الماتىلىق اكۋشەر اياعى اۋىر ايەلدى پاتەرىندە بوساندىرىپ الدى
31 جاستاعى الماتى تۇرعىنى ەكىنشى بالاسى بولعاندىقتان، پەرزەنتحاناعا تولعاعىن «ءپىسىرىپ» ءبىر-اق بارماقشى بولادى.
الايدا، بوسانۋ پروتسەسى جەدەلدەپ، پەرزەنتحاناعا جەتە الماي قالعان.
«ول كۇنى مەن كەزەكشىلىكتەن شىعىپ، ۇيگە قايتىپ كەلە جاتقانمىن. اۋلادا جەدەل جاردەم كولىگى تۇر. جينالعاندار ءتورتىنشى قاباتتا اياعى اۋىر ايەلدىڭ بوسانۋعا جاقىن ەكەنىن ايتتى. بىردەن سول پاتەرگە باردىم. ەكىقابات كەلىنشەك ءىشى اۋىرسا دا، تولعاق دەپ ويلاماعان. ءتىپتى، بالا شىعۋعا جاقىن قالىپتى. پەرزەنتحاناعا اپارۋعا كەش ەدى. سوندىقتان، ءۇي جاعدايىندا امان-ەسەن بوساندىرىپ الدىم. سودان كەيىن جەدەل جاردەممەن پەرزەنتحاناعا الىپ كەتتى»، - دەيدى پەريزات اسقار.
ايتۋىنشا، پەرزەنتحانا قابىرعاسىنان تىس بوساندىرۋ تاۋەكەلگە تولى بولسا دا، كەيدە شۇعىل ارەكەت ەتۋگە تۋرا كەلەدى.
مۇنداي جاعداي بولماۋ ءۇشىن جۇكتى ايەلدەر بوسانۋعا دايىندىقتى ەمدەۋ مەكەمەسىندە ءوتۋى ءتيىس.
جۇكتىلىگىنىڭ ەرەكشەلىگىن، تولعاقتىڭ بارىسىن، بوسانۋ كەزىندەگى ادىستەردى مەڭگەرگەنى ءجون.
وسى سالادا 10 جىلعا جۋىق ەڭبەك ءوتىلى بار تاجىريبەلى اكۋشەر پەريزات ابىلاي قىزى وسى ۋاقىت ارالىعىندا مىڭداعان ءسابيدىڭ امان-ەسەن ومىرگە كەلۋىنە سەبەپشى بولدى. ءبىر عانا كەزەكشىلىكتە جەتى نارەستەنىڭ كىندىگىن كەسكەن كەزدەرىدە بار.
«كوپتەن كۇتكەن ءسابيىن قولىنا الىپ، قۋانعان انانىڭ ءجۇزىن كورۋ ءبىر باقىت. ادام ومىرىندەگى ەڭ قۋانىشتى ساتكە كۋاگەر بولىپ جۇرگەنىم - جۇرەك قالاۋىممەن تاڭداعان مامانداعىمنىڭ ارقاسى»، - دەيدى ول.
بىلىكتى ماماننىڭ سوزىنشە، بوساندىرۋ بارىسىندا ەڭ باستى مىندەت - انا مەن بالا ءومىرىن ساقتاپ قالۋ.
«بۇل رەتتە قازىر جاڭا تەحنولوگيالار قولدانىلىپ ءجۇر. اتاپ ايتقاندا بالانىڭ جۇرەك قاعىسىن باقىلاپ تۇرۋعا مۇمكىندىك بەرەتىن كتگ اپپاراتىنىڭ كومەگى زور»، - دەپ اتاپ ءوتتى پەريزات اسقار.
