اكىمدەر قالالاردى، ەلدى مەكەندەردى جاياۋ ارالاۋى ءتيىس - پرەزيدەنت
بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە پرەزيدەنت قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ءبىزدىڭ قالالارىمىز ناشار كورىنەتىندىگىن، بالالار الاڭدارىمەن جابدىقتالماعانىن مويىنداۋىمىز كەرەك. شەتەلدە بولىپ تۇرامىز. اسىرەسە شىعىس ەۋروپادا، بالقاندا قالالارىنىڭ بيۋدجەتى ءبىرشاما از بولعانىنا قاراماستان تارتىمدى كورىنەتىن شاھارلارى بار. بۇل جۇمىس مۋنيتسيالدى بيلىكتىڭ جۇمىسى دا شىعار. دەگەنمەن، ەكىنشى جاعىنان بۇل سول جەردە تۇراتىن ادامداردىڭ دا قارىم-قاتىناسى. ول بىزدە جوق. قالالىقتار وزدەرىنىڭ ۇيلەرىنە، كوشەلەرىنە جانە باسقالارىنا قالاي بولسا سولاي، بەي-بەرەكەت قارايتىندىعى سىندى پروبلەمالارمەن بەتپە-بەت كەلىپ وتىرامىز. مۇنداي جايت ەلوردادا دا ورىن الىپ وتىر. مەن ەلوردانىڭ جوعارى مارتەبەسىنە قالانىڭ ورتالىعى عانا ەمەس شەتكى ايماقتارى دا ساي بولۋى تيىستىگىن بىرنەشە رەت ايتتىم»، - دەدى پرەزيدەنت.
وسى رەتتە مەملەكەت باسشىسى بارلىق دەڭگەيدەگى اكىمدەردىڭ، ءماسليحات وكىلدەرىنىڭ نازارىن اتالعان ماسەلەگە اۋداردى.
«تاياۋدا سەمەيدەگى بالالار الاڭى تۋرالى سيۋدجەت كورسەتتى. ونى پايدالانۋدىڭ ءوزى قاۋىپتى. اكىمدەر وزدەرىنىڭ قالالارىندا، ەلدى مەكەندەرىندە جاياۋ ءجۇرۋى ءتيىس. بۇل ەلورداعا دا قاتىستى»، - دەدى قاسىم-جومارت توقايەۆ.
ءاربىر مەملەكەتتىك قىزمەتشى وزىنە وراسان زور مىندەت جۇكتەلىپ وتىرعانىن سەزىنۋگە ءتيىس.
بۇل تۋرالى ەلىمىزدىڭ الەۋمەتتىك- ەكونوميكالىق دامۋى جونىندەگى كەڭەستە مەملەكەت باسشىسى قاسىم-جومارت توقايەۆ ايتتى.
«قازاقستان - وسى گەوساياسي ايماقتا اۋقىمدى، دەموكراتيانى ارقاۋ ەتكەن رەفورمالار جولىنا تۇسكەن بىردەن- ءبىر مەملەكەت. سوندىقتان بىزگە وڭاي بولمايدى. ءبىراق بۇل جولدى قالايدا ءجۇرىپ وتۋگە ءتيىسپىز. ەندى جۇمىسقا جۇمىلا كىرىسەمىز. وسىندا وتىرعان ءاربىر مەملەكەتتىك قىزمەتشى وزىنە وراسان زور مىندەت جۇكتەلىپ وتىرعانىن سەزىنۋگە ءتيىس. بۇل - ەڭ الدىمەن، بارشا قازاقستان حالقىنىڭ الدىنداعى جاۋاپكەرشىلىك. سىزدەردىڭ شەشىمدەرىڭىز بەن ءىس- ارەكەتتەرىڭىز ەلدىڭ بۇگىنى مەن بولاشاعىنا تىكەلەي اسەر ەتەدى»، - دەدى مەملەكەت باسشىسى.
سوندىقتان پرەزيدەنت كۇندەلىكتى ماسەلەلەردى شۇعىل شەشۋمەن عانا شەكتەلمەۋ كەرەكتىگىن قاتاڭ ەسكەرتتى.
«سىزدەر مەملەكەتشىل- رەفورماتور بولۋلارىڭىز قاجەت. رەفورمالارىمىزدىڭ تۇپكى ماقساتى - حالىقتىڭ ءومىرىن جاقسارتۋ. ول ءۇشىن تۇرعىنداردىڭ تابىسىن كوبەيتۋ كەرەك. جايلى ءومىر سۇرۋىنە جاعداي جاساپ، قاۋىپسىزدىگىن قامتاماسىز ەتۋ قاجەت. ازاماتتاردىڭ ءوزىن-ءوزى دامىتۋىنا بارلىق مۇمكىندىك جاسالۋعا ءتيىس. مۇنىڭ ءبارىن مىقتى نارىقتىق ەكونوميكا بولسا عانا، تابىستى جۇزەگە اسىرا الامىز»، - دەدى قاسىم-جومارت توقايەۆ.
