پرەزيدەنت باعانىڭ كۇرت ءوسىمىن تەجەۋگە قاتىستى تاپسىرما بەردى
بۇل تۋرالى ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
پرەزيدەنت كوكونىس قويمالارىنىڭ، كوتەرمە-تاراتۋ ورتالىقتارىنىڭ جانە اۋىلدىق سەرۆيستىك وتكىزۋ كووپەراتيۆتەردىڭ ينفراقۇرىلىمىن قۇرۋ باعىتىندا بيزنەسكە كومەكتەسۋ قاجەت ەكەنىن ايتتى.
«بۇل - مەملەكەت پەن جەكەمەنشىكتىڭ سەرىكتەستىگى ءۇشىن زور مۇمكىندىك. جاقىندا پرەمەر-ءمينيستردىڭ ورىنباسارى سەرىك جۇمانعارينگە بۇل ماسەلە بويىنشا ءتيىستى تاپسىرمامدى بەردىم. اگروونەركاسىپ كەشەنىنە قاتىستى ماسەلەنىڭ ءبارى باسقا سالالارعا دا قاتىستى ەكەنىن ۇمىتپاعان ءجون. تاعى دا قايتالاپ ايتامىن. جوعارى ءونىم الۋدى قامتاماسىز ەتۋ كەرەك. اشىق باسەكەلەستىك بولۋعا ءتيىس. ءبىر سوزبەن ايتقاندا، وسى سالاداعى باستى تۇيتكىلدەردى دەرەۋ شەشۋ كەرەك. سوندا عانا باعانىڭ كۇرت ءوسىمىن تەجەۋگە مۇمكىندىك تۋادى»، - دەدى مەملەكەت باسشىسى.
