قازاق قىزى بوكستان موڭعول ەلىنىڭ چەمپيونى اتاندى - شەتەلدەگى قازاق باسپا ءسوزى

استانا. قازاقپارات - «قازاقپارات» حاا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

زەينەپ ءازىمباي قىزى بوكستان ەل چەمپيونى اتاندى - «Kaznews»

ۇلانباتىر قالاسىندا بوكستان جاستار اراسىنداعى ەل بىرىنشىلىگىنىڭ فينالدىق ويىندارى ءوتتى. قىزدار اراسىنداعى باسەكەدە 75 كەلى سالماقتا ونەر كورسەتكەن زەينەپ ءازىمباي قىزى ەل چەمپيونى اتاندى.

بۇل تۋرالى «Kaznews» اقپاراتتىق پورتالى بايان-ولگي ايماعىنىڭ بوكس فەدەراتسياسىنىڭ باسپا ءسوز قىزمەتىنە سىلتەمە جاساپ حابارلادى.

اتالعان باسىلىمنىڭ دەرەگىنشە، زەينەپ ءازىمباي قىزى بۇعان دەيىن 2022 -جىلى ەرەسەكتەر جانە جاستار اراسىنداعى ەل بىرىنشىلىگىندە دە چەمپيون اتانعان ەدى.

سونداي-اق، وسى اپتادا «Kaznews» پورتالىندا «ۇلانباتىردا ايگۇل قاليدولدا قىزىنىڭ ءان كەشى وتەدى» دەگەن تاقىرىپتاعى اقپارات جاريالاندى.

ۇلانباتىردا ايگۇل قاليدولدا قىزىنىڭ «My way» اتتى ءان كەشى وتەدى. بۇل تۋرالى ءانشى ءوزىنىڭ الەۋمەتتىك پاراقشاسىندا حابارلاعان.

«ال اعايىن كوپتەن كۇتكەن ءان كەشىنىڭ كۋاسى بولۋعا اسىعىڭىزدار! رامازان ايى بەرەكەسىمەن بولىپ، اللا تاعالا بارشاڭىزعا رىزدىق نەسىبەسىن ەسەلەپ بەرە بەرسىن! موڭعولياداعى ات توبەلىندەي ازعانتاي قازاق ۇلتىنىڭ، ونەر مادەنيەتى جانە ءان الەمىندە قوعامعا ءوز ۇلەسىمدى قوسىپ 30 جىلدى دا ارتقا تاستاپپىن. وسى ۋاقىتتاعى جاساعان ءاربىر ەڭبەك، جەتكەن جەتىستىك ارينە جاراتۋشىنىڭ بەرگەن كۇش- قۋاتى مەن جاقسى ادامداردىڭ قولداۋىنىڭ ارقاسى. «مەنىڭ الەمىم» اتتى ءان كەشىمدى سۇيىكتى حالقىم، تىڭدارماندارىم سىزدەرگە تارتۋ ەتپەكپىن»، دەپ جازادى ونەر يەسى.

ايتا كەتەيىك، اتالعان ءان كەشى 2023 -جىلى مامىر ايىنىڭ 5-كۇنى «سوrporate convention» ورتالىعىندا وتەدى.

توقايەۆ قازاقستاننىڭ بەدەلىن كوتەرەتىنىن ايتتى - «TRT»

توقايەۆ مەملەكەتتىڭ بارلىق جوعارى لاۋازىم يەلەرىمەن ەلدىڭ الەۋمەتتىك-ەكونوميكالىق دامۋى ماسەلەلەرى بويىنشا كەڭەس وتكىزدى.

قازاقستان پرەزيدەنتى قاسىم-جومارت توقايەۆ ىشكى قاۋىپسىزدىككە، قورعانىس قابىلەتىن نىعايتۋعا، قازاقستاننىڭ جانە بۇكىل ورتالىق ازيانىڭ حالىقارالىق ارەناداعى بەدەلىن كوتەرۋگە ەرەكشە كوڭىل ءبولۋ كەرەكتىگىن ايتتى.

بۇل تۋرالى وسى اپتادا تۇركيا راديو تەلەۆيزيا پورتالى حابارلادى.

تۇركيالىق باسىلىمنىڭ دەرەگىنشە، قاسىم-جومارت توقايەۆ الەمدە ساۋدا كەدەرگىلەرى كەڭ قانات جايىپ، مەملەكەتتەر اراسىنداعى ءوزارا سەنىمسىزدىك كۇشەيىپ كەلە جاتقانىن ءتۇسىندىردى. مەملەكەت باسشىسى ازىق-تۇلىك ونىمدەرىندە ءالى دە شەتەلگە تاۋەلدى ەكەنىن ايتىپ، ۇكىمەتتىڭ ەڭ ماڭىزدى باسىمدىعى وتاندىق ءوندىرىس ۇلەسىن ارتتىرۋ ەكەنىن ايتتى.

«الەمدە ەلەۋلى وزگەرىستەر بولىپ جاتقانىنا توقتالعان پرەزيدەنت توقايەۆ «وسى سەبەپتى ىشكى قاۋىپسىزدىككە، قورعانىس قابىلەتىن نىعايتۋعا، قازاقستاننىڭ جانە بۇكىل ورتالىق ازيانىڭ حالىقارالىق ارەناداعى بەدەلىن ارتتىرۋعا ەرەكشە نازار اۋدارۋ كەرەك» دەگەن سوزدەر قولداندى»، دەپ جازدى تۇركيالىق ب ا ق.

الەمدەگى ەڭ بيىك كوپىردىڭ قۇرىلىسى ءجۇرىپ جاتىر- People.cn

قىتايدىڭ گۋيجوۋ ولكەسىندەگى حۋاتسزيان ۇلكەن شاتقالىن «جەر شارىنداعى جارىقشاق» دەپ اتالادى. شاتقالدىڭ ەكى جاعىنداعى قۇلاما جارتاستار مەن تۋلاردىڭ بيىكتىگى مىڭداعان مەترگە جەتەدى. قازىرگى ۋاقىتتا انشۋن قالاسىنىڭ گۋانلين بۋيي، مياو اۆتونوميالىق اۋدانىندا ورنالاسقان حۋاتسزيان شاتقالى ارقىلى وتەتىن كوپىردىڭ قۇرىلىسى جۇرگىزىلۋدە، دەپ حابارلايدى «حالىق» گازەتى.

قىتايلىق ب ا ق-تىڭ مالىمەتىنشە، حۋاتسزيان شاتقالىندا سالىنعان كوپىر بەيپان اتتى وزەننەن وتەدى.

كوپىردىڭ جالپى ۇزىندىعى 2890 مەتر، ال كوپىر پالۋباسى مەن سۋ بەتى اراسىنداعى تىك قاشىقتىق 625 مەتر. قۇرىلىس 2025 -جىلدىڭ 30 ماۋسىمىندا اياقتالادى دەپ كۇتىلۋدە. حۋاتسزيان شاتقالى ارقىلى وتەتىن كوپىر بەيپانتسزيان حانچجوۋ رۋيلي جىلدام كوپىرىنەن اسىپ ءتۇسىپ، الەمدەگى جاڭا ءارى ەڭ بيىك كوپىر بولماق. كوپىر قۇرىلىسىنا ءبىرقاتار جاڭا تەحنولوگيالار، جاڭاشا پروتسەستەر مەن زاماناۋي جابدىقتار قولدانىلۋدا.

قازاقستان پرەمەر-ءمينيسترى تەھرانعا كەلەدى - «Parstoday»

قازاقستان پرەمەر-ءمينيسترى ءاليحان سمايىلوۆ يران ۆيتسە-پرەزيدەنتى مۇحاممەد موحبەردىڭ شاقىرۋىمەن 26 ساۋىردە تەھرانعا كەلەدى. قازاقستان پرەمەر-ءمينيسترى ءاليحان سمايىلوۆتىڭ تەھرانعا ساپارى ەكى ەلدىڭ ساۋدا- ەكونوميكالىق قارىم- قاتىناسىن دامىتۋ ماقساتىندا جۇزەگە اسىرىلادى، دەپ حابارلايدى «Parstoday» اقپارات اگەنتتىگى.

اتالعان اقپارات اگەنتتىگىنىڭ مالىمەتىنشە، قازاقستان پرەمەر-ءمينيسترى وسى ساپار بارىسىندا يير باسشىلارىمەن كەزدەسىپ، كەڭەسەدى.

ايتا كەتۋ كەرەك، يران مەن قازاقستان اراسىندا ساۋدا اينالىمىنىڭ كولەمى 2022 -جىلدىڭ العاشقى 10 ايىندا 450 ميلليون دوللار بولدى. يراننىڭ قازاقستانعا ەكسپورتى 5,26 پايىزعا ءوسىپ، 167 ميلليون دوللار قۇراسا، قازاقستاننان يمپورتى 15 پايىزعا ءوسىپ، 283 ملن دوللارعا جەتتى.

استانادا وزبەكستانعا تۋريستەر اعىنىن ارتتىرۋ ماسەلەلەرى تالقىلاندى - «ءوز ا»

استانا قالاسىنداعى وزبەكستان ەلشىلىگىندە وزبەكستاننىڭ تۋريزم ەلشىسى ءلاززات احانوۆا مەن قازاقستاننىڭ جەتەكشى تۋريستىك كومپانيالارى باسشىلارىنىڭ قاتىسۋىمەن وففلاين جانە ونلاين كەزدەسۋ ءوتتى.

بۇل تۋرالى وسى اپتادا «ءوز ا» اقپاراتتىق اگەنتتىگى حابارلادى.

وزبەكستاندىق ب ا ق-تىڭ حابارلاۋىنشا، وزبەكستان ەلشىسى سايديكروم نيەزحوجايەۆ كەزدەسۋدە 2023 -جىلدىڭ 29-ناۋرىزىندا وزبەكستان پرەزيدەنتىنىڭ توراعالىعىمەن ەلدىڭ تۋريستىك الەۋەتىن قارقىندى دامىتۋ جانە ءبىرقاتار ماسەلەلەر بويىنشا بەينە سەلەكتورلىق كەڭەس وتكەنىن، وندا وزبەكستانداعى تۋريزم سالاسىن دامىتۋ جانە شەتەلدەن كەلەتىن تۋريستەر اعىنىن ارتتىرۋ مىندەتتەر جۇكتەلگەنىن اتاپ ءوتتى.

كەزدەسۋ بارىسىندا وزبەكستانعا باراتىن قازاقستاندىق تۋريستەر سانىن ارتتىرۋ جانە ولاردىڭ قىزىعۋشىلىقتارىن ەسكەرە وتىرىپ، جاڭا باعىتتار بويىنشا تۋرپاكەتتەردى ازىرلەۋ تۋرالى وي الماسقان.

تالقىلاۋدىڭ سوڭىندا قازاقستاننان وزبەكستانعا كەلەتىن تۋريستەر اعىنىن ارتتىرۋ ماقساتىندا ارنايى تۋريستىك پاكەتتەر جاساۋ جۇمىسىن جەدەلدەتۋ تۋرالى كەلىسىلدى، دەپ حابارلايدى «ءوز ا».

بارلىق تاۋى قويناۋىنداعى باقىتتى وتباسى - «حالىق» گازەتى

شينجياڭنىڭ تارباعاتاي ايماعى شاعانتوعاي اۋدانىنىڭ وڭتۇستىگىندە شىعىستان باتىسقا قاراي سوزىلعان بارلىق دەگەن تاۋ بار. تاۋدىڭ وڭتۇستىك ەتەگى جەرگىلىكتى مالشىلاردىڭ ۇرپاقتان ۇرپاققا جالعاسقان كوشپەلى ءومىر كەشكەن ءوڭىرى. 53 جاستاعى شوپان باقىت تىلەكشى قىزىنىڭ وتباسى دا وسىندا تۇراقتاعان، دەپ حابارلايدى «حالىق» گازەتى.

قىتايلىق باسىلىمنىڭ كەلتىرگەن دەرەگىنە سۇيەنسەك، اتادان قالعان مۇرانى جالعاستىرعان باقىت پەن كۇيەۋى قابدىراش نۇسىپبەك ۇلى ەرىنبەي ەڭبەكتەنىپ، بۇگىندە قوراسىنا 200-دەن استام قوي، 20-دان استام سيىر، 10-نان استام جىلقى جيناعان. ولاردىڭ يەلىگىندەگى مال سانى جىلدان جىلعا كوبەيىپ كەلەدى. ءقازىر ولار تەك مالشىلىقپەن عانا شۇعىلدانبايدى. بايۋ جولىنا تۇسكەن باقىت جايلاۋدان دۇكەن اشقان. كۇيەۋى مەن بالاسى سەزىم مالعا قاراسا، ءوزى دۇكەندە ساۋدا جاسايدى. ال، قىزدارى كۇنشۋاق شينجياڭ مەديتسينالىق ۋنيۆەرسيتەتىنە اقىسىز باعدارلاما بويىنشا گرانتپەن وقۋعا تۇسكەن. سول كۇنشۋاقتا اۋىلداستارى مەن وتباسىنىڭ ماقتانىشى، دەپ جازادى قىتايلىق باسىلىم.

اۆتور:

بەيسەن سۇلتان ۇلى