كونستيتۋتسيالىق سوت ەلىمىزدىڭ سوت جۇيەسى سالاسىنداعى زاڭنامانى جەتىلدىرۋدى ۇسىندى
كونستيتۋتسيالىق سوتقا ازامات ك. ك. دۇيسەمبيەۆتەن جوعارعى سوت جانىنداعى سوت تورەلىگىنىڭ ساپاسى جونىندەگى كوميسسيانىڭ شەشىمىنە قاتىستى ءوتىنىشتى تەك جوعارعى سوت كەڭەسىنە شاعىم جاساي الۋ بويىنشا ءوتىنىش كەلىپ ءتۇستى.
ءوتىنىش اۆتورىنىڭ پىكىرىنشە، كوميسسيانىڭ نەمەسە سوت ءجيۋريىنىڭ شەشىمدەرىنە جوعارى سوت كەڭەسىنە عانا شاعىم جاساۋ نورمالارى ادامداردىڭ كونستيتۋتسيادا كوزدەلگەن ازاماتتىڭ سوت ارقىلى قورعالۋىنا جانە ءوز قۇقىعىن ىسكە اسىرۋىنا مۇمكىندىك بەرمەيدى.
وسى ورايدا كونستيتۋتسيالىق سوتتىڭ شەشىمى كەلەسىدەي.
جوعارعى سوت جانە جوعارعى سوت كەڭەسى سۋديالارىنىڭ قۇقىعىن نەعۇرلىم تولىق قامتاماسىز ەتۋ ماقساتىندا كونستيتۋتسيالىق سوتتىڭ نورماتيۆتىك قاۋلىدا قامتىلاتىن قۇقىقتىق ۇستانىمدارىنا سايكەس قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى زاڭنامانى ودان ءارى جەتىلدىرۋ ماسەلەسىن قاراۋ ۇسىنىلادى.
كونستيتۋتسيالىق سوتتىڭ ۇستانىمدارىنا سايكەس، سوت قىزمەتىنىڭ وزىندىك ەرەكشەلىگى سۋديالار تاۋەلسىزدىگى كەپىلدىكتەرىن قامتاماسىز ەتۋدىڭ، بىلىكتىلىگى مەن مورالدىق- ادەپ قاسيەتتەرىنىڭ جوعارى دەڭگەيىنىڭ قاجەتتىلىگىن الدىن الا ايقىندايدى. وسىعان بايلانىستى مەملەكەت ازاماتتار ءۇشىن سۋديا لاۋازىمدارىنا ورنالاسۋ قاعيدالارىن ايقىنداۋعا، ەرەكشە تالاپتار قويۋعا جانە تىيىم سالۋلار مەن شەكتەۋلەر، سونداي- اق وكىلەتتىگىن توقتاتۋ راسىمدەرىن بەلگىلەۋگە قۇقىلى.
كونستيتۋتسيانىڭ 79-بابىنىڭ 1-تارماعىندا سۋديانىڭ وكىلەتتىگى زاڭدا بەلگىلەنگەن نەگىزدەر بويىنشا توقتاتىلادى. اتاپ ايتقاندا، كاسىپتىك جارامسىزدىعىنا بايلانىستى، سۋديانىڭ اتقاراتىن لاۋازىمىنا سايكەس كەلمەگەن جاعدايدا، سونداي- اق سۋديا ءتارتىپتى بۇزىپ تەرىس قىلىق جاساعاندا نەمەسە كونستيتۋتسيالىق زاڭنىڭ 28-بابىندا كورسەتىلگەن تالاپتاردى ورىنداماعان جاعدايدا قاراستىرىلادى.
سۋديالاردى زاڭ اياسىندا بوساتۋ جانە ولاردى جاۋاپقا تارتۋ بويىنشا مەملەكەتتىك ءىس كوپساتىلى جانە ول بىرنەشە دەربەس كەزەڭنەن تۇرادى.
شەشىمدەر ءارقاشان بارلىق ماتەريالدارمەن تانىسۋعا، تۇسىنىكتەمە بەرۋگە، باسقا ادامداردى شاقىرۋعا جانە وزگە قۇجاتتاردى ۇسىنۋعا قۇقىعى بار سۋديانىڭ قاتىسۋىمەن القالى تۇردە قابىلدانادى. كونستيتۋتسيالىق زاڭدا كوميسسيانىڭ نەمەسە سوت ءجيۋريىنىڭ شەشىمدەرىنە جوعارى سوت كەڭەسىنە شاعىم جاساۋدىڭ ەرەكشە ءتارتىبى بەلگىلەنەدى، ول اتالعان شەشىمدەردىڭ كۇشىن جويۋعا قۇقىلى.
كونستيتۋتسيالىق سوت كوميسسيانىڭ نەمەسە سوت ءجيۋريىنىڭ شەشىمدەرى بويىنشا جوعارعى سوت كەڭەسىنە شاعىم جاساۋ ءراسىمى ازاماتتاردىڭ كونستيتۋتسيانىڭ 13-بابىنىڭ 2-تارماعىندا بەكىتىلگەن سوت ارقىلى قورعالۋ قۇقىعىنا نۇقسان كەلتىرمەيدى دەپ ويلايدى.
سونىمەن قاتار، كونستيتۋتسيالىق سوت ازاماتتار ءوز مۇددەلەرىن قورعاۋدىڭ باسقا دا قۇرالدارىن پايدالانعان ءجون دەپ سانايدى. سوت تورەلىگى قىزمەتى مەن ساپاسىن ىلگەرىلەتۋدە جانە ولاردىڭ تاۋەلسىزدىگىن قامتاماسىز ەتۋ ماقساتىندا سۋديالاردىڭ كاسىبي قىزمەتىن باعالاۋدىڭ نەگىزگى ولشەمشارتتارىن زاڭنامالىق رەتتەۋ ماڭىزدى. اتالعان شارالار سۋديا قوعامداستىعىنىڭ قاتىسۋىمەن، جوعارعى سوتتىڭ جانە جوعارعى سوت كەڭەسىنىڭ بىرلەسە كۇش سالۋىمەن پىسىقتالۋى ءتيىس.
نورماتيۆتىك قاۋلىنىڭ تولىق ماتىنىمەن سىلتەمە ارقىلى تانىسۋعا بولادى.
