ۇكىمەت ەسكى جۇمىس ءتاسىلىن تۇبىرىمەن جويۋ ءۇشىن ەرىك-جىگەر تانىتۋى ءتيىس - توقايەۆ

استانا. قازاقپارات - كەيبىر مەملەكەتتىك قىزمەتشىلەر ءوز جۇمىسىنا سەلقوس قارايدى.

بۇل تۋرالى ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«مەن بۇگىن رەفورمالارىمىزدى جۇزەگە اسىرۋداعى ءبىرقاتار ولقىلىقتارعا، تۇيتكىلدەرگە توقتالدىم. نەگىزگى ماسەلە - جۇمىستىڭ ساپالى ورىندالماۋىندا. سول سەبەپتى ناقتى ناتيجەگە قول جەتكىزە الماي وتىرمىز. ونىڭ ءتۇرلى سەبەبى بار. كەيبىر مەملەكەتتىك قىزمەتشىلەر، باسشىلار ءوز جۇمىسىنا سەلقوس قارايدى، بەلسەندى ەمەس. وزىنە جاۋاپكەرشىلىك الۋدان تارتىنادى»، - دەدى قاسىم-جومارت توقايەۆ.

وسى ورايدا پرەزيدەنت بۇل كەمشىلىكتەر بيۋدجەت قارجىسىن يگەرۋ ىسىندە قاتتى بايقالىپ تۇرعانىن ايتتى.

«ولار جۇمىستى ساپالى ورىنداۋعا ەمەس، تاپسىرمانى دەر كەزىندە باقىلاۋدان الۋعا باسا ءمان بەرەدى. سونىڭ زاردابىن ءبارىمىز تارتىپ وتىرمىز. جاريا ەتىلگەن كوپتەگەن رەفورما ءالى دە باياۋ ءجۇرىپ جاتىر. ونى مويىنداۋىمىز كەرەك. سوندىقتان ۇكىمەت ەسكى جۇمىس ءتاسىلىن تۇبىرىمەن جويۋ ءۇشىن ەرىك- جىگەر تانىتۋعا ءتيىس»، - دەدى مەملەكەت باسشىسى.

بۇدان بۇرىن حابارلانعانداي، پرەزيدەنت بارلىق دەڭگەيدەگى اكىمدەردىڭ جۇمىسىن جىل سايىن باعالاۋ جۇيەسىن ەنگىزۋدى تاپسىردى.

مەملەكەت باسشىسى جاڭا جىلدان بەرى پرەزيدەنت اكىمشىلىگىنىڭ قوعامدىق قابىلداۋىندا 811 ادام بولعانىن ايتتى.