وتاندىق سەريالدارعا شەتەلدە سۇرانىس بار - دارحان قىدىرالى

استانا. قازاقپارات – ق ر اقپارات جانە قوعامدىق دامۋ ءمينيسترى دارحان قىدىرالى قاي مەملەكەتتەر قازاقستاندا تۇسىرىلگەن سەريالداردى ساتىپ الىپ جاتقانىن ايتتى، دەپ حابارلايدى قازاقپارات ءتىلشىسى.

«جالپى ۇلتتىق يدەولوگيادا سەريالداردىڭ ماڭىزى وتە زور. امەريكادا گولليۆۋد كوپتەگەن قوعامدىق قۇندىلىقتاردى، پىكىردى، سونداي-اق ا ق ش تۋرالى ۇعىمدى قالىپتاستىرۋعا ۇلەس قوستى. سوندىقتان ءبىزدىڭ سەريالدار بويىنشا وسى باعىتتا ءتيىستى جوبالار ەسكەرىلگەن. ماسەلەن، وتباسى قۇندىلىقتارى، ۇلكەنگە قۇرمەت، كىشىگە ىزەت ءبىلدىرۋ، ەڭبەك ادامى نەمەسە باسقا دا باعىتتاعى جۇمىستار سەريالدارعا ەنگىزىلىپ جاتىر»، - دەدى د. قىدىرالى سەناتتا «بۇقارالىق اقپارات قۇرالدارى مەن الەۋمەتتىك جەلىلەردىڭ مەملەكەتتىك يدەولوگيانى قالىپتاستىرۋداعى ورنى» تاقىرىبىندا وتكەن جيىندا.

وسى ورايدا مينيستر وتاندىق سەريالدارعا شەتەلدە سۇرانىس بار ەكەنىن ايتتى.

«ءبىزدىڭ سەريالدارعا ىشكى نارىقتا جانە حالىقارالىق دەڭگەيدە ۇلكەن سۇرانىس بار. بىلتىردىڭ وزىندە 20 مەملەكەتكە 100 گە جۋىق ءونىم ساتىلعان. ورتالىق ازيا ەلدەرىندە، رەسەيدە، تمد ەلدەرىندە، ازەربايجاندا كورەرمەن ءبىزدىڭ سەريالداردى قارايدى. جاقىندا موڭعوليا وكىلدەرى وتاندىق سەريالداردى سۇرادى. لاتىن امەريكاسى، ەۋروپا جانە اۋستراليا ءبىزدىڭ وتاندىق فيلمدەردى ساتىپ الادى. قازاقستاندا تۇسىرىلگەن انيماتسيالىق فيلمدەرگە سۇرانىس بار. قازىر سەريال ءتۇسىرىپ جاتقان ۇجىمدارعا مەملەكەتتىك تىلگە، سالت-داستۇرگە قاتىستى ءتيىستى تالاپتار قويىپ وتىرمىز»، - دەدى دارحان ءقىدىرالى.

بۇدان بۇرىن حابارلانعانداي، قازاقستاندا تۇسىرىلگەن سەريالدار ا ق ش، پۋەرتو-ريكو، كانادا، لاتىن امەريكاسىندا كورسەتىلدى.

ايتا كەتەيىك، بيىل وتاندىق سەريال كونتەنتىنە ارنالعان «Nauryz» ۇلتتىق بايگەسىنىڭ جەڭىمپازدارى ماراپاتتالدى.