تالدىقورعاننىڭ ءبىلىم ءبولىمى قىزمەتكەرلەرىنىڭ سومكە-سومكە اقشامەن ۇستالعان ۆيدەوسى جاريالاندى
«تالدىقورعان ءبىلىم ءبولىمىنىڭ قىزمەتكەرلەرى ميللياردتاعان قارجى ۇرلادى دەگەن كۇدىككە ءىلىندى. سىبايلاس جەمقورلىقپەن كۇرەس قىزمەتى جەتىسۋ وبلىسى پروكۋراتۋراسىنىڭ ۇيلەستىرۋىمەن تالدىقورعان قالاسىنىڭ ءبىلىم ءبولىمىنىڭ قىزمەتكەرلەرىن ۇستادى. ولارعا ءبىلىم بەرۋ سالاسىندا ءىس جۇزىندە جۇمىس ىستەمەيتىن ۇلەستەس تۇلعالاردىڭ پايداسىنا وتەۋسىز قارجى اۋدارۋ ارقىلى اسا ءىرى مولشەردە بيۋدجەت قاراجاتىن ۇرلاۋمەن اينالىسقان دەگەن كۇدىك كەلتىرىلىپ وتىر. الدىن الا كەلتىرىلگەن زالال سوماسى شامامەن 2 ميلليارد تەڭگەنى قۇرادى»، - دەلىنگەن سىبايلاس جەمقورلىققا قارسى ءىس-قيمىل اگەنتتىگىنىڭ جەتىسۋ وبلىسى بويىنشا دەپارتامەنتىنىڭ حابارلاماسىندا.
قازىرگى تاڭدا ءىستىڭ ءمان-جايىنا تيەسىلى 29 جىلجىمايتىن مۇلىك نىسانىنا، قىمبات اۆتوكولىكتەرگە تىيىم سالىندى. كۇدىكتى ادامدار ۇستالىپ، سوتتىڭ سانكسياسىمەن قاماۋعا الىندى.
سوتقا دەيىنگى تەرگەۋ جالعاسۋدا.
ق پ ك-نىڭ 201-بابىنا سايكەس تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.
ەستەرىڭىزگە سالا كەتەيىك، بۇعان دەيىن پروكۋراتۋراسىنىڭ تالدىقورعاندىق ەسەپشىلەردىڭ ۇستالعانىن راستاعان جونىندە اقپارات بەرگەن بولاتىنبىز.
سامال قابىشەۆا
