قازاقستان پرەزيدەنتى ورازا ايت مەرەكەسىنە وراي قۇتتىقتاۋ جەدەلحاتتارىن قابىلدادى
وزبەكستان پرەزيدەنتى شاۆكات ميرزيەيەۆ مەملەكەت باسشىسىنا ۇزاق عۇمىر، زور دەنساۋلىق جانە ونىڭ اسا جاۋاپتى قىزمەتىنە ۇلكەن جەتىستىك تىلەپ، دوستاس قازاقستان حالقىنا بەيبىتشىلىك جانە ودان ءارى دامي بەرۋىنە نيەتتەستىك ءبىلدىردى.
- ءسىزدى جانە بۇكىل قازاقستان حالقىن مۇسىلمان قاۋىمى ءۇشىن قاسيەتتى سانالاتىن ورازا ايت مەرەكەسىمەن قۇتتىقتاپ، شىن جۇرەكتەن ىزگى تىلەكتەرىمدى جولداعانىما وتە قۋانىشتىمىن. ءبىزدىڭ بەرىك ساياسي ەرىك- جىگەرىمىز بەن بىرلەسكەن ءىس-ارەكەتىمىزدىڭ ارقاسىندا ەلدەرىمىز اراسىنداعى دوستىق جانە تاتۋ كورشىلىك بايلانىستار نىعايىپ، تەرەڭدەي تۇسەتىنىن ەرەكشە ىقىلاسپەن اتاپ وتكىم كەلەدى، - دەپ جازىلعان وزبەكستان پرەزيدەنتىنىڭ جەدەلحاتىندا.
قىرعىزستان پرەزيدەنتى سادىر جاپاروۆ ءوزىنىڭ قۇتتىقتاۋ جەدەلحاتىندا ورازا ايت مەرەكەسى باۋىرلاس حالىقتارىمىزعا تاتۋلىق پەن باق-بەرەكە اكەلەتىنىنە سەنىم ءبىلدىردى.
- قىرعىزستان مەن قازاقستان اراسىنداعى ورتاق رۋحاني قۇندىلىقتار مەن دوستىققا، سونداي- اق ستراتەگيالىق سەرىكتەستىككە نەگىزدەلگەن كوپجاقتى قاتىناستار بىرلەسكەن كۇش-جىگەرىمىزدىڭ ارقاسىندا دايەكتى تۇردە دامي بەرەتىنىنە سەنىمدىمىن، - دەپ جازىلعان سادىر جاپاروۆتىڭ جەدەلحاتىندا.
تاجىكستان پرەزيدەنتى ەمومالي راحمون قاسىم-جومارت توقايەۆقا مىقتى دەنساۋلىق، باقىت جانە تابىس، ال قازاقستان حالقىنا بەيبىتشىلىك، تۇراقتىلىق تىلەپ، ودان ءارى ورنىقتى دامي بەرۋىنە نيەتتەستىك بىلدىرگەن.
- وسى بەرەكەلى مەيرامنىڭ مىزعىماس ءداستۇرى مەن تاراپتاردىڭ بىرلەسكەن كۇش-جىگەرىنىڭ نەگىزىندە ەكى ەل اراسىنداعى دوستىق قارىم-قاتىناس پەن كوپجاقتى ءوزارا ءتيىمدى ىنتىماقتاستىق حالىقتارىمىزدىڭ تۇپكى مۇددەلەرىنە سايكەس نىعايىپ، مۇلدە جاڭا ءارى جوعارى دەڭگەيگە كوتەرىلە بەرەتىنىنە سەنىمدىمىن، - دەپ اتاپ وتكەن تاجىكستان پرەزيدەنتى.
ازەربايجان پرەزيدەنتى يلحام اليەۆ ءوزىنىڭ قۇتتىقتاۋىندا ازەربايجان مەن قازاقستان اراسىنداعى مەملەكەتارالىق بايلانىستار مەن ىنتىماقتاستىقتىڭ قارقىندى دامىپ كەلە جاتقانىنا جوعارى باعا بەردى.
- ءبىز باۋىرلاس ءارى سەنىمدى سەرىكتەسىمىز قازاقستانمەن وداقتاستىق قاتىناستاردى تەرەڭدەتۋ جولىندا بىرلەسكەن كۇش- جىگەرىمىزدى ودان ءارى تابىستى جالعاستىرۋعا نيەتتىمىز. مەن ءسىزدىڭ كەرەمەت ەلىڭىزگە جاقىندا جاساعان ساپارىمدى زور ىقىلاسپەن ەسكە الامىن. وسى ايتۋلى مەرەكەدە سىزگە زور دەنساۋلىق، باقىت، ءسىزدىڭ اسا جاۋاپتى قىزمەتىڭىزگە تابىس، ال باۋىرلاس قازاقستان حالقىنا بەيبىتشىلىك پەن باق-بەرەكە تىلەيمىن، - دەپ جازىلعان جەدەلحاتتا.
تۇرىكمەنستان پرەزيدەنتى سەردار بەردىمۇحامەدوۆ مەملەكەت باسشىسى مەن قازاقستان حالقىنا ءوزىنىڭ قۇتتىقتاۋى مەن ىزگى تىلەكتەرىن جولدادى.
- يسلام ءدىنىنىڭ ىرگەلى رۋحاني قۇندىلىقتارىنا سۇيەنە وتىرىپ، جاقسىلىق، ىزگىلىك، مەيىرىمدىلىك سالتانات قۇراتىن بۇل جارقىن مەرەكە بۇكىل مۇسىلمان ۇمبەتى اراسىندا ءوزارا تۇسىنىستىكتى، ىنتىماق پەن بەيبىتشىلىكتى نىعايتۋعا ىقپال ەتەتىنىنە كامىل سەنەمىن، - دەپ جازدى تۇرىكمەنستان پرەزيدەنتى.
سونىمەن قاتار قازاقستان پرەزيدەنتىنە يوردانيا كورولى II ابداللا، باحرەين كورولى حاماد بەن يسا ءال حاليفا، كۋۆەيت ءامىرى شەيح ناۋۋاف ءال-احمەد ءال-دجابەر اس-ساباح، ومان سۇلتانى حايسام بەن تاريق، پالەستينا مەملەكەتىنىڭ پرەزيدەنتى ماحمۋد ابباس، كۋۆەيتتىڭ تاق مۇراگەرى مەشال ءال-احمەد ءال-دجابەر اس-ساباح، ليۆيا پرەزيدەنتتىك كەڭەسىنىڭ ءتوراعاسى مۇحاممەد يۋنيس ءال-مانفي، تاتارستان رايسى رۋستام ميننيحانوۆ قۇتتىقتاۋ جەدەلحاتتارىن جولدادى.
