ستۋدەنتتەر مەن جوعارى سىنىپ وقۋشىلارىن جازدا جۇمىسقا العان كاسىپورىنداردى ىنتالاندىرۋ ۇسىنىلدى

استانا. قازاقپارات - ىشكى ىستەر ۆيتسە-ءمينيسترى يگور لەپەحا ستۋدەنتتەر مەن جوعارى سىنىپ وقۋشىلارىن جازعى دەمالىس كەزىندە جۇمىسقا تارتقان كاسىپورىندارعا جەڭىلدىك بەرۋدى ۇسىندى، دەپ حابارلايدى قازاقپارات ءتىلشىسى.

«كامەلەتكە تولماعاندار اراسىنداعى قىلمىستىڭ نەگىزگى سەبەپتەرىنىڭ ءبىرى - جۇمىسى جوقتىق پەن بوس ۋاقىتتىڭ كوپتىگى. تاجىريبە كورسەتىپ وتىر، قىلمىس جاساعان جاس وسىپىرمدەردىڭ جارتىسىنان استامى ەش جەردە وقىماعان جانە ەش جەردە جۇمىس ىستەمەگەن»، - دەدى ول.

ۆيتسە-مينيستر اۋىل جاستارىنىڭ اراسىندا بۇل ماسەلە تىپتەن وزەكتى ەكەنىن ايتادى.

«اۋىلدا جاستاردىڭ دامۋىنا، بوس ۋاقىتىن وتكىزەتىن شارالاردى ۇيىمداستىرۋعا جاعداي جاساۋ قاجەت. بۇل پروبلەمانى شەشۋدىڭ ءبىر جولى - جازعى دەمالىس كەزىندە ستۋدەنتتەر مەن جوعارى سىنىپ وقۋشىلارىن جۇمىسقا تارتقان كاسىپورىندارعا جەڭىلدىكتەر ۇسىنۋ بولا الار ەدى. بۇل شارا جاس وسپىرىمدەردىڭ بوس ۋاقىتىن ءتيىمدى وتكىزۋىنە سەپتىگىن تيگىزىپ، جاستاردىڭ ارەكەتىن دۇرىس ارناعا باعىتتايدى»، - دەدى يگور لەپەحا.