كوشى-قون كوميتەتى قازاقستان ازاماتتىعىنان باس تارتقان حوككەيشىلەرگە پىكىر ءبىلدىردى

استانا. قازاقپارات - ەڭبەك جانە حالىقتى الەۋمەتتىك قورعاۋ مينيسترلىگىنە قاراستى كوشى-قون كوميتەتى جۋىردا عانا قازاقستان ازاماتتىعىنان باس تارتقان شەتەلگەن كەلگەن ءۇش ليەگيونەر حوككەيشىگە قاتىستى تۇسىنىك بەردى، دەپ حابارلايدى قازاقپارات ءتىلشىسى.

«كونستيتۋتسيانىڭ 10-بابىنا سايكەس، ەلىمىزدە قوس ەل ازاماتتىعىن قاتار الىپ جۇرۋگە تىيىم سالىنادى. ءبىزدىڭ ەلىمىزدە جەڭىلدەتىلگەن تارتىپپەن ازاماتتىق الۋ مۇمكىندىگى قاراستىرىلعان ماماندىقتار ءتىزىمى بار. ول ماماندىقتاردىڭ ىشىندە سپورشىلار دا بار. ءبىراق ولار قازاقستاندا 5 جىلدان ارتىق تۇرماۋى ءتيىس. ءبىز كەيبىر جەتىستىكتەردىڭ شەتەلدىك كاسىبي مامانداردىڭ ارقاسىندا كەلەتىنىن تۇسىنەمىز. بۇنداي تاجىريبە الەم ەلدەرىندە بار»، - دەدى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ و ك ق-دە وتكەن بريفينگىدە.

ونىڭ مالىمدەۋىنشە، قازاقستان ازاماتتىعىن العان شەتەلدىك زاڭ تالاپتارىنا سايكەس ءوز ەلىنىڭ ازاماتتىعىنان باس تارتۋى ءتيىس.

«شەتەل تۇرعىنى ءبىزدىڭ ازاماتتىقتى العان سوڭ، كەلگەن ەلىنە ازاماتتىعىنان ايىرۋ جونىندە ءوتىنىش بەرۋى كەرەك. ول بەلگىلى ءبىر ۋاقىت الادى. جالپى ازاماتتىق بەرۋ ماسەلەسىنە قاتىستى باقىلاۋ ىشكى ىستەر مينيسترلىگىنىڭ قۇزىرەتىندە. قازاقستان ازاماتتىعىنان باس تارتقان ءۇش حوككەيشىگە قاتىستى ءمان- جايدى مينيسترلىكتەن حات ارقىلى جاۋاپ بەرۋىن سۇرايمىز»، - دەيدى ول.

ايتا كەتسەك، وسىدان بىرەر كۇن كەيبىر ب ا ق بەتتەرىندە ءۇش لەگيونەر حوككەيشىنىڭ قازاقستان ازاماتتىعىنان باس تارتقانى حابارلاندى.

سونداي-اق، سپورتشىلاردىڭ بيىل وتەتىن حوككەيدەن الەم چەمپيوناتىنا قازاقستان اتىنان قاتىسا المايتىنى بەلگىلى بولدى.