راحات اليەۆتىڭ تۋىسىنا تيەسىلى قۇس فابريكاسى مەملەكەتكە قايتارىلدى

استانا. قازاقپارات – راحات اليەۆتىڭ تۋىسىنا تيەسىلى قۇس فابريكاسى مەملەكەت مەنشىگىنە قايتارىلدى.

مۇنداي شەشىمدى الماتى وبلىسى تالعار اۋدانىنىڭ سوتى جەرگىلىكتى پروكۋراتۋرانىڭ تالاپ ارىزى بويىنشا قابىلدادى، - دەپ حابارلايدى Tengrinews.kz سايتى.

ماسەلە ليۆان تۋماسى يسلام اللا قۇران تۋرالى، ول 1998-جىلدان 2008-جىلعا دەيىن قازاقستاندىق ءتولقۇجاتقا يە بولعان، قازىر پالەستينا ازاماتى. ول امەريكاندىق American Investments INC كورپوراتسياسىنىڭ پرەزيدەنتى، سونداي-اق راحات اليەۆتىڭ اپكەسى گۇلشات ءحورانيدىڭ كۇيەۋى. 2008-جىلدان باستاپ حوراني شۆەيتساريا مەن ليۆاندا، سونداي-اق قازاقستاندا بوپسالاۋ ءۇشىن جاسالعان قىلمىستار بويىنشا ينتەرپول جەلىسى بويىنشا ىزدەۋدە.

تالعار اۋدانىنىڭ پروكۋراتۋراسى بۇعان دەيىن جالقامىس قۇس فابريكاسىن جەكەشەلەندىرۋدى جانە ونى مەملەكەتتىك مەنشىككە قايتارۋدى جارامسىز دەپ تانۋ تۋرالى تالاپ ارىز بەرگەن بولاتىن.

«جالقامىس قۇس فابريكاسى 1968 -جىلى الماتى وبلىسى تالعار اۋدانى ميرنىي كەنتىندە (قازىرگى نۇرا اۋىلدىق وكرۋگىنىڭ وستەمير كەنتىندە) قۇرىلدى. 1993-جىلى ك س ر و ىدىراعاننان كەيىن قۇس فابريكاسى جۇمىسىن توقتاتتى. 1994-جىلى 4- قاڭتاردا قۇس فابريكاسى «اق-قانات» اكسيونەرلىك قوعامى بولىپ قايتا قۇرىلدى، - دەلىنگەن سوت ءىسىنىڭ ماتەريالدارىندا.

1998-جىلى الماتى اۋماقتىق مەملەكەتتىك مۇلىك جانە جەكەشەلەندىرۋ كوميتەتى «اق-قانات» ا ق (قۇس فابريكاسى) اكسيالارىنىڭ 90 پايىزىن «ادىلەت» اگروونەركاسىپتىك قارجى كومپانياسىنا بەردى. سوڭعىسى اكسيالار بەرىلگەن كۇننەن باستاپ التى اي ىشىندە كاسىپورىننىڭ 24 ميلليون تەڭگە مولشەرىندەگى بەرەشەگىن وتەۋگە مىندەتتەندى. الايدا «ادىلەت» تەك 1484000 تەڭگە ينۆەستيتسيالادى. ال 1999-جىلى سول مولشەردەگى مەملەكەتتىك اكسيالار پاكەتى (90 پايىز) امەريكالىق American Investments Inc كورپوراتسياسىنا دا وتەۋسىز بەرىلدى.

«1999-جىلدىڭ ناۋرىز ايىندا تالعار اۋدانىنىڭ اكىمدىگى «اق-قانات» ا ق- نىڭ جەر پايدالانۋىنان امەريكالىق كورپوراتسيانىڭ پايداسىنا جالپى اۋدانى 665,4 گەكتار جەردى بەس جىلعا 4 جەر ۋچاسكەسىن شىعارۋ تۋرالى شەشىم شىعاردى. سول جىلى قازان ايىندا الىنعان 665,4 گەكتار جەردىڭ 56 گەكتارى «التىن-ايدار» ج ش س- نە بەرىلدى»، - دەلىنگەن قۇجاتتا.

ال 2001 -جىلى تالعار اۋدانىنىڭ اكىمدىگى American Investments Inc كومپانياسىنىڭ «التىن- ايدار» ج ش س پايداسىنا 609 گەكتار جەردى پايدالانۋدان شىعاردى. بۇل جەرلەر 6 جەر ۋچاسكەسىنە ءبولىندى، ولار بويىنشا 2002-جىلى تالعار اۋدانىنىڭ اكىمدىگى مەن «التىن-ايدار» ج ش س اراسىندا 49 جىلعا ءتيىستى جالداۋ شارتتارى جاسالدى.

«مۇراعاتتىق مالىمەتتەرگە سايكەس، الماتى اۋماقتىق مەملەكەتتىك مۇلىك جانە جەكەشەلەندىرۋ كوميتەتى مەن American Investments inc امەريكالىق كورپوراتسياسى اراسىندا قۇس فابريكاسىن وتەۋسىز بەرۋ تۋرالى شارت جاسالمادى، ءوندىرىستى دامىتۋعا جانە كرەديتورلىق بەرەشەكتى وتەۋگە ينۆەستيتسيالار ەنگىزۋدىڭ بيزنەس-جوسپارى ازىرلەنبەدى جانە ۋاكىلەتتى ورگانعا بەرىلمەدى. قۇس فابريكاسى 29 جىل بويى جۇمىس ىستەمەيدى، ونىڭ رەسۋرستارى وتە قيىن جاعدايدا، اۋىلشارۋاشىلىق تەحنيكاسى مەن كولىك قۇرالدارى ەسكىرگەن، قۇرىلىستارعا اعىمداعى جانە كۇردەلى جوندەۋ جۇرگىزىلمەگەن، ينۆەستيتسيالار سالىنباعان، سالىق بەرەشەگى بار.

قۇس فابريكاسىنىڭ مۇلكىن يەلىكتەن شىعارۋ فاكتىسى ۋاقتىلى انىقتالعان كەزدە الماتى مەملەكەتتىك مۇلىك جانە جەكەشەلەندىرۋ اۋماقتىق كوميتەتى مەملەكەتتىك مۇلىكتى مەملەكەتكە قايتارۋ جونىندە شارالار قابىلداۋعا مىندەتتى بولدى، الايدا بۇل تالاپ ورىندالمادى، وسىعان بايلانىستى پروكۋرور مەملەكەت مۇددەسى ءۇشىن تالاپ قويدى»، - دەدى پروكۋرورلار سوتتا.

ءىس ماتەريالدارىن زەرتتەگەننەن كەيىن سوت اۋدان پروكۋراتۋراسىنىڭ تالابىن قاناعاتتاندىردى. وسىلايشا قۇس فابريكاسى مەن ونىڭ جەرلەرى مەملەكەت مەنشىگىنە قايتارىلدى.