قازىرگى «قورعاس» كەدەن بەكەتىندەگى جاعداي قانداي

استانا. قازاقپارات - جاقىن ارادا «قورعاس» شەكارا ماڭى ىنتىماقتاستىعى حالىقارالىق ورتالىعى جۇمىسىن قايتا باستايدى.

وسى ورايدا Jibek Joly تەلەارناسىنىڭ ءتىلشىسى شەكارا بەكەتىندەگى قازىرگى جاعدايمەن تانىسىپ قايتقان ەدى، دەپ حابارلايدى قازاقپارات ءتىلشىسى.

«بۇل وتكىزۋ پۋنكتىنىڭ وپەراتورى رەتىندە قۇرىلدى. ولار ەركىن نارىق قالىپتاستىرعان جوق. ال وزدەرىنە جاعداي جاسادى. قۇرامىنا كىرگەن باسقا كومپانيالار دا جەمقورلىق شىرماۋىنا ىلىكتى. ويلاڭىزشى، ХХІ عاسىردا چاتتا قولما-قول اقشامەن ەسەپ ايىرىسۋ تۋرالى جازۋ قانداي قورقىنىشتى باسسسىزدىق»، - دەدى كولىك كومپانياسىنىڭ باس ديرەكتورى وكسانا سوروكينا.

قازىر كەدەندەگى كەزەك ەلەكتروندى جۇيەگە كوشىرىلىپ، دەكلاراتسيا تاپسىرۋ تارتىبە دە وزگەرگەن. سونىمەن قاتار قاشىقتان باقىلايتىن ديسپەتچەرلىك باسقارما قۇرىلعان. ەندىگى ۋاقىتتا كەدەن بەكەتتەرىنىڭ قىزمەتكەرلەرى وزدىگىنەن شەشىم قابىلداي المايدى.

«سول كەزدە ولاردىڭ اراسىندا مايشەلپەك ءۇشىن تارتىس بولدى. بەلگىلى ادامداردان بولەك، باسقا دا توپ بار ەدى. ءبىراق، كۇشى باسىمى ءوز دەگەنىنە جەتتى. ول جونىندە ەشقاشان كوپشىلىككە جاريا ەتىلمەدى. ءبىز ءتىپتى، ولار ءوزارا جانجالداسىپ قالا ما دەپ ويلادىق. الايدا ولاي بولمادى»، - دەيدى قازاقستان كەدەن وكىلدەرى قاۋىمداستىعى كەڭەسىنىڭ ءتوراعاسى گەننادي شەستاكوۆ.

بىلتىر بۇل سالادا زاڭ تالاپتارىن بۇزعانداردان 50 ميلليارد تەڭگەگە جۋىق قاراجات وندىرىلگەن. بۇل رەتتە زاڭدى بۇزعان 15 تەن استام ەكونوميكالىق وپەراتور انىقتالدى.

كەدەندە كەلەڭسىزدىكتەر ءالى دە بار. شەكارا ارقىلى قازاقستاننىڭ جۇك تاسىمالداۋ تالابىنا ساي كەلمەيتىن كولىكتەر كوپ كىرەدى، ونىڭ سالدارى ۇزىنسونار كەزەككە اينالادى.

«17 مەترلىك اۋىر كولىك قويماعا كىرىپ جۇگىن تۇسىرەدى. ودان شىعىپ قايتادان كەدەندىك تەكسەرۋ، تارازىدان ءوتۋىمىز كەرەك. سول ءراسىمنىڭ بارلىعىنا 3 كولىك قايتادان بارىپ اينالىپ كەلۋى كەرەك. ونىڭ بارلىعى ءبىزدىڭ كەدەندىك اۋماقتا كەپتەلىس جاساپ، ۇلكەن پروبلەما تۋدىردى. ءقازىر مەملەكەتتىك كىرىستەر كوميتەتى مەن باسشىلىقتارمەن بىرلەسىپ ءتيىستى شەشىمدەر قابىلداپ وسىنى توقتاتىپ جاتىرمىز»، - دەدى «نۇر جولى» كەدەن بەكەتى باسشىسىنىڭ ورىنباسارى نۇربول سەراليەۆ.

ايتا كەتسەك، قازىرگى تاڭدا ە ا ە و كەدەندىك شەكارالارىندا 9 اۆتوكولىك، 1 تەمىرجول وتكىزۋ پۋنكتتەرىن زامان تالابىنا ساي تەحنيكالىق جاراقتاندىرۋ جۇرگىزىلىپ جاتىر. بۇل وتكىزۋ مۇمكىندىگىن 8 ەسەگە ۇلعايتادى دەپ جوسپارلانۋدا.

ەسكە سالايىق، قازاقستان مەن قىتاي اراسىنداعى تاۋار اينالىمى وتكەن جىلى 34 پايىزعا ءوسىپ، 24,1 ميلليارد دوللاردى قۇراعان.

بۇعان دەيىن 3 جىلدان بەرى توقتاپ تۇرعان «قورعاس» ورتالىعى قايتا ىسكە قوسىلاتىنى تۋرالى حابارلاعان ەدىك.