قاسىم-جومارت توقايەۆ: كەيبىر پىسىقايلار العان سۋبسيديانى قالتاعا باسىپ كەلگەن
«2019-2021 -جىلدارى ءونىم وڭدەۋگە بەرىلگەن سۋبسيديانى الايىق. بۇل قاراجاتتىڭ تەڭ جارتىسى سۋبسيديا الام دەۋشىلەردىڭ 10 پايىزىنىڭ عانا قولىنا تيگەن. سۋبسيديا العان كەيبىر پىسىقايلار ءوندىرىستى وركەندەتۋدىڭ ورنىنا بيۋدجەت قارجىسىن قالتاسىنا باسىپ، شالقىپ ءومىر سۇرگەن»، - دەدى مەملەكەت باسشىسى.
پرەزيدەنتتىڭ پايىمىنشا، قاراپايىم شارۋالار ءۇشىن سۋبسيديا الۋ - قيامەتتىڭ قيىنى.
«ونىڭ ۇستىنە، سۋبسيديا بەرۋ جۇيەسى وتە كۇردەلى جانە قاجەتتى مالىمەت كوپشىلىككە قولجەتىمدى ەمەس. سۋبسيديا ءبولۋدى رەتتەيتىن جاڭا تسيفرلىق جۇيە بۇل تۇيتكىلدى شەشە الماي تۇر»، - دەدى مەملەكەت باسشىسى.
سوڭعى بەس جىلدا بيۋدجەتكە 30 تريلليون تەڭگە كەم تۇسكەن. بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە مەملەكەت باسشىسى قاسىم-جومارت توقايەۆ ايتتى.
«ماكروەكونوميكالىق ساياساتتى وتە بايىپتى جۇرگىزۋ كەرەك. بيۋدجەت تاپشىلىعىن، مەملەكەت قارىزىن، ۇلتتىق قوردان اۋدارىلاتىن ترانسفەرتتى جانە باسقا دا ماكروكورسەتكىشتەردى رەتتەۋ قاجەت. ءيا، ەكونوميكامىز ءوسىپ جاتىر»، - دەدى پرەزيدەنت.
مەملەكەت باسشىسى ءبىراق سالىق تۇسىمدەرىنىڭ ىشكى جالپى ونىمگە قاتىستى ءوسۋ قارقىنى تۇراقسىز ەكەنىن باسا ايتتى.
«كەيبىر ماماندار «سالىق جەڭىلدىكتەرى وتە كوپ بولعان سوڭ، ءتۇسىم ازايىپ جاتىر» دەيدى. بۇدان باسقا دا سەبەپتەر ايتىلادى. جالپى، سوڭعى بەس جىلدا بيۋدجەتكە 30 تريلليون تەڭگە كەم تۇسكەن. ارينە بۇل سيفردىڭ دۇرىس-بۇرىستىعىن تەكسەرۋ قاجەت. تالاي جىلدان بەرى جالعاسىپ كەلە جاتقان وسى ماسەلەنى تۇپكىلىكتى شەشەتىن ۋاقىت جەتتى»، - دەدى قاسىم-جومارت توقايەۆ.
ايتا كەتەيىك، ۇكىمەت ۇيىندە پرەزيدەنت توراعالىعىمەن ەلدىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس ءوتىپ جاتىر.
