلىمىزگە جاساعان العاشقى رەسمي ساپارى ەكىجاقتى قاتىناستى نىعايتۋعا ىقپال ەتەتىنىنە سەنىم ءبىلدىردى.
- ءسىز ەلىمىزگە ۇلكەن بيزنەس-دەلەگاتسيا الىپ كەلدىڭىز. ەكى ەل اراسىنداعى ىسكەرلىك بايلانىستار مەن ىنتىماقتاستىقتى ىلگەرىلەتۋگە پايداسى وتە زور بيزنەس فورۋم وتەدى، - دەدى قاسىم- جومارت توقايەۆ.
مەملەكەت باسشىسى چەحيا پرەزيدەنتى لاۋازىمىنا سايلانعان پەتر پاۆەلگە قۇتتىقتاۋىن جولدادى.
كەزدەسۋ بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىقتى، سونىڭ ىشىندە كولىك- لوگيستيكا سالاسىن نىعايتۋ پەرسپەكتيۆالارىنا باسا ءمان بەرىلدى. پرەزيدەنت چەح ينۆەستورلارىنا جان- جاقتى قولداۋ كورسەتۋگە دايىن ەكەنىن ايتتى.
- چەحيا رەسپۋبليكاسىنان ەنەرگەتيكا، ماشينا جاساۋ، كولىك، اۋىل شارۋاشىلىعى، قارجى، مەديتسينا ونەركاسىبى جانە فارماتسيەۆتيكا سەكىلدى ەكونوميكانىڭ ءتۇرلى سالالارىنا قۇيىلاتىن ينۆەستيتسيانى قۇپتايمىز. سونداي- اق ەلدەرىمىزدىڭ استانالارى اراسىندا تىكەلەي اۋە قاتىناسىن اشامىز دەپ سەنەمىز، - دەدى مەملەكەت باسشىسى.
ءوز كەزەگىندە پەتر فيالا چەحيانىڭ ەلىمىزبەن اراداعى ىنتىماقتاستىقتى ودان ءارى دامىتۋعا نيەتتى ەكەنىن راستادى.
- چەحيا رەسپۋبليكاسى قازاقستانمەن بۇرىننان دوستىق قارىم-قاتىناس ورناتقان جانە ونى جالعاستىرامىز دەپ سەنەمىز. وسى كەزدەسۋىمىز بەلسەندى بايلانىستارعا تىڭ سەرپىن بەرەدى دەپ ۇمىتتەنەمىن. قازاقستان - ءبىز ءۇشىن وتە ماڭىزدى سەرىكتەس. قازاقستان مەن چەحيا رەسپۋبليكاسىنىڭ ىنتىماقتاستىعى ەۋروپالىق وداق پەن ورتالىق ازيا ەلدەرى اراسىنداعى قارىم- قاتىناستاردىڭ اسا ماڭىزدى تىرەگىنىڭ ءبىرى سانالادى، - دەدى چەحيا پرەمەر-ءمينيسترى.
سونىمەن قاتار كەزدەسۋدە حالىقارالىق كۇن تارتىبىندەگى وزەكتى ماسەلەلەر تالقىلاندى.
