مىندەتىن دۇرىس اتقارماعان مينيسترلەر ماسەلەسى پارلامەنتتىڭ نازارىندا بولادى - ەرلان سايىروۆ

استانا. قازاقپارات - بۇگىندە پارلامەنتتىڭ ۇكىمەتتىڭ جۇمىسىن باقىلاۋداعى ءرولى ارتىپ كەلەدى جانە بۇل باعىتتا باقىلاۋ كۇشەيە تۇسپەك.

وسى ورايدا ءماجىلىس دەپۋتاتى ەرلان سايىروۆ Jibek Joly تەلەارناسىنىڭ «JJ Talk» باعدارلاماسىنىڭ ەفيرىندە مينيسترلەر مىندەتىنە قاتىستى ءبىرقاتار جايتتى كوتەردى، دەپ حابارلايدى قازاقپارات ءتىلشىسى.

«الەۋمەتتىك بلوك بويىنشا ءار مينيسترگە تەك «AMANAT» پارتياسىنىڭ عانا ەمەس، باسقا دا پارتيالاردىڭ ۇسىنعان باعدارلامالارىن قالاي ىسكە اسىرۋ كەرەكتىگى تۋرالى ناقتى ۇسىنىس بەرىلدى. ەگەر مينيسترلەر سول باعدارلامانى ورىندامايتىن بولسا، وندا ولاردىڭ مىندەتىنە قاتىستى ماسەلەنى كوتەرەتىندىگىمىزدى اشىق ايتتىق»، - دەدى ەرلان سايىروۆ تەلەباعدارلاما ەفيرىندە.

سونداي-اق، جوبا جۇرگىزۋشىسى حالىق قالاۋلىسىنان «ماسەلە شەشىمىن تاپپاعان جاعدايدا پارلامەنت بەلگىلى ءبىر مينيسترلەردى ورنىنان الىپ تاستاۋ تۋرالى ۇسىنىس ءبىلدىرۋى مۇمكىن دەسەك بولا ما؟» دەپ سۇرادى.

«ۇسىنىس بىلدىرەمىز. قازىرگى تاڭدا ناقتى كانديداتتار دا بار. بۇل جەردە اتىن اتاپ، ءتۇسىن تۇستەمەي- اق قويايىق. بۇگىندە ەكونوميكا، اۋىل شارۋاشىلىعى سالاسىندا ناقتى كانديداتتار بار. ولاردىڭ جۇمىسىنا باقىلاۋدى كۇشەيتەمىز. بۇل جەردە الەۋمەتتىك سالا دا بار. اتالعان سالاعا ەڭبەك مينيسترلىگى جاۋاپتى. ءتۇرلى ەڭبەك داۋلارى بولىپ جاتادى، ءبىراق ءبىز مينيسترلىكتىڭ ەشقانداي ءرولىن كورىپ وتىرعان جوقپىز. ءار سالا بويىنشا مينيسترلەرگە ناقتى تاپسىرما بەرىلدى. ءبىزدىڭ پارتيانىڭ فراكتسياسى ناقتى جۇكتەلگەن تاپسىرمالار بويىنشا ايىنا ءبىر رەت ۇكىمەتتىڭ ەسەبىن تىڭدايدى. مىسالى، وسى جۇما «سامۇرىق-قازىنا» ۇلتتىق قورى جايلى مەكتەپ سالۋ بويىنشا ەسەپ بەرەدى. شىنىن ايتۋ كەرەك مينيسترلەردىڭ ماسەلەسى پارلامەنت دەپۋتاتتارىنىڭ اياسىندا بولادى. بۇگىندە پارلامەنتتىڭ ۇكىمەتتىڭ جۇمىسىن باقىلاۋداعى ءرولى ارتىپ كەلەدى»، - دەيدى ول.