ازاماتتارىمىز سىرتقى اقپاراتتىق كەڭىستىكتىڭ ىقپالىنا ءتۇسىپ قالىپ جاتىر - نۇرتورە ءجۇسىپ

استانا. قازاقپارات - گەوساياسي جاعداي شيەلەنىسكەن قازىرگى ۋاقىتتا يدەولوگيالىق شەبىمىزدى نىعايتۋ ماڭىزدى. بۇل تۋرالى سەناتور نۇرتورە ءجۇسىپ ءمالىم ەتتى، دەپ حابارلايدى قازاقپارات ءتىلشىسى.

«قازاقستان پرەزيدەنتى ءوزىنىڭ «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا جولداۋىندا بۇقارالىق اقپارات قۇرالدارىنىڭ باسەكەگە قابىلەتىن ارتتىرۋعا جانە ازاماتتىق قوعام ينستيتۋتتارىنىڭ ءرولىن نىعايتۋعا قاتىستى ءبىرقاتار تاپسىرما بەردى. وزدەرىڭىزگە بەلگىلى، گەوساياسي شيەلەنىسكەن قازىرگى ۋاقىتتا يدەلوگيالىق شەبىمىزدى نىعايتۋ ماڭىزدى بولىپ وتىر. اقپاراتتىق كەڭىستىكتە ءار تاراپتان اشىق، ىشكى - سىرتقى ماسەلەلەرگە قاتىستى ءتۇرلى اقپاراتتار ەركىن تاراپ جاتىر. ازاماتتارىمىز (اسەرەسە شەكارالىق وڭىرلەردەگى) سىرتقى اقپاراتتىق كەڭىستىكتىڭ ىقپالىنا ءتۇسىپ قالىپ جاتقان جاعدايلار دا بار»، - دەدى ن. ءجۇسىپ سەناتتا «بۇقارالىق اقپارات قۇرالدارى مەن الەۋمەتتىك جەلىلەردىڭ مەملەكەتتىك يدەولوگيانى قالىپتاستىرۋداعى ورنى» تاقىرىبىندا وتكەن جيىندا.

وسى ورايدا ول 2021 -جىلى «جاھاندانۋ داۋىرىندە ۇلتتىق قۇندىلىقتاردى دارىپتەۋ - كەشەندى جاڭعىرۋدىڭ نەگىزى» تاقىرىبىندا، 2022 -جىلى «جاستار جانە جاڭعىرۋ» تاقىرىبىندا كەڭ كولەمدە پارلامەنتتىك تىڭداۋ وتكەنىن ەسكە سالدى.

«سول پارلامەنتتىك تىڭداۋلاردىڭ ناتيجەسى بويىنشا مەملەكەتتىك ورگاندارعا جولدانعان ۇسىنىمنىڭ ىشىندە وسى ۇلتتىق يدەولوگيانى نىعايتۋ باعىتىندا ءبىرقاتار تاپسىرما بولدى. بۇگىن دە وسى باعىتتا ەلىمىزدەگى اقپاراتتىق يدەولوگيانى كۇشەيتۋ، ونىڭ تيىمدىلىگىن ارتتىرۋ بويىنشا جاڭاشا ۇسىنىستاردى قاراستىرۋ ماڭىزدى دەپ بىلەمىز»، - دەدى نۇرتورە ءجۇسىپ.

ءوز كەزەگىندە ق ر اقپارات جانە قوعامدىق دامۋ ءمينيسترى دارحان قىدىرالى اقپاراتتىق يممۋنيتەتتى كۇشەيتۋ جايىندا ايتىپ بەردى.

«كوپتەگەن ەرەجەلەردى وزگەرتەمىز. جالپى، بۇقارالىق اقپارات قۇرالدارىن قارجىلاندىرۋ تەتىكتەرى وزگەرەدى، ياعني سۋبسيديالاۋ، گرانت بەرۋ ەسكەرىلەدى. اتاپ ايتقاندا، اقپاراتتىق يممۋنيتەتىمىزدى كۇشەيتۋدى جوسپارلاپ وتىرمىز. وتاندىق كابەلدىك جۇيەگە گرانت ءبولۋ سياقتى جوبالار تاياۋ ارادا جۇزەگە اسادى»، - دەدى د. قىدىرالى.

سونىمەن قاتار مينيستر اقپاراتتىق قاۋىپسىزدىك ماسەلەسىنە توقتالدى.

«اقپاراتتىق قاۋىپسىزدىكتى نىعايتۋ باعىتىندا ءتيىستى ءىس- قيمىل ەسكەرىلگەن. بۇل باعىتتا كۇن سايىن مونيتورينگ جۇرگىزەمىز. وسى ورايدا قاۋىپتى اقپاراتتار سوت ۇكىمىمەن بۇعاتتالادى نەمەسە زاڭناما اياسىندا توسقاۋىل قويىلادى. مۇنىمەن قوسا، بۇل پروتسەستە ساراپشىلاردىڭ جۇمىسى قامتىلعان. بۇدان بولەك، شەكارالىق وڭىرلەرگە توقتالساق، بۇل باعىتتا دا ىشكى يممۋنيتەتتى نىعايتۋ ماڭىزدى. بۇل تۇرعىدا مەملەكەتتىك ءتىلدى قولدانۋ اياسى كەڭەيتىلەدى»، - دەدى ۆەدومستۆو باسشىسى.

وسى ورايدا د. قىدىرالى قازاقستان اۋماعىندا باسقا ەلدەردىڭ ساياساتىن ناسيحاتتاۋعا جول بەرمەۋ قاداعالاۋدا تۇرعانىن ايتتى.