قىتايدان كەلگەن قانداسىمىز الەم قازاقتارى اراسىنداعى ۇزدىك سپورتشىلار تۋرالى كىتاپ شىعاردى
تۇساۋكەسەردى قازاقستان جازۋشىلار وداعى باسقارما ءتوراعاسىنىڭ ورىنباسارى، اقىن باقىت بەدەلحان جۇرگىزدى.
«بۇگىن مىنە، قازاق دالاسىنىڭ رۋحىن اسقاقتاتاتىن «ساڭلاق» اتتى كىتاپتىڭ تۇساۋكەسەرىن وتكىزىپ وتىرمىز. ەلىمىزدەگى عانا ەمەس، جەر جۇزىندەگى قازاق سپورتشىلارىنىڭ باسىن قوسقان وتە اۋقىمدى دۇنيە، ۇلكەن ەڭبەك. وسىنشاما جەردى، وسىنشاما دالانى قورعاۋعا ساڭلاقتارىمىزدىڭ قوسقان ۇلەسى زور. شىنىمەن باتىرلىق پەن رۋح بولماعان جەردە بۇنداي دالانى ۇستاپ تۇرۋ مۇمكىن ەمەس. الەمنىڭ 16 ەلىندە قازاق تارلاندارى ۇلتتىڭ اتىن ۇلىقتاپ جاتىر. ەلدىڭ رۋحىن كوتەرەتىن - سپورت»، - دەپ اتاپ ءوتتى ب. بەدەلحان تۇساۋكەسەر ءراسىمىڭ اشىلۋىندا.
سونداي-اق، اتالمىش كىتاپتىڭ تۇساۋكەسەرىنە الەم جانە وليمپيا ويىندارىنىڭ قولا جۇلدەگەرى، كاسىپقوي بوكستان ورتا سالماقتا WBO International چەمپيونى، بوكسشى قانات يسلام، ءال-فارابي اتىنداعى قاز ۇ ۋ جۋرناليستيكا فاكۋلتەتىنىڭ اعا وقىتۋشىسى، «الاش» حالىقارالىق ادەبي سىيلىعىنىڭ يەگەرى، اقىن مۇرات شايماران، «جاسىل الەم» دەمالىس ورنىنىڭ ديرەكتورى، كاسىپكەر ەرمەك كەڭەسحان قاتىستى.
«مەنىڭ قۋانىپ وتىرعان جەرىم - بۇل كىتاپقا ەلىمىزدىڭ عانا ەمەس، الەمگە تارىداي شاشىلىپ كەتكەن قازاقتىڭ اراسىنان شىققان سپورتشىلار كىرگەنى. بۇل كىتاپ ءار ءۇيدىڭ سورەسىندە تۇرۋعا ءتيىس، ويتكەنى وسى سپورتشىلاردىڭ جەتىستىكتەرىن وقىعان بالا وسىلارعا قاراپ تالپىنىپ وسەدى. قازاق سپورتىنا، قازاق رۋحانياتىنا وسىنداي ۇلكەن دۇنيە ۇسىنعانى ءۇشىن داۋرەن باۋىرىمىزعا العىس ايتۋىمىز كەرەك»، - دەپ اتاپ ءوتتى مۇرات شايماران.
سونداي-اق، شارا بارىسىندا بوكسشى قانات يسلام كىتاپقا جوعارى باعا بەرىپ، اۆتورعا العىسىن ايتتى.
«داۋرەن باۋىرىمىزدىڭ كوز مايىن تاۋىسىپ جازعان بۇل دۇنيەسى - ۇلكەن ەڭبەك، ەرەن ەرلىك. نامىس پەن باتىرلىق رينگتە جۇرگەن بىزگە عانا ءتان ەمەس، ول ءار قازاقتىڭ بويىندا بولۋى ءتيىس، مەيلى ول سپورتتا، بيزنەستە الدە بيلىكتە ءجۇرسىن. اللا بۇيىرسا بۇل كىتاپتى ارى قاراي ناسيحاتتاۋعا اتسالىسامىز دەپ ويلايمىن»، - دەدى ول.
قۇراستىرۋشى - اۆتور بۇل ەڭبەكتى جيناقتاۋ ءۇشىن 8 جىلعا جۋىق ۋاقىت كەتكەنىن، بىرنەشە ەلدە بولىپ، سپورتشىلارمەن تىلدەسىپ، سۇحباتتاسقانىن تىلگە تيەك ەتتى.
«كىتاپقا قازاقتىڭ كۇش اتاسى اتانعان قاجىمۇقان مۇڭايتپاس ۇلى، ەڭ العاش وليمپياداعا قاتىسقان موڭعولياداعى جەلاياق اپامىز الدانىش رامازان قىزى، ەڭ العاشقى وليمپيادا چەمپيونى ءالجان جارمۇحاممەد، ىشەگىن سۇيرەتىپ ءجۇرىپ الىپپەن الىسقان قىتايداعى قازاق پالۋانى سەرىك قوجاباي ۇلى باستاعان شەتەلدەگى 150 گە جۋىق تارلان سپورتشى، بۇرىنعى كەڭەس وداعى مەن بۇگىنگى تاۋەلسىز قازاقستاننان الەمدىك، وليمپيادالىق دودالاردا توپ جارعان سپورتشىلاردى نەگىز ەتكەن 350-دەن استام، جالپى 16 مەملەكەتتەن 500 قازاق سپورتشىسىنىڭ دەرەگىن توپتادىق. ەڭ العاش بۇل كىتاپتىڭ باستاماسىن 2016-جىلى «قىتايداعى قازاق سپورتشىلارى» دەگەن اتپەن شاعىن كىتاپشا شىعارۋمەن باستاپ ەدىم. كەيىن بۇل ءۇردىس موڭعوليادا ەكى رەت شىعارماشىلىق ساپاردا بولىپ، ول جاقتاعى قانداس سپورتشىلاردى دا ءوز الدىنا شاعىن جيناق ەتىپ دايىنداعا ۇلاستى. ارى قاراي دەرەك ىزدەپ، وزبەكستان، قىرعىزستانعا بارىپ قايتتىم. سوڭىندا قازاقستان سپورتشىلارىن دا قوسىپ، الەمدەگى بارلىعى بولماسا دا، ءبىراز قازاق سپورتشىلارىن ءبىر «شاڭىراق» استىنا جيناپ- توپتاپ، مىنە، بۇگىن وزدەرىڭىزگە «ساڭلاق» دەگەن اتپەن ۇسىنىپ وتىرمىن»، - دەپ اعىنان جارىلدى اۆتور.
ارينە، بۇل وسىنشا عانا قازاق سپورتشىسى بار دەگەندى بىلدىرمەسە كەرەك.
«مۇمكىندىكتىڭ شەكتەۋلى بولۋى بايلانىستى ءالى دە تالاي تۇلعالار وسى توپتامادان تىس قالدى. سول ءۇشىن ەسىمى ەلەنبەي ەمەس، ەنبەي قالعان قالعان ساڭلاقتاردان كەشىرىم سۇرايمىن. كەلەسى كەزەڭدە وسى ولقىلىقتىڭ ورنى تولادى-اۋ دەگەن ويدامىن. ول ەندى الداعى كۇننىڭ ەنشىسىندە»، - دەدى بۇل تۋرالى داۋرەن باقىتقاجى ۇلى.
كىتاپتىڭ تۇساۋكەسەرىن الداعى كۇندەردە استانا قالاسىندا، وزبەكستاننىڭ، موڭعوليا مەملەكەتتەرىندە وتكىزۋگە ۇسىنىستار كەلىپ جاتقانىن ايتادى.
ايتا كەتەيىك، اۆتور داۋرەن باقىتقاجى ۇلى - 1989-جىلى قىتايدىڭ تارباعاتاي ايماعىندا دۇنيەگە كەلگەن. التى كىتاپتىڭ اۆتورى.
شىڭجاڭ قازاق مادەنيەت قوعامىنىڭ جانە ادەبيەت-كوركەمونەرشىلەر بىرلەستىگىنىڭ مۇشەسى.
اۆتور: كۇنسۇلتان وتارباي
