قازاقستانعا رەسەي ازاماتتارىنىڭ ەكىنشى تولقىنى كەلە مە؟ كوميتەت جاۋاپ بەردى

استانا. قازاقپارات - قازاقستانعا رەسەي ازاماتتارىنىڭ ەكىنشى تولقىنى كەلە مە؟ بۇل ساۋالعا ەڭبەك جانە حالىقتى الەۋمەتتىك قورعاۋ مينيسترلىگى كوشى- قون كوميتەتى ءتوراعاسىنىڭ مىندەتى اتقارۋشى ءىلياس يسپانوۆ جاۋاپ بەردى، دەپ حابارلايدى قازاقپارات ءتىلشىسى.

«وتكەن جىلى رەسەيدە ازاماتتاردى ءىشىنارا موبيليزاتسيانىڭ ءبىرىنشى تولقىنى بولدى. ءبىز قازاقستانعا كەلگەن رەسەيلىكتەردىڭ اعىنىن بايقادىق. ونىڭ دەنى - ءارتۇرلى سەبەپپەن موبيليزاتسياعا قاتىسقىسى كەلمەگەن ازاماتتار. ءيا، ءبىر مەزگىلدە بىردەن كوپ ادام اعىلىپ كەلدى. ال قازىر جاعداي شتاتتىق رەجيمدە. كۇن سايىن ەلىمىزگە 7 رەسەيلىك كەلىپ- كەتەدى»، - دەدى ءىلياس يسپانوۆ و ك ق-دە وتكەن بريفينگىدە.

سپيكەردىڭ سوزىنە سەنسەك، رەسەيلىكتەردىڭ بىلتىرعى لەگىنەن كەيىن پروتسەستى باقىلاۋ مەحانيزمى رەتتەلدى.

«رەسەي ازاماتتارىنىڭ شەكارادان وتۋىنەن باستاپ، توقتاعان جەرىنە دەيىنگى پروتسەسس اۆتوماتتاندىرىلدى. ولار ەلىمىزدە ءجۇرىپ-تۇرۋ ءۇشىن ۋاقىتشا تىركەۋدەن وتەدى. وتكەن جىلى كەلگەن رەسەيلىكتەر ەۋرازيا ەكونوميكا وداعى ەلدەرى اراسىندا قابىلدانعان جاڭا ەرەجەگە سايكەس قازاقستاندا 90 كۇننەن ارتىق بولا المايدى. وسىلايشا اتالعان ەل ازاماتتارىنا قازاقستاندا بەلگىلەنگەن مەرزىم ىشىندە عانا بولۋ ءتارتىبىن ەسكەرتەدى. ەلىمىزگە رەسەي ازاماتتارى اعىلۋىنىڭ ەكىنشى لەگى باستالعاننىڭ وزىندە ءترانزيتتى قامتاماسىز ەتەمىز. شەكارالىق جانە باسقا دا قۇزىرلى ورگاندار وتكەن جىلعى جاعدايدان ءبىراز ساباق الدى. جاعداي باقىلاۋدا بولادى»، - دەيدى كوميتەت باسشىسى.

ەسكە سالساق، بىلتىر كۇزدە كوشى-قون كوميتەتى قازاقستانعا كۇندەلىكتى كەلەتىن رەسەيلىكتەر سانى 2 ەسە ارتقانىن حابارلاعان ەدى.