قاسىم-جومارت توقايەۆ اۋىل حالقىنىڭ تابىسىن ارتتىرۋ جولدارىن اتادى
«اۋىلدى جەرلەردە تابىس پەن تۇرمىس ساپاسىن ارتتىرۋ ماسەلەلەرىن ەرەكشە باقىلاۋدا ۇستاۋ قاجەت. ۇكىمەت اۋىلدىق اۋماقتاردى دامىتۋدىڭ 2023-2027 -جىلدارعا ارنالعان تۇجىرىمداماسىن ازىرلەدى. اكىمدەر ونى ءتيىمدى ىسكە اسىرۋ ءۇشىن شارالار قابىلداۋى ءتيىس.
ءاربىر اۋدان، مونوقالا جانە قالا دەڭگەيىندە قولايلى ينۆەستيتسيالىق احۋال مەن «ءوسىم كوزدەرىن» قۇرۋ ءۇشىن ولاردىڭ باسەكەلەستىك ارتىقشىلىقتارىن انىقتاپ، سالالىق باسىمدىقتاردى تاڭداۋ قاجەت»، - دەدى مەملەكەت باسشىسى.
سونداي-اق، پرەزيدەنت اۋىل تۇرعىندارىنىڭ تابىسىن ارتتىرۋ ءۇشىن جەكەلەگەن وڭىرلەردىڭ تابىستى تاجىريبەسىن ەسكەرۋ كەرەكتىگىن تاعى ەسكە سالدى.
«ەڭ شالعايداعى اۋىلدىق وكرۋگتەرگە ميكروكرەديت بەرۋ جانە جەكە قوسالقى شارۋاشىلىقتارعا كەپىلدىك بەرۋ، سەرۆيستىك-وتكىزۋ كووپەراتيۆتەرىن ىنتالاندىرۋ سياقتى مەملەكەتتىك قولداۋ قۇرالدارى تۋرالى اقپاراتتى جەتكىزۋ ماڭىزدى»، - دەدى قاسىم-جومارت توقايەۆ.
ايتا كەتەيىك، ۇكىمەت ۇيىندە پرەزيدەنت توراعالىعىمەن ەلدىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس ءوتىپ جاتىر.
